Prishtinë. Ministri e Punëve të Jashtme ka më shumë se një muaj që po e mban në “sirtar” raportin e vlerësimit të performancës së stafit diplomatik të Kosovës, duke mos informuar as Kuvendin e as Qeverinë për punën dyvjeçare të ambasadorëve. Madje, vetë ligjvënësit kosovarë që vijnë nga tabori i opozitës, kanë vërejtje të theksuar në këtë dikaster qeveritar, për të cilin mendojnë se funksionon krejtësisht i mbyllur.

Gazeta është munduar për dy ditë të kontaktojë Ministrinë e Punëve të Jashtme në lidhje me mospublikimin e raportit për vlerësimin e preformacës së ambasadorëve, por nuk ka pasur sukses.

Vlora Çitaku, zëvendësministrja e Punëve të Jashtme, një muaj më parë ka thënë për “Zërin” se komisioni i formuar nga MPJ për vlerësimin e punës së diplomatëve të Kosovës, ka përfunduar raportin dhe se tani, siç ka thënë ajo, është radha e ministrit të MPJ-së, Presidentit dhe Kryeministrit që të vendosin rreth stafit diplomatik.

Qeveria e Kosovës, respektivisht Kryeministria, nuk ka dijeni për këtë raport të MPJ-së.

“Nuk e di që është bërë vlerësimi i ambasadorëve. Me këtë merret MPJ”, tha për “Zërin” Hajredin Kuçi, zëvendëskryeministër i Kosovës.

Edhe Komisioni parlamentar për Punë të Jashtme në Kuvend, i cili ka pritur këtë raport tash sa kohë nuk ka marrë asgjë akoma.

“Nuk kemi marrë kurrfarë raporti për vlerësimin e punës së diplomatëve të Kosovës dhe ambasadorëve jashtë vendit. Në Komision për punë të jashtme nuk ka ardhur asgjë, edhe pse do të duhej që të vinte menjëhrë pasi që të bëhet vlerësimi”, tha Ibrahim Gashi, anëtari i këtij komisioni. Deputeti Gashi mendon se ka hapësirë të konsiderueshme për rishikimin e misionit diplomatik të Kosovës e në veçanti të ambasadorëve.

“Ne kemi vërejte edhe në mospërmbushjen e obligimeve të MPJ-së ndaj shërbimit diplomatik dhe konsullor dhe këto vërejte ndoshta do t’i ngremë në mbledhjen e parë të komisionit që do të mbajmë”, tha Gashi.

Edhe deputetët e tjerë nga radhët e opozitës akuzojnë për vonesën e këtij raporti, po ashtu edhe për vonesat e tjera të raporteve që kanë të bëjnë me Kosovën.

“Së pari emërimi i ambasadorëve në vendet që janë të vendosur është bërë me vonesë dhe po ashtu nuk janë plotësuar kushtet e atyre që ata të akomodohen si duhet. Dhe ende nuk kemi një raport, i cili do të vlerësohej edhe nga ana institucionale që të kemi një vlerësim të qartë të punës së tyre”, tha Ahmet Isufi, nënkryetar i Aleancës për Ardhmërinë e Kosovës.

Ndryshe, përveç opozitës parlamentare edhe shoqëria civile ka pasur vërejtje në përzgjedhjen e ambasadorëve. Madje është kritikuar koalicioni qeverisës se në përzgjedhjen e ambasadorëve nuk ka dominuar konkurrenca e vlerës, por përcaktimi politik.

Ndryshe “Zëri” ka raportuar ditë më parë se ambasadori i Kosovës në Slloveni, Anton Berisha ka lënë shumë “njolla” në Kosovë para se të shkojë me mision jashtë vendit. Ai ka shkuar pa dhënë llogari për mosarkëtimin e 16.2 milionë eurove nga operatori “Cosmocell”, ndonëse çeku i këtij operatori ende ruhet në një vend të sigurisë së lartë prej vitit 2007 në Autoritetin Rregullativ të Telekomunikacionit, institucion në të cilin Berisha ka qenë kryetar bordi.