Ahmeti: Takimi Thaçi-Vuçiq pa legjitimitet ligjor e politik
Kryetari i Prishtinës, Shpend Ahmeti, ka reaguar për takimin që u mbajtë mbrëmë në mes presidentit të Kosovës, Hashim Thaçi dhe presidentit serb, Aleksandër Vuçiq me ndërmjetësimin e Përfaqësueses së Lartë të BE-së, Frederica Mogherini në Bruksel.
Ai përmes një statusi në Facebook ka thënë se ky takim është i treti takim pa mandat dhe paltformë dhe pa legjitimitet ligjor e politik.
Kryetari i PSD-së i bëri thirrje urgjente Kuvendit të Kosovës që të arrijë një marrëveshje për të mandatuar një ekip gjithëpërfshirës shtetëror në këtë proces tepër sfidues e të rëndësishëm për Kosovën.
Postimi i plotë i Ahmetit:
Takimi i tretë në mes të Thaçit dhe Vuçiqit është takimi i tretë pa mandat dhe pa platformë. Pra edhe ky takim ishte pa legjitimitet ligjor e politik. Për më shumë është takimi i tretë publik i Thaçit pa transparencë e raportim.
Kuvendi i Kosovës duhet që urgjentisht të arrijë marrëveshje për rrugën përpara. Kosova duhet ta draftojë platformen dhe ta mandatojë ekipin gjithëpërfshirës shtetëror në këtë process tepër sfidues e të rëndësishëm për Kosovën.
Në kohën kur Serbia po bëhet gjithnjë e më agresive, e Thaçi gjithnjë më jolegjitim e jotransparent, duhet urgjentisht ta vendosim procesin në binarë demokratik e institucional.
Takim të katërt të tillë nuk duhet të ketë!