Nga programet zgjedhore të partive politike është hequr vetëm fjala “pavarësi”, ndërsa zhvillimi ekonomik, hapja e vendeve të reja të punës, mirëqenia sociale dhe integrimi i vendit në mekanizmat ndërkombëtarë kanë mbetur fjalë të të njëjtit zhargon politik që të proklamojnë partitë në zgjedhjet e jashtëzakonshme parlamentare.

Për dhjetë ditë rresht, sa do të zgjasë fushata parazgjedhore e partive politike, qytetarët duket se nuk do të dëgjojnë asnjë ofertë të re, përjashtuar qëndrimin e dy subjekteve të reja politike, Fryma e Re (FER) dhe “Vetëvendosje”, të cilat premtojnë se kanë një qasje ndryshe nga këto të deritashmet.

Kështu, pavarësisht kritikave dhe kundërkritikave në mes të partive opozitare dhe atyre qeveritare për rreth tri vjet sa ka “jetuar” ish-qeveria e Kosovës, partitë e “mëdha” nuk do të dallojnë shumë gjatë fushatës parazgjedhore.

Nënkryetari i Partisë Demokratike të Kosovës (PDK), Bajram Rexhepi, thotë se partia e tij nuk ka se çka të ndryshojë nga platforma zgjedhore e zgjedhjeve të kaluara, ngase sipas tij, të njëjtat gjëra që janë premtuar para tre vjetëve duhet të realizohen pas përfundimit të zgjedhjeve të 13 dhjetorit.

“Ne vetëm duhet t’i implementojmë ato që i kemi pasur në kampanjën e vitit 2007, sundimi i rendit dhe ligjit, zhvillimi ekonomik, krijimi i një ambienti më të mirë për biznes, punësimet, gjendja socio-ekonomike”, tregon Rexhepi për pikat që do t’i “godasin” drejtuesit e PDK-së gjatë fushatës parazgjedhore.

Ai thotë se PDK e ka pasur një program të mirë qeverisës me të cilin ka filluar të punojë, i cili sipas tij do të vazhdojë të jetësohet gjatë qeverisë së ardhshme.

Edhe elektorati i partive opozitare nuk do të “ketë fat” të dëgjojë fjalor të ndryshëm nga ai i dy ish-partnerëve të koalicionit, PDK-së dhe LDK-së.

Nënkryetari i partisë më të zhurmshme opozitare, Aleanca për Ardhmërinë e Kosovës (AAK), Ahmet Isufi, thotë se ngritja e ekonomisë, krijimi i vendeve të reja të punës, përmirësimi i mirëqenies sociale dhe integrimi i vendit përbën fjalorin e tyre elektoral.

“AAK-ja në programin e saj fokusohet në zhvillimin ekonomik të vendit dhe për integrimin e Kosovës në mekanizmat ndërkombëtarë, siç janë NATO-ja dhe Bashkimi Evropian”, thotë Isufi.

Edhe “elektorati dardan” do të dëgjojë afërsisht premtime të njëjta me ato të partive tjera. Nënkryetari i Lidhjes Demokratike të Dardanisë (LDD), Naser Rugova, thotë se partia e tij e ka hartuar një plan qeverisës, i cili fokusohet në ringjalljen e ekonomisë, përmirësimin e mirëqenies sociale si dhe ngritjen e cilësisë në shëndetësi e arsim.

“Prioritetet e LDD-së do të jenë rimëkëmbja e ekonomike e vendit, ngritja e cilësisë së arsimit, zhvillimi i bujqësisë, prodhimeve vendore dhe agrobiznesit si dhe si finale, interesimi i vendit në Bashkimin Evropian”, thotë Rugova.

Gjatë fushatës parazgjedhore të njëjtat premtime do t’i ofrojnë edhe drejtuesit e Aleancës Kosova e Re (AKR). Nënkryetarja e kësaj partie, Mimoza Kusari-Lila, thotë se forcimi ekonomik i vendit, përmirësimi i mirëqenies së qytetarit, shtrirja e sovranitetit të institucioneve në tërë territorin e vendit dhe integrimi i Kosovës në organizata ndërkombëtare do t’i premtohen qytetarit gjatë fushatës.

Ajo thotë se shpallja e pavarësisë ka qenë hap shumë i rëndësishëm, por tani sipas saj, pavarësia duhet të funksionalizohet.

Por, themeluesit e dy subjekteve më të reja në vend, “Vetëvendosjes” dhe Frymës së Re, thonë se programi i tyre është tërësisht i ndryshëm nga ai i partive tjera, ndërsa tërheqin vërejtjen se partitë që nuk i kanë përmbushur premtimet e mëhershme nuk kanë të drejtë t’i premtojnë përsëri ato.

Themeluesi i FER-it, Shpend Ahmeti, thotë se krijimi i parakushteve për hapjen e vendeve të punës dhe lufta kundër korrupsionit dhe krimit të organizuar përbënë dy pikat kryesore të programit të partisë më të re. Ai insiston se FER-i do të ketë program tërësisht të ndryshëm nga partitë tjera. “Ne do të tregojmë konkretisht se sa vende të punës do t’i krijojmë”, thotë ai.

Ndërkaq, Glauk Konjufca nga “Vetëvendosje”, thotë se udhëheqësit e këtij subjekti politik do t'i zgjidhin dy probleme themelore me të cilat po përballet qytetari i Kosovës, ndërtimin e shtetit dhe zhvillimin e vendit.

“Shtetndërtimin ne e shohim si konsolidim të shtetit sovran, instalim të demokracisë, funksionalizim të drejtësisë dhe fuqizim të qytetarisë. Kurse zhvillimin ekonomiko-shoqëror e shohim si mbështetje të prodhimit, riorganizim të politikave fiskale dhe rialokim më të drejtë të buxhetit, subvencionim të bujqësisë, ngritje të cilësisë së arsimit e shëndetit publik, si dhe gjallërimin e kulturës”, thotë ai.

Megjithatë, analistët e pavarur mendojnë se partitë politike janë bërë “bajat” duke prezantuar programe para elektoratit, e duke i harruar ato më pas.

“Programet dhe mënyra qeverisëse e parive politike nuk i përshtatet kampanjave në raport me votuesin. Programet janë shndërruar vetëm në funksion elektoral, nuk janë shndërruar në program qeverisës, sepse qeverisja nuk ndodhë nga institucionet e Kosovës, por nga faktorë të ndryshëm ndërkombëtarë”, thotë analisti Avni Zogiani.

Ndërsa analisti Krenar Gashi thotë se partitë politike duhet t’i qasen seriozisht këtyre zgjedhjeve dhe në programin e tyre të fusin zhvillimin ekonomik, dhe jo këtë segment ta përmendin vetëm sa për “sy e faqe”.

“Në këto zgjedhje, sidomos me hyrjen në garë të dy forcave të reja politike ‘Vetëvendosjes’ dhe FER-it gara do të përqendrohet në programe politike e veçanërisht sa i përket shërbimeve ekonomike dhe përmirësimit të gjendjes sociale në Kosovë”, thotë ai.

LDK-ja pret edhe pak

Sekretari i përgjithshëm i Lidhjes Demokratike të Kosovës, Ramë Manaj, thotë se kjo parti ende nuk e ka bërë të ditur platformën zgjedhore, prandaj sipas tij, nuk mund të publikohet.

“Është pak e parakohshme ta themi se cilat do të jenë pikat në të cilat ne do ta mbështesim fushatën. Ne jemi në përgatitje të platformës zgjedhore dhe paralel me përfundimin e këtyre zgjedhjeve në parti, menjëherë do të dalim në opinion me platformën tonë zgjedhore”, thotë Manaj.