Të bindur se zgjedhjet e 12 dhjetorit do ta nxjerrin fituese lokomotivën e ashtuquajtur AKR, përfaqësuesit e koalicionit për Kosovën e Re në përmbyllje të fushatës, të premten në Prishtinë, kanë kërkuar falje nga votuesit që do të duhet të dalin për të votuar në dimër, por janë shprehur optimist se pas dimrit do të vijë pranvera.

“Secili prej liderëve të koalicionit tonë mund të ishte i zgjedhur si kryeministër apo president i shtetit”, ka thënë lideri i këtij koalicioni Behghet Pacolli.

Duke iu referuar thënieve të Hasan Prishtinës për ndërtimin e shtetit, ai është shprehur i bindur se njerëzit e shkolluar, të ndershëm dhe të sinqertë, me të cilët mund të ndërtohet shteti kanë zbarkuar pikërisht në AKR.

Edhe liderët e partive politike që kanë lidhur koalicion parazgjedhor me AKR-në janë shprehur të bindur se programi politik i këtij subjekti politik është më i miri dhe ai i cili meriton besimin e votuesve.