Prishtinë. Në një konferencë të mbajtur të martën për shtyp, Aleanca për Ardhmërinë e Kosovës ka vazhduar akuzat ndaj Qeverisë. Ata thanë se në vazhdën e dëmeve që po i shkakton popullit, Qeveria e Kosovës ka dëmtuar gjatë këtij muaji (gusht 2010) edhe me 706 mijë euro popullin dhe kjo vetëm përmes një tenderi, atë të targave të reja për veturat.

Për më tepër, kjo është hera e pestë me radhë që është shpallur tenderi për targat e e reja të veturave dhe e gjithë kjo procedurë është përcjellë me dyshime të mëdha për korrupsion.

“Ministria e Punëve të Brendshme ka shkelur Ligjin e Prokurimit Publik në mënyrë drastike, duke vendosur të shpallë fitues të tenderit të targave një kompani e cila ka qenë shumë më e shtrenjtë se shumë konkurentët tjerë në këtë tender”.

“Nga 10 (dhjetë) kompani sa kanë aplikuar në këtë tender, gjashtë (6) kompani kanë qenë më të lira se kompania fituese”, kanë thënë zyrtarë të AAK-së në një konferencë të mbajtur për shtyp të martën.

Pra, sipas AAK-së, MPB i ka marrë nga xhepat e varfër të popullit të Kosovës “706 mijë euro më shumë” se sa që është dashur.

“Prandaj, AAK kërkon që të ketë rivlerësim në të gjitha procedurat, Prokuroria vendore dhe ajo e EULEX-it të merren menjëherë dhe seriozisht me këtë rast të dëmtimit të buxhetit të Kosovës dhe shkeljes së Ligjit për Prokurimin Publik, Ministri i Punëve të Brendshme të suspendojë menjëherë të gjithë zyrtarët e përfshirë në këtë procedurë, ose në të kundërtën Kryeministri i Kosovës të shkarkojë Ministrin e Punëve të Brendshme për lejim të dëmtimit të buxhetit të Kosovës”, u tha në konferencën e mbajtur të martën.