Prishtinë. Njëzet vjet pas bishtnimit të të gjitha kontrolleve të rrepta policore dhe takimit fshehurazi në Kaçanik për të miratuar Kushtetutën e Republikës së Kosovës, e cila konsiderohet si themeltare e shtetësisë dhe pavarësisë së Kosovës, ish-deputetët e asaj kohe konsiderojnë se 7 Shtatori i lënë jashtë kalendarit të festave shtetërore, e meriton të kremtohet të paktën si jubile.

Ish-nënkryetari i Kuvendit të Kosovës, të vitit 1990, Ilaz Ramajli mendon se ky është një rast i mirë për ta përkujtuar këtë datë të rëndësishme në historinë më të re të Kosovës.

Sado që prej atëherë kanë kaluar 20 vjet, ndërkohë që kanë ndodhur shumë ngjarje të rëndësishme deri te pavarësia e Kosovës, Ramajli beson se Kushtetuta e Republikës së Kosovës së 7 Shtatorit të vitit 1990, së bashku me Deklaratën Kushtetuese të 2 Korrikut, përbëjnë një ndër shtyllat kryesore të bërjes së Kosovës shtet sovran dhe të pavarur.

“Kushtetuta e Kaçanikut ka mundësuar me amendamentet e saj, që të vihen themelet e shtetit të Kosovës për aq sa ka qenë e mundur në atë kohë”, thekson ai. Ramajli mendon se rëndësia historike e Kushtetutës së Kaçanikut ka një rol, i cili nuk mund të mohohet nga askush.

“Është fakt që nuk është aplikuar në praktikë në tërësinë e saj për shkak të situatës dhe për shkak të pushtimit të Kosovës, por nuk ka dyshim që esencialisht ka ndikuar në jetën e qytetarëve të Kosovës dhe në rrjedhën e ngjarjeve historike deri më sot”, konstaton Ramajli.

Ai beson se 7 Shtatori e ka merituar të hyjë në kalendarin e festave shtetërore. “Megjithatë, nuk u bë ajo punë. Këto data nuk janë vetëm të delegatëve që morën pjesë në nxjerrjen e tyre, janë data të cilat nuk i harron populli i Kosovës”, thotë ai. Ramajli është i vetëdijshëm se për çdo vit nuk mund të shënohen gjithë datat historike që kemi, por mendon se kjo do të duhej të bëhej së paku me rastin e jubileve.

“Gjithë delegatët kemi pritur që kjo datë të paktën do të shënohet nga institucionet”, thotë ai. Ndërkaq, kryetari i Parlamentit të Kosovës, Jakup Krasniqi thotë se pas Deklaratës së Pavarësisë, Kushtetuta e Kaçanikut e 7 Shtatorit është një përpjekje e strukturave të atëhershme, të legjislaturës së autonomisë së Kosovës për të bërë një akt juridik, që i legjitimon përpjekjet e popullit shqiptar për liri dhe pavarësi.

Krasniqi ka një opinion tjetër nga ai i Ramjalit sa i përket faktit që 7 Shtatori është lënë jashtë kalendarit të festave shtetërore.

“Jo, çdo përpjekje e popullit tonë për liri dhe pavarësi, ka edhe shumë ngjarje që janë më të rëndësishme, më substanciale dhe kanë prodhuar realitet të ri në Kosovë dhe nuk e kanë gjetur vendin e tyre. Mendoj se 7 Shtatori është një datë e rëndësishme e përpjekjeve të popullit shqiptar, por nuk përbën ndonjë substancë të fuqishme dhe nuk ka krijuar ndonjë realitet të ri”, vlerëson Krasniqi.

Sado që kjo datë, sipas tij, është një përpjekje që meriton të përkujtohet, Krasniqi thotë se nuk është organizuar ndonjë manifestim pasi që ajo nuk është e ndonjë rëndësie të veçantë.