Dhjetëra parti politike, bashkësi fetare, organizata të ndryshme, kanë dalë në mbështetje të protestës së nesërme në Prizren, të organizuar nga koalicioni ad-hoc OJQ-ve në Mbrojtje të Qendrës Historike të Prizrenit.

Ky koalicion ka prezantuar të shtunën detajet e protestës qytetare për të kundërshtuar projekt-ligjin për Qendrën Historike të Prizrenit. Sipas organizatorëve, protesta fillon në orën 13:00, ndërsa pikë tubimi do të jetë Sheshi Shadërvan në Prizren.

“Gjatë protestës do të mbahen tri fjalime, i pari nga organizatorët e protestës, ndërsa dy fjalime të tjera nga Këshilli për Mbrojtjen e të Drejtave dhe Lirive të Njeriut dhe Rrjeti i Grupeve të Grave të Kosovës. Pas përfundimit të fjalimeve, protestuesit do të ftohen për të qëndruar edhe 15 minuta në heshtje, si shenjë proteste dhe mospajtimi me projekt-ligjin për Qendrën Historike të Prizrenit. Ndërsa porosia e heshtjes do të jetë se këto janë 15 minutat e fundit të heshtjes së qytetarëve të Prizrenit dhe nëse nuk respektohet vullneti i tyre, atëherë do të pasojë mosbindja qytetare dhe format e tjera të refuzimit qytetar ndaj efekteve të këtij ligji”, kanë thënë organizatorët, raporton Indeksonline.

Organizatorët po ashtu kanë thënë se kundërshtojnë tendencat e subjekteve të ndryshme politike për të përfituar dhe për t’i dhënë protestës dimension politik.

Koalicioni i OJQ-ve të Prizrenit i ka ftuar të gjithë qytetarët e Prizrenit, pa marrë parasysh orientimet e tyre politike, fetare ose etnike, që të dielën të jenë të bashkuar në protestën qytetare për të kundërshtuar një ligj që do t’i dëmtojë interesat e të gjithë atyre që jetojnë në Prizrenit.