Prishtinë. Partia Demokratike e Kosovës dhe Lidhja Demokratike e Kosovës janë dy partitë politike më të papërgjegjshme në Kosovë. Kështu ka vlerësuar raporti i publikuar nga Komisioni Zgjedhor për Ankesa dhe Parashtresa (KZAP) për periudhën tetor 2009 – korrik 2010. Sipas këtij raporti, dy partitë më të mëdha në vend ende nuk i kanë paguar gjobat e shqiptuara nga KZAP-i. Në këtë raportin e këtij komisioni thuhet se ky institucion ka proceduar në Prokurorinë e Shtetit 89 lëndë që kanë të bëjnë me shkeljet ligjore gjatë zgjedhjeve. Ndërkaq, 9 personave u është ndaluar pjesëmarrja në zgjedhjet e ardhshme për shkak të parregullsive

Shefi i Sekretariatit të KZAP-it, Mul Desku tha se preokupim i këtij institucioni mbeten borxhet e pashlyera të subjekteve politike dhe procedimi i 89 lëndëve në Prokurorinë e Shtetit.

“Nga 29 subjekte politike sa u janë shqiptuar gjoba, AAK, AKR dhe LDD kanë arritur t’i shlyejnë gjobat në total. Ndërkaq PDK –së i kanë mbetur 20 mijë e 500 euro dhe LDK-së 14 mijë e 700 euro të cilësuar si borxhet më të mëdha të pashlyera. Më pas vjen Partia Liberale e Kosovës 4 mijë e 800 euro dhe subjekte të tjera dhe kandidat të pavarur”, tha ai.

“Në Prokurorinë e Shtetit janë dorëzuar rreth 90 raste të cilat kanë të bëjnë me rastet e përgjegjësive individuale gjatë procesit zgjedhor që janë të ndëshkueshme me Kodin Penal të Kosovës”, ka bërë të ditur ai.

Desku ka bërë të ditur se paneli i KZAP-it ka mbajtur gjithsejtë 29 seanca dhe ka shqyrtuar 544 ankesa dhe lidhur me këto ankesa ka marrë vendime meritore. “ KZAP ka konstatuar si ankesa të pabazuara gjithsej 429 sosh, ndërsa ankesa që rezultuan në gjoba gjithsej 64, ankesa që rezultuan në rivotim gjithsej 42 dhe ankesa që rezultuan në rinumërim/anulim gjithsej 9”, tha ai. Për më tepër ai tha se sipas shënimeve dhe informatave zyrtare aktualisht në Gjykatën Supreme të Kosovës janë ushtruar, paraqitur 25 padi, lidhur me zgjedhjet lokale 2009-2010.

Nga ana tjetër gjatë tërë ditës “Zëri” ka insistuar ta marrë në telefon kryeprokurorin e shtetit Ismet Kabashi, mirëpo ai nuk është përgjigjur në telefonin e tij.

Personat të cilëve u është ndaluar pjesëmarrja në zgjedhje për një periudhë të caktuar kohore janë: Qerim Gara, i ndalohet për dy vjet pjesëmarrja në zgjedhje- subjekti politik BDA; Bekim Gara, i ndalohet për dy vjet pjesëmarrja në zgjedhje - subjekti politik BDA; Bajram Gashi, i ndalohet pjesëmarrja në zgjedhje për katër vjet - subjekti politik PDK; Avni Gashi, gjashtë vjet nuk ka drejtë pjesëmarrjeje në zgjedhje- subjekti politik PDK; Xhelal Krasniqi katër vite i ndalohet kandidimi në zgjedhje dhe gjashtë vjet pjesëmarrja aktive në zgjedhje - subjekti politik LDK; Valon Dalipi, dy vjet pjesëmarrja aktive në zgjedhje; Jakup Sfarça tre vjet i ndalohet kandidimi në zgjedhje dhe gjashtë vjet pjesëmarrja aktive në zgjedhje- subjekti politik LDK; Jeton Sfarça tre vjet i ndalohet kandidimi në zgjedhje dhe gjashtë vjet pjesëmarrja aktive në zgjedhje- subjekti politik LDK; Shaban Sfarça tre vjet i ndalohet kandidimi në zgjedhje dhe gjashtë vjet pjesëmarrja aktive në zgjedhje - subjekti politik LDK.