Presidenti i AKR-së Behgjet Pacolli, po qëndron në Nju Jork, ku me intensitet të shtuar po vazhdon aktivitetin e tij lobues gjatë takimeve me përfaqësues të Kombeve të Bashkuara, veçanërisht me përfaqësues të vendeve që do të votojnë me 9 shtator gjatë punimeve të OKB-së.

Presidenti i AKR-së, Behgjet Pacolli, në kuadër të kësaj vizite, në Nju Jork ka shtruar një darkë miqësore ku kanë qenë të ftuar përfaqësuesit më të lartë të shumë shteteve. Ndër ta Ministri i Punëve të Jashtme të Maldiveve bashkë me delegacionin e tij, Ambasadorët e Timorit Lindor, Grenada, Bangladesh, Azerbajxhan, Jemen, Republikës Dominikane, Indonezisë, Bruneit dhe Kazakistanit. Në darkë kanë qenë prezent edhe përfaqësues të medieve nga Kosova.

Gjatë darkës, Pacolli ka mbajtur një fjalim për të pranishmit, duke iu drejtuar atyre fakte të reja për zhvillime demokratike në Kosovën e pavarur dhe sovrane. Ai ka kërkuar drejtpërsëdrejti nga përfaqësuesit e shteteve që kanë qenë prezentë në këtë darkë, që të votojnë kundër rezolutës së propozuar nga Serbia në këtë sesion të AP të OKB. Presidenti i AKR-së, Pacolli, ka marrë një sërë konfirmimesh nga këto vende se ato do ta mbështesin fuqishëm Kosovën duke dhënë kontributin e tyre veçanërisht për këtë çështje.

Të mërkurën, Pacolli zhvillon disa takime me Ministra të punëve të Jashtme dhe Ambasador të Kombeve të Bashkuara si dhe me Kryesitë e Ambasadave në Kombet e Bashkuara në Nju Jork.

Presidenti i AKR-së, Behgjet Pacolli do të ketë takime të veçanta me disa përfaqësues të shteteve ku do të kërkon mbështetjen e tyre për Kosovën, për të kundërshtuar rezolutën serbe.

Presidenti i AKR-së, Pacolli do të vazhdoj takime edhe me përfaqësues të vendeve të cilat ende nuk e kanë njohur pavarësinë e Kosovë, nga të cilat do të kërkoj që sa më shpejtë të fillojnë me procedurat formale të njohjes së Pavarësisë së Kosovës.

Pacolli ka themeluar një zyre të plotë pune në “New York Millenium” në Plaza Hotel ku janë vendosur Shtabi i tij dhe një grup i madh i lobistëve të cilët do të punojnë bashkë me Pacolli në Nju Jork.

Në ditët e ardhshme Pacolli do të vazhdoj përkushtimin e tij në kuadër të fushatës lobuese për Kosovën, duke dhënë informacione dhe argumete të shumta se Kosova po zhvillohet shpejtë si shtet i pavarur sovran dhe demokratik.