(E plotësuar) Ministri i Jashtëm i Kosovë, Enver Hoxhaj, ka emëruar Albert Kuçin në pozitën e zëvendësambasadorit në Çeki, pa shpallur fare konkurs dhe pa i përfillur ligjet në fuqi, të cilat e precizojnë se si duhet të bëhen emërimet e shërbyesve diplomatikë, duke filluar nga shpallja e konkursit, intervistimet e kandidatëve e deri te punësimi i tyre.

Por ai nuk është ndalur me kaq. Për Kuçin, që më parë nuk ka qenë pjesë e shërbimit diplomatik, por që e ka drejtuar një restorant në shtetin çek, Hoxhaj është treguar shumë “dorëlirë” duke ia dhënë gradën “Ministër Këshilltar”, gjithashtu pa i përfillur procedurat ligjore në fuqi.

Ndërkaq, sipas të dhënave në internet, Albert Kuçi është një biznesmen në Pragë të Çekisë që drejton kompaninë e patundshmërive “ADAL Grioup s.r.o”, e cila është themeluar më 29 korrik të vitit 2005.

Shkelet ligji, emërohet “jarani”

“Sipas ligjit, përkatësisht Udhëzimit Administrativ 3/2009, para se të emëron nëpunës të Misionit Diplomatik, MPJ-ja duhet të shpallë konkurs, pastaj t’i respektojë procedurat e intervistimit, kriteret dhe përzgjedhja e kandidatëve, ndërsa për emërimin e Kuçit nuk është vepruar kështu. Kuçi deri tash ka qenë pronar i një restoranti në Çeki, pa asnjë ditë përvoje pune në shërbimin diplomatik apo në MPJ”, thotë burimi.

Ky burim thekson se ligji e përcakton se kandidati që konkurron për punë në shërbimin diplomatik e konsullor duhet të sjellë dokumentet që dëshmojnë për përgatitjen akademike e profesionale të Kuçit dhe konfirmimin nga gjykata se nuk ka qenë i dënuar për ndonjë vepër penale.

“Tash jemi në një situatë ku përveç se nuk dihet për fushën akademike e profesionale të kandidatit, në Çeki kemi një zëvendësamabsador, për të cilin nuk dihet nëse është nën hetime për ndonjë vepër penale, pasi që dokumentet e tij nuk janë dorëzuar në MPJ për faktin se s’ka pasur fare konkurs. Në MPJ po thonë se ministri e ka mik të mirë Kuçin, prandaj i ka shpërfillur të gjitha procedurat ligjore për emërimin e tij”, thotë ai.

Emërimi i një zëvendësambasadori pa shpallur konkurs, nga anëtarët e partive opozitare shihet si shkelje e rëndë që ka bërë Ministria e Punëve të Jashtme. Anëtarët e Komisionit Parlamentar për Punë të Jashtme, thonë se përjashtuar emërimet e ambasadorëve, secili emërim në stafin diplomatik e konsullor të Kosovës duhet të bëhet sipas ligjit në fuqi dhe jo duke “respektuar” miqësinë që ka ministri me ndonjë person.

Ministri Hoxhaj do të përgjigjet në Kuvend

Ish-ministri i Jashtëm, Skender Hyseni, thotë se nuk ka informata për çështjen në fjalë, por nëse është emëruar ndonjë peron në pozitë të zëvendësambasadorit, atëherë është shkelur ligji.

“Vetëm ambasadorët emërohen. Të gjithë të tjerët duhet t’i nënshtrohen institucionit të konkursit dhe të gjitha procedurave ligjore për t’u bërë pjesë e shërbimit diplomatik”, thotë deputeti i LDK-së, Hyseni.

Edhe anëtarja tjetër e komisionit, Donika Kadaj-Bujupi, thotë se nuk ka informata për emërimin e Kuçit pa shpallur konkurs, por ajo thekson se në të ardhmen do ta “zërë ngushtë” ministrin Hoxhaj për çështjen në fjalë.

“Përderisa nuk kam informatë në këtë që po e thoni do t’i bëj pyetje parlamentare në Kuvendin e Kosovës dhe do të kërkoj përgjigje dhe rrjedhimisht edhe llogaridhënie nga ministri”, ka thënë shkurt ajo nëpërmjet telefonit.

Ndërkaq, drejtori i Klubit për Politikë të Jashtme, Alban Bokshi, thotë se mosrespektimi i ligjit nga ministrat e Qeverisë së Kosovës po i nxisin qytetarët që ta shkelin atë.

“Nëse nuk respektohet ligji nga qeveria nuk do të ketë asnjëherë sundim të ligjit në Kosovë. Nëse nuk janë respektuar ligjet për emërimin e zëvendësambasadorit, atëherë përveç të tjerash, dëmtohet i tërë sistemi diplomatik e konsullor i Kosovës. Unë nuk e di si mendojnë qeveritarët se do të hyjmë në BE dhe në NATO duke mos e respektuar ligjin”, thotë Bokshi.

MPJ: Kuçi ka konkurruar moti për punë

Artan Behrami, këshilltar për medie i ministrit të Jashtëm, Enver Hoxhaj, thotë se MPJ nuk ka shpallur konkurs, por se emërimi i Kuçit është bërë duke u bazuar në konkursin e vitit 2009 për staf konsullor e diplomatik, që ishte shpallur nga MPJ-ja, ku Kuçi kishte konkurruar, por nuk ishte përzgjedhur. Ai pohon se ky është rasti i parë i kësaj natyre në MPJ, por siç thotë ai, nuk e përjashton mundësinë që në të ardhmen të ketë raste të ngjashme.

“Komisioni përzgjedhës, sipas Udhëzimit Administrativ Nr. 3/2009 për procedurat e emërimit të kandidatëve për nëpunës të misionit diplomatik i ka propozuar në atë kohë ministrit një listë të kandidatëve me pikët më të lartë në këtë konkurs. Në këtë listë ishte edhe zoti Kuçi, i cili ka arritur një rezultat të lartë të pikëve. Meqë në atë kohë, nuk është përzgjedhur, zoti Kuçi, për shkak të numrit të lartë të pikëve ka hyrë në listën rezervë të MPJ-së, praktikë që aplikohet në të gjitha vendet me përvojë diplomatike”, thotë Artan Behrami nga MPJ-ja.

Sipas tij, gjithçka është bërë pas kërkesës së të ngarkuarit me punë në Ambasadën e Kosovës në Pragë, Hilmi Zogiani, për shtim urgjent të stafit diplomatik, meqenëse ai ka qenë i vetëm në këtë institucion dhe është përballur me shumë punë.

Por, ish-ministri i Jashtëm, Skender Hyseni, këtë deklarim të MPJ-së e sheh si përpjekje për të mbuluar veprimin e paligjshëm.

“Konkursi që ka qenë para dy vjetëve, apo kurdo që ka qenë është mbyllur në kohën e duhur, janë punësuar ata që janë punësuar, nëse ka pasur listë rezervë, ajo ka qenë vetëm në rastet kur dikush ka hequr dorë. Nuk ka lista rezervë, nuk ka lista të pritjes”, thotë Hyseni, duke shtuar se nuk mund të thirresh në një ish-konkurs derisa MPJ ka hapur e mbyllur edhe dy-tri të tjera pas tij.

Ndërkaq, avokati Tomë Gashi, thotë se dikasteri i jashtëm ka shkelur rëndë Udhëzimin Administrativ 3/2009 (për emërimin e stafit diplomatik e konsullor) kur ka emëruar një person duke u thirrur në një konkurs të dikurshëm.

“Kjo është shkelje, sepse nuk mundet askush askujt t’ia ruajë vendin e punës nëse ai ka konkurruar në vitin 2009. Çdo konkurs që hapet duhet të konkurrosh, sepse s’mund të kesh rezervim të punës, unë konkurroj në 2009, s’po pranohem, tash pranohem në 2012”, thotë Gashi, duke shtuar se askund në botë nuk mund të mbesë konkursi i hapur për tre vjet, ose të thirren në punë ata që dikur s’janë pranuar.

Kuçi ikën nga “Zëri”

Gazeta ka bërë përpjekje që të kontaktojë me tashmë zëvendësësambasadorin e Kosovës në Pragë, Albert Kuçi, por ai ka refuzuar që të deklarohet.

Pasi është njohur me temën që është duke trajtuar gazeta, dhe pasi është konsultuar me Kuçin, asistentja e kësaj ambasade ka thënë nëpërmjet telefonit se zëvendësambasadori është shumë i zënë me përgatitjet për ditën e Pavarësisë së Kosovës, dhe se nuk ka kohë të flasë me gazetarë. Ndërkaq, në telefonatën e dytë ajo ka dhënë tjetër përgjigje.

“Zëvendësambasadori nuk është në ambasadë. Unë nuk kam numër të tij, sepse nuk na e ka dhënë, sepse ai ka ardhur qe dy-tri ditë në ambasadë”, ka thënë ajo.