Limaj: E padrejtë përfshirja e vajzës së të dyshuarit, që përfitoi nga 2 milionët

Limaj: E padrejtë përfshirja e vajzës së të dyshuarit, që përfitoi nga 2 milionët

Aktuale October 21, 2020 - 22:57

Famir Limaj, kryetari i Nismës Socialdemokrate, ka folur rreth asaj që është publikuar në media se vajza e të dyshuarit, pronarit të firmës “LDA Group” për 2 milionë eurot që u transferuan nga Thesari i Shtetit, është këshilltare e Albulena Bala-Halimit, zëvendëskryeministres së parë.

Limaj ka thënë se vajza e personit në fjalë nuk duhet të përfshihet në këtë ngjarje dhe e konsideron joprofesionale nga mediat, publikimin e një fotografie ku shihet Kadri Shala me Fatmir Limajn dhe vajzën e tij, Hajrie Shalën.

“Çka ka lidhje kjo? Ai është një aktivist që ka votuar Nismën që ka qenë aty. Krejt e padrejtë është që vajzën me vu aty me një rreth, është krejt joprofesionale. Po dalim në atë që thamë se po ka një tendencë, vajza ndoshta nuk ka asnjë lidhje me veprimin që është bërë”.

“Kjo është joprofesionale me kthye këtë për klikime, në fund ajo nuk ka asnjë përgjegjësi. Tani sa fotografinë e bëjmë ne ka njerëz që janë në burg”.

Limaj ka treguar se si e bëjnë ata përzgjedhjen e këshilltares së zëvendëskryeministres.

“Ne kemi disa kritere siç i bëjnë edhe partitë tjera, vajza për të cilën po flas është duke doktoruar në psikologji. Është zonjë aktiviste ne promovimin e gjinisë femërore, është e martuar është nënë e fëmijëve. Plus ai tani që pash në fotografi nuk ka punuar asnjëherë në shtet”.

“Jemi në ditën e parë sot kemi informacione e para. Unë jam viktimë i këtyre sendeve mua mu kanë futur 100 policë në shtëpi pa urdhër gjyqësor”.

“Tema është se a ka hyrë sot diçka në sistem, a ka diçka përtej kësaj, a ka diçka të planifikuar, lejani këtë punë drejtësisë”.

“Nëse kjo grua nuk një të kaluar që e ka shkel ligjin, e ka profesionin e saj, ka sukses në profesionin e saj pse mos të jetë këshilltare”.

“Me hy tek ajo se çka mundet me ndodh më tej nuk janë partitë politike që munden me përcaktua atë se çka mundet të ndodh në të ardhmen”, ka thënë Limaj.

Sipas tij, nuk duhet dhënë ngjyrime partiake rastit. Ai tha se secili që kryen krime duhet të dalë para drejtësisë.

“Mos të ngutemi, le t’u mbetet hetimeve. Ka pasur raste kur mjetet janë hedhur diku tjetër se ka pasur gabime teknike. Hetimet s’duhet të bëhen nëpër studio. Ministrja Hykmete Bajrami nga detyra e vet zyrtare e ka bërë detyrën e informimit publik. Është hap i drejtë. Nëse ka ndodh vjedhja, ka vepër penale. Nëse gabimi ka qenë njerëzor, nuk duhet të merret si gabim trashanik. Ministrja duhet t’u drejtohet organeve dhe t’ua japë mundësinë të shkohet tek e vërteta”, tha Limaj.