Zëvendëskryeministrja, njëherësh kryenegociatorja në bisedimet Kosovë-Serbi, Edita Tahiri zhvilloi një bisedë përmes videolidhjes me ndërmjetësin evropian Robert Cooper në kuadër të përgatitjeve për raundin e ardhshëm të dialogut teknik.

Temat kryesore të bisedës, siç theksohet në një komunikatë për medie, ishin çështja e bashkëpunimit rajonal, situata në zbatimin e marrëveshjeve si dhe procesi i finalizimit të protokollit teknik të marrëveshjes së IBM-it.

Me këtë rast, Tahiri ritheksoi përkushtimin e Qeveria së Kosovës për progresin e dialogut teknik si një mundësi e mirë për t’i zgjidhur çështjet praktike mes dy shteteve, në interes të qytetarëve dhe integrimeve evropiane e euro-atlantike.

Lidhur me çështjen e bashkëpunimit rajonal, Tahiri, siç raportohet, theksoi se Kosova duhet të marrë pjesë si shtet i pavarur dhe sovran, me simbolet e saja shtetërore dhe të jetë nënshkruese e marrëveshjeve rajonale si dhe hodhi poshtë propozimet e Serbisë për çfarëdo referencash që nuk përkojnë me realitetin duke thënë se Rezoluta 1244 është e tejkaluar juridikisht dhe politikisht.

“Propozimi i jonë mbështetet në realitetin se shumica e vendeve të rajonit dhe të Bashkimit Evropian kanë njohur shtetin e pavarur të Kosovës”, raportohet të ketë thënë Tahiri.

Duke folur për zbatimin e marrëveshjeve, kryenegociatorja Tahiri vlerësoi fillimin e zbatimit të marrëveshjeve mirëpo potencoi pengesat evidente me theks të veçantë në marrëveshjet për lëvizjen e lirë të qytetarëve dhe ajo për tregtinë e lirë të cilat po zbatohen pjesërisht nga Serbia me faktin ekzistimit të barrikadave dhe strukturave ilegale serbe.

Mes tjerash, ajo kërkoi nga BE-ja që të bëjë presion të shtuar mbi Serbinë për të hequr këto pengesa. Po ashtu kërkoi heqjen e tarifave për sigurimin e automjeteve dhe rritjen e dinamikave në zbatimin e të gjitha marrëveshjeve.

“Zbatimi i plotë i marrëveshjeve nga ana e Serbisë dhe arritja e marrëveshjeve të reja, janë kushtet e Këshillit evropian për statusin e kandidatit për Serbinë”, tha ajo.

Kryenegociatorja Tahiri kërkoi që sa më shpejtë të përgatitet Protokolli i detajuar teknik i IBM-it dhe të nënshkruhet më së largu deri më 10 shkurt, në mënyrë që të fillon menjëherë zbatimi i marrëveshjes për Menaxhimin e integruar të kufirit ndërshtetëror mes dy vendeve.

Përparimet konkrete në këtë çështje do të tregojnë vullnetin e vërtetë të palëve për këtë standard evropian, dëshmi kjo që duhet të testohet nga BE-ja para mbledhjes së Këshillit të Ministrave në fund të shkurtit me ç’rast do të rishqyrtohet kandidatura e Serbisë.

Sipas saj, rajonit i duhen politika evropiane dhe jo politika penguese, në fund të fundit kjo është përgjegjësi e secilit shtet, sepse integrimi sa më shpejtë i rajonit në BE është në interes të paqes dhe stabilitetit rajonal, tha Tahiri dhe ftoi Cooperin ta vizitoj Kosovën në ditët në vijim.

Cooper nga ana e tij mori në dijeni qëndrimet dhe kërkesat e palës së Kosovës dhe premtoi angazhim për të përafruar qëndrimet e palëve për çështjen e bashkëpunimin rajonal, të cilat tash për tash janë shumë larg njëra tjetrës. Ai po ashtu premtoi angazhimin e tij për të përshpejtuar procesin e zbatimit të marrëveshjeve të arritura deri më tash. /Zëri/