Partitë politike dhe nismat qytetare që përbejnë “koloritin” politik kosovar, e konsiderojnë të mjaftueshme periudhën prej dhjetë ditësh për të bërë fushatë zgjedhore për zgjedhjet e jashtëzakonshme të dhjetorit.

Disa subjekte shprehen skeptikë se do të arrijnë që brenda dhjetë ditësh të shpalosin gjithë programin e tyre, ndërsa disa subjekte të tjera e konsiderojnë “ideale” fushatë 10- ditëshe, për faktin se redukton shpenzimet e buxhetit të Kosovës në minimum.

Nënkryetari i Partisë Demokratike të Kosovës (PDK), Hajredin Kuçi, tha se partia e tij do ta respektojë ligjin. “Dhjetë ditë i mjaftojnë PDK-së për të shfletuar platformën e saj para elektoratit dhe të gjithë qytetarëve të Kosovës. Megjithatë meqenëse ligji e parasheh dhjetë ditë fushatë, ne si PDK do ta respektojmë ligjin”, ka thënë Kuçi.

Fatmir Rexhepi nga LDK tha se fushata zgjedhore mjafton për të prezantuar programin e LDK-së, i cili, sipas tij, tashmë është i njohur për qytetarët. “Besoj që në kuvendin e LDK-së më 7 nëntor do të zgjidhen strukturat drejtuese të cilat pastaj në kohën e mbetur do të jenë ato të cilat do të promovojnë politikën programore dhe politikën qeverisëse dhe objektivat tjera kryesore me anë të të cilave do të kërkohet besimi i qytetarëve”, tha Rexhepi.

Zëvendëspresidentja e AKR-së, Mimoza Kusari-Lila, tha se natyrisht që kjo është fushatë më e shkurtër se ajo e zakonshmja. “Mirëpo, ne mendojmë se AKR-ja ka qenë e qartë gjatë gjithë kësaj periudhe që ka qenë në opozitë për alternativat që ajo i ofron në raport me qeverisjen, një program i cili ka zhvillimin ekonomik dhe mundësitë të cilat ky program i ofron”, tha Kusari.

Sipas saj, fushata prej dhjetë ditësh është një prezantim solemn i programit të AKR-së para elektoratit të saj. Program ky i cili, sipas Kusarit-Lila, është punuar me vite dhe njëkohësisht tregon një vlerë të shtuar në raport me atë që është qeverisur deri më tash.

Nënkryetari i AAK-së, Ahmeti Isufi tha se zgjedhjet e jashtëzakonshme janë të jashtëzakonshme prandaj gjithçka do të jetë në mënyrë të jashtëzakonshme.

“Ne do të arrijmë që programin tonë ta shpalosim para anëtarësisë sonë dhe të gjithë qytetarëve të Kosovës ku do t’i njoftojmë me vijat programorë të AAK-së për qeverisjen e vendit”, tha Isufi për të shtuar se do t’i tregojnë qytetarit të vendit ashtu si në të kaluarën kur ishin në qeverisje me një program konkret, i cili është i zbatueshëm dhe është i punuar nga ekspertët në krye me AAK-në.

Besa Gaxherri nga LDD tha se realisht dhjetë ditë janë shumë pak për të shfletuar programin e partisë. “Koha nuk është e mjaftueshme, por realisht programin e LDD-së shumë pak kemi nevojë ta rishqyrtojmë, sepse për këta 3 vjet në Kuvend LDD ka dëshmuar se është parti serioze dhe ka një program të përgatitur mirë dhe të freskuar të cilin do ta bëjmë publik më 6 nëntor, i cili do të jetë edhe fillimi i prezantimit të platformës së LDD-së”, tha Gaxherri.

Glauk Konjufca nga “Vetëvendosje” tha se afati prej 10 ditësh për të bërë fushatë elektorale e ka një të mirë, sepse siç tha ai, partitë politike do të mund të vjedhin më pak dhe të harxhojnë më pak për këtë fushatë.

“Kemi parë se si partitë politike gjatë fushatave të kaluara kanë harxhuar me miliona euro dhe rregullisht janë dënuar nga OSBE-ja për shkak të mostransparencës së prejardhjes së burimeve të atyre mjeteve financiare. Ato i kanë paguar nga 5 mijë euro, por asnjëherë nuk i kanë bërë publike se nga i kanë siguruar ato miliona”, ka thënë Konjufca duke shtuar se kjo e ka të vetmen këtë të mirë që më pak do ta dëmtojnë buxhetin e Kosovës.

“Ne e kemi shpalosur tashmë programin tonë politik publik. Ne tashmë po e shpërndajmë programin tonë në të gjitha anët e Kosovës, porse gjatë fushatës do ta intensifikojmë punën tonë në këtë drejtim. Ne përfundimisht po hyjmë të përgatitur në këto zgjedhje dhe Vetëvendosjes i mjafton fushata prej 10 ditësh”, tha Konjufca.

Kurse bashkëthemeluesi i FER, Ilir Deda, tha se kjo parti ende nuk ka një qëndrim rreth kësaj çështjeje. “Ne nuk e kemi shqyrtuar një gjë të tillë brenda partisë, posa ta shqyrtojmë do të dalim me qëndrimet tona”, ka thënë Deda.