Prishtinë. Mesi i shtatorit pritet të jetë koha kur edhe do të fillojë punën grupi për reformën zgjedhore. Kështu kanë konfirmuar anëtarë të këtij grupi, sipas të cilëve në mbledhjen e këtij grupi do të diskutohet për çështjet e identifikuara për ndryshime eventuale në Ligjin për zgjedhje.

Kryesuesja e Grupit punues për reformën zgjedhore, Valdete Daka, ka bërë të ditur se ky grup do të mblidhet më 14 shtator. “Ne, në këtë grup jemi mbledhur për t’i bërë ndryshimet dhe nuk besoj që do të ketë konsensus në ndryshime”, tha ajo. Daka shprehet e bindur se grupi punues do të merret vesh për ndryshimet.

“Ne e kemi një afat orientues se kur do të përfundojë reforma zgjedhore. Është dëshirë e të gjithëve që kjo çështje të rregullohet në tetor dhe nëntor, pasi që janë identifikuar çështjet më të ndjeshme ku janë parë pengesat në zgjedhjet e fundit lokale”, tha Daka.

Nga ana tjetër, përfaqësuesi i PDK-së në Grupin punues, Hajredin Kuçi, është shprehur optimist se deri në fund të muajit shkurt 2010 në Kuvendin e Kosovës do të arrijë drafti i ligjit të ri të zgjedhjeve. “Ne do të përpiqemi që si grup të kemi konsensus në ndryshimet që janë identifikuar”, tha Kuçi, duke shtuar se në rast se nuk do të ketë konsensus, atëherë koalicioni do të tentojë të sigurojë dy të tretat e votave të deputetëve, të nevojshme për të miratuar këtë ligj.

Anëtari tjetër i këtij grupi nga radhët e AKR-së, Ibrahim Makolli, tha se nga mbledhja e fundit e këtij grupi ka mbetur që t’i identifikohen pikat dhe të hartohet një agjendë ku do të shihet se në cilat pika do të fokusohet grupi.

“Janë identifikuar 4-5 çështje në të cilat grupi punues do të fokusohet dhe të hartojë një propozim të pranueshëm edhe me çështjet ndërkombëtare por edhe me realitetin në Kosovë”, tha Makolli. Ai ka thënë se pavarësisht cili do të jetë përfundimi i Grupit punues, çdo përfundim duhet t’i dorëzohet Kuvendit të Kosovës që ky i fundit t’i miratojë ndryshimet.

“Pritet që edhe në Kuvend të ketë debat rreth kësaj çështjeje, por jam i bindur se duke e kuptuar rëndësinë që ka sistemi zgjedhor në përgjithësi, duhet që bashkëpunimi në Grupin punues të ketë konsensus. Por, jo vetëm konsensus të brendshëm të grupit punues por edhe të grupeve tjera të interesit, sepse kodi elektoral dhe sistemi zgjedhor nuk u takojnë vetëm subjekteve që janë të përfaqësuara në Kuvend, por gjithë shoqërisë kosovare”, tha Makolli.

Ndryshe, ky grup ka në dispozicion fare pak kohë për të bërë ndryshimet e Ligjit

për zgjedhje. Në fund të tetorit, eventualisht në gjysmën e parë të nëntorit grupi punues duhet t’i përfundojë obligimet e veta e që më pas atë propozim t’ia dërgojë Kuvendit të Kosovës për miratim. Ndërkaq, fillimi i vitit 2011 është afati i fundit që reforma zgjedhore të miratohet në Kuvendin e Kosovës, për shkak se në vjeshtën e vitit 2011 pritet të mbahen zgjedhjet parlamentare.