Prishtinë. Nga rezoluta serbe, e cila i bën thirrje Asamblesë së Përgjithshme të OKB-së të kërkojë negociata për statusin e Kosovës, në Nju-Jork mund të miratohet vetëm një deklaratë politike, e cila do t’i ftonte Prishtinën dhe Beogradin t’i nisin bisedimet, por jo për statusin. Burime nga qendrat politike në Prishtinë si edhe analistë politikë presin që Asambleja e Përgjithshme mund t’u kërkojë Prishtinës dhe Beogradit që në një datë të caktuar t’i dërgojnë delegacionet e tyre në Bruksel, edhe atë në një nivel mjaft të lartë politik, që t’i nisin kështu bisedimet ndërshtetërore. Temat kryesore që do t’i dominonin bisedimet e tilla, thuhet se janë agjenda evropiane e të dyja vendeve, që nënkupton bashkëpunimin ndërshtetëror në procesin integrues, si dhe çështjet që kanë të bëjnë me komunitetin serb në Kosovë dhe trashëgiminë e tyre kulturore-fetare.

Mundësinë e dështimit të rezolutës serbe dhe miratimit të një deklarate politike që bën thirrje për fillimin e bisedimeve Kosovë – Serbi, e sheh si reale, analisti Driton Lajçi.

Ai thotë se të gjitha opsionet lidhur me këtë rezolutë janë ende të hapura, ndonëse nuk e përjashton mundësinë që Serbia ta tërheqë këtë rezolutë dhe në vend të saj Asambleja e Përgjithshme të nxjerrë një deklaratë, me të cilën do të ftoheshin Serbia dhe Kosova që të fillojnë bisedimet në Bruksel.

Mirëpo, në çdo variant të mundshëm, një rezolutë e tillë, qoftë edhe e miratuar eventualisht në Nju-Jork, megjithatë nuk do të ishte obligative për Kosovën, vlerëson analisti Driton Lajçi.

“Në aspektin formal, rezoluta nuk e obligon Kosovën, sepse ajo do të jetë version politik. Por, ajo do t’u hyjë në favor qendrave të vendosjes, Uashingtonit e Brukselit, që të procedojnë me hapat e mëtejmë në drejtim të afrisë ndërmjet Prishtinës dhe Beogradit", thotë Lajçi.

“E dyta, rezoluta nuk ka mundësi, nuk ka fuqi e as efekt që ta anulojë, ta shtrembërojë apo ta ndryshojë mendimin e GJND-së”, vlerëson Lajçi.

Ndërsa po vazhdon trysnia ndërkombëtare mbi Beogradin zyrtar që të heqë dorë nga rezoluta e iniciuar për Kosovën në Asamblenë e Përgjithshme, presidenti serb Boris Tadiq ka dhënë edhe shenjat e para të fleksibilitetit dhe kompromisit. Por, për autoritetet në Prishtinë paralajmërimet e presidentit serb, Boris Tadiq, për gatishmërinë e tij rreth disa kompromiseve në raport me Kosovën, nuk e ndryshojnë pozicionin e Serbisë dhe e ftojnë Tadiqin që ta njohë mendimin e GJND-së dhe të shprehë gatishmërinë për relaksimin e marrëdhënieve ndërshtetërore me Republikën e Kosovës.

Zëdhënësi i presidentit të Kosovës, Xhavit Beqiri, thotë se nuk ka nevojë për rezolutë serbe në Asamblenë e Përgjithshme, sidomos tash kur Gjykata Ndërkombëtare e Drejtësisë edhe një herë e konfirmoi fuqishëm validitetin e legjitimitetit të pavarësisë së Kosovës.

“Kështu që Tadiqi bashkë me qeverinë do të ishte mirë që të mendonte për normalizimin e marrëdhënieve ndërmjet dy shteteve sovrane dhe dy shteteve fqinje”, thotë Beqiri.

Edhe Qeverisë së Kosovës nuk ia kanë “thyer” mendjen deklaratat e presidentit Tadiq, se Beogradi do të zhvillojë bisedime me fuqitë perëndimore rreth rezolutës.

“Janë dy çështje që ne kërkojmë në raport me Rezolutën. E para, që të tërhiqet projektrezoluta e Serbisë dhe e dyta, që eventualisht Rezoluta që do të miratohej nga Asambleja e Përgjithshme në çdo rast të reflektojë vullnetin e qytetarëve të Kosovës dhe mendimin e GJND-së”, ka thënë Kuçi.

Sipas tij, Kosova dhe aleatët e saj nuk mund të hyjnë në kurrfarë kompromisi në raport me këtë rezolutë. “Kompromisi më pak sesa një rezolutë, që ka shprehur vullnetin e qytetarëve të Kosovës dhe mendimin e GJND-së për pavarësi, nuk mund të ekzistojë”, ka thënë Kuçi.

Ndërkohë, edhe opozita nuk sheh ndonjë ndryshim në pozicionin e Serbisë karshi Kosovës, por deklaratat e presidentit Tadiq më shumë i sheh si taktizime dhe përpjekje për të përfituar politikisht në raportet e dëmtuara të këtij vendi me Bashkimin Evropian.

Anëtari i Kryesisë së Aleancës për Ardhmërinë e Kosovës, Avni Arifi thotë se Kosova tashmë i ka bërë kompromiset e veta dhe ato mund të lexohen në Pakon e Ahtisarit.

“Ne besojmë se koha e kompromiseve dhe e marrëveshjeve ka kaluar me Pakon e Ahtisarit, gjë që është konfirmuar tashmë edhe me mendimin e GJND-së. Rezoluta të tilla nuk e ndihmojnë Serbinë, e as paqen në rajon, përkundrazi”, thekson Arifi.

Që nga paraqitja e nismës për rezolutën serbe në Asamblenë e Përgjithshme, Serbinë e kanë vizituar diplomatë perëndimorë në përpjekje që ta bindin këtë vend që të heqë dorë, apo të paktën ta modifikojë projektrezolutën, e cila shihet edhe si anashkalim i mendimit të GJND-së.