Zveçan. Në kuvendin e zgjeruar të të ashtuquajturës “Bashkësi e komunave dhe lokaliteteve serbe të Kosovës” të mbajtur të martën në Zveçan, delegatët e kësaj bashkësie kanë aprovuar deklaratën në mbrojtje të Kosovës si pjesë të pandashme të Republikës së Serbisë.

Në këtë deklaratë thuhet se serbët e Kosovës janë qytetarë dhe shtetas të Republikës së Serbisë dhe se asnjë akt i dhunshëm nuk mund të ndryshojë këtë fakt historik e Kushtetutës të Republikës së Serbisë.

“Në luftën e Serbisë për ruajtjen e Kosovës si pjesë përbërësë të saj, ky është një realitet në të cilin shteti serb duhet të mbështetet”, thuhet mes tjerash në këtë deklaratë. Delegatet e kësaj mbledhjeje kanë ftuar Kishën ortodokse serbe që të refuzoj idenë e eksterritorialitetit të manastireve, kishave dhe të trashëgimisë tjetër shpirtërore të popullit serb.

Kuvendi ka ftuar edhe organet shtetërore të Serbisë që në asnjë mënyrë të mos marrin obligime të imponuara nga shtetet të cilat me çdo kusht po punojnë në përfundimin e strategjisë së Kosovës së pavarur.

Në deklaratë thuhet se serbët në Kosovë janë të gatshëm të luftojnë për shtetin e tyre Serbinë, por që edhe ajo duhet të jetë e gatshme ta bëjë të njëjtën gjë për ta ruajtur Kosovën nëm sovranitetin e saj.