Presidenti malazez: Nuk pres incidente në kufirin me Kosovën, asnjë centimetër nuk ua kemi marrë

Presidenti malazez, Filip Vujanoviq ka thënë se askush në Kosovë nuk ka arsye që ndaj Malit të Zi të tregojë çfarëdo pakënaqësie.

Vujanoviq këtë e ka thënë në Kollashin ku ka marrë pjesë në seancën ceremoniale të Kuvendit komunal të Kollashinit me rastin e Ditës së Komunës.

I pyetur se a pret incidente në kufirin me Kosovën pas ratifikimit të Marrëveshjes për demarkacionin në Kuvendin e Kosovës, Vujanoviq është deklaruar i prerë. “Natyrisht se nuk presim incidente. Ju e dini se unë në raport me atë Marrëveshje dhe demarkacionin e vijes kufitare ja deklaruar në vazhdimësi”, ka thënë Vujanoviq, transmeton lajmi.net.

Sipas tij, Marrëveshja për demarkacionin është bërë me shumë kujdes dhe më pas është nënshkruar nga të gjithë palët.

“Është nënshkruar në Vjenë dhe në Mal të Zi është ratifikuar”, ka thënë ai. Tutje Vujanoviq ka thënë se është çështjen e brendshme e Kosovës se si do ta bëjë ratifikimin.

“Ne jemi shteti që ka treguar raport korrekt, ka pranuar atë që është realitet në Kosovë. Ndaj banorëve të Kosovës jemi treguar bujar në të gjithë ngjarjet që janë të njohura edhe për qytetarët e Kosovës edhe për ata të Malit të Zi, raporte maksimalisht korrekte”, ka thënë Vujanoviq.

Ai ka thënë se Mali i Zi nuk meriton që askush nga Kosova të kryej ndonjë akt të ligë ndaj Malit të Zi, transmeton lajmi.net.

“Përkundrazi, Mali i Zi është treguar i mirë me të gjithë fqinjët dhe partner me të gjithë. Unë pres që kjo në Kosovë të mirëkuptohet”, ka thënë Vujanoviq.

Ai beson se të gjithë qytetarët e Kosovës e kuptojnë se Mali i Zi është fqinj i mirë dhe se kurrë nuk ka treguar pretendime ndaj askujt.

Vujanoviq tutje ka thënë se Malit të Zi nuk i duhet asnjë centimetër tokë që nuk është e saj dhe se dëshiron marrëdhënie të mira me të gjithë fqinjët.

“Këtë e kemi treguar në komunikim ndaj Bosnjës dhe tash ndaj Kosovës që jemi partner i besueshëm, fqinj i mirë. Më bëhet qejfi për deklaratat e bashkësisë ndërkombëtare nga Brukseli dhe të gjitha adresat e vendeve anëtare të BE-së, SHBA, zv/presidentit Joe Biden, deklaratat e të cilit i keni dëgjuar në Prishtinë”, ka thënë Vujanoviq.

Në pyetjen se a janë në gatishmëri shërbimet e sigurisë, Vujanoviq ka thënë se Mali i Zi ka treguar në të gjitha situatat se ka shtet i cili sigurisë së vet i jep rëndësisë të çmuar dhe raport adekuat.
“Asnjë qytetar nuk do të cenohet në çfarëdo forme”, ka thënë ai.