Prokuroria Speciale e EULEX-it ka ngritur të hënën aktakuzë kundër kryetarit të Komunës së Skenderajt, Sami Lushtaku dhe pesë punonjësve të gazetës së përditshme kosovare “Infopress”. Ngritjen e aktakuzës e kanë konfirmuar zyrtarë të EULEX-it, të cilët deri në konfirmim të aktakuzës, nuk pranojnë të japin detaje rreth rastit.

Por, gazeta ka arritur të sigurojë se të akuzuar në aktakuzën e ngritur nga një prokuror i EULEX-it që vepron në Prokurorinë Speciale janë: kryetari i komunës së Skënderajt, Sami Lushtaku, botuesi i gazetës “Infopress”, Rexhep Hoti, ish-drejtoresha e së njëjtës gazetë, Arizona Dibra, kryeredaktori i gazetës, Avni Azemi dhe dy gazetarë të tjerë.

Gjashtë personat e përfshirë në aktakuzën më të re të ngritur nga EULEX dyshohen se janë të përfshirë në një fushatë kërcënuese mediatike kundër Jeta Xharrës, drejtoreshë e Rrjetit Ballkanik për Gazetari Hulumtuese në Kosovë (BIRN).

“Prokuroria Speciale e Kosovës ka ngritur padi kundër gjashtë personave, të cilët dyshohet të jenë përfshirë në një fushatë mediatike të kërcënimeve serioze dhe shpifjeve kundër një moderatoreje televizive të Kosovës”, kanë njoftuar zyrtarë të Zyrës për Informim në EUEX.

Sipas kësaj zyre, fushata është iniciuar dhe ekzekutuar nga një gazetë kosovare gjatë periudhës maj-qershor 2009 për shkak të një programi televiziv kritik të prodhuar nga disa gazetarë e të transmetuar në Radio Televizionin e Kosovës (RTK).

Gazeta ka arritur të mësojë se gjashtë personat e përfshirë në aktakuzën, e cila të hënën është dërguar në Gjykatën e Qarkut në Prishtinë, akuzohen për shkelje të statusit të barabartë të banorëve të Kosovës, si dhe për veprën penale të kërcënimit e shpifjes ndaj drejtoreshës së BIRN-it, Jeta Xharra.

“Jeta në Kosovë”, ndërkaq kishte transmetuar një debat në lidhje me lirinë e medieve dhe si shembull i transmetuar në këtë emision kishte qenë edhe reportazhi në Skënderaj ku përfaqësuesit e komunës së Skenderajt e kishin larguar dhunshëm ekipin e gazetarëve të BIRN-it. Infopres, ndërkaq kishte shkruar disa shkrime për mënyrën se si gazetarja e “Jeta në Kosovës” ishte sjellë në komunë.

EULEX e kishte marrë rastin në dorë pasi që Këshilli i Medieve të shkruara të Kosovës kishte vendosur si të pabazuara akuzat e Sami Lushtakut që i kishte publikuar gazeta “Infopress” duke vlerësuar se këto akuza përbëjnë kërcenim. Këshilli kishte rekomanduar prokurorët dhe policinë që të hetojnë gazetën dhe gazetarët.

Gazeta “Zëri” është munduar t’i kontaktojë drejtuesit e Infopressit, por kjo nuk ka qenë e mundur pasi që disa nga të apostrofuarit nga EULEX-i kanë qenë në pushim vjetor.

Ndryshe, aktakuza tashmë është ngritur dhe pritet konfirmimi i saj në mënyrë që t’i jepet “drita e gjelbër” fillimit të procesit gjyqësor.