(E plotësuar) Kryetari i Gjykatës Kushtetuese të Kosovës, Enver Hasani, gjatë një mandati si rektor i Universitetit të Prishtinës ka marrë mbi njëqind mijë euro, pavarësisht se paga e tij mujore ka qenë vetëm pesëqind euro, që për tre vjet i bie mbi 18 mijë euro. Për më pak se tre vjet, ai ka përfituar jashtëzakonisht shumë, madje duke arritur që të hyrat brenda një muaji nga shtesat dhe shpërblimet për punë tjera të jenë deri në pesë herë më të larta sesa paga e tij.

Gazeta “Zëri” ka siguruar listën e pagave dhe të ardhurave të tjera që ka përfituar Hasani, sipas së cilës, për ish-rektorin secili vit ka qenë më frytdhënës sesa viti paraprak. Madje, sipas trendit të rritjes së të hyrave nga njëri vit në tjetrin, sikur të rizgjidhej edhe një mandat, xhirollogaria bankare e tij do të “pasurohej” goxha shumë, ndërsa e kundërta do të ndodhte me atë të universitetit.

Kjo duket se ia ka lënë “ëmbël” ish-rektorit, i cili vetëm në fund të vitit 2011 kishte kërkuar nga Qeveria e Kosovës që punëtorët e Gjykatës Kushtetuese të shpërblehen me pagën e trembëdhjetë, për “punën e madhe” që kanë bërë, kërkesë kjo që nuk është realizuar nga ekzekutivi kosovar.

Enver Hasani me dy rroga!

Vetëm gjatë vitit 2008, rektori Hasani kishte fituar mbi tridhjetë e gjashtë mijë euro, nga të cilat vetëm gjashtë mijë nga paga bazë, ndërsa mbi tridhjetë mijë të tjera në saje të angazhimeve të ndryshme, qoftë si profesor, si anëtar i komisioneve të ndryshme, apo si mëditje për udhëtime jashtë vendit.

Sipas një përllogaritje të thjeshtë, përveç pagës fikse prej pesëqind e një euro, rektori i dikurshëm për secilin muaj ka marrë mbi dymijë e pesëqind euro, që i bie sa pesë herë paga mujore e tij.

Vetëm një mijë euro më pak sesa gjatë vitit 2008, ai ka marrë për dymbëdhjetë muaj të vitit 2007.

Për punën dhe angazhimin e tij ai është “shpërblyer” me rreth tridhjetë e pesë mijë euro, nga të cilat vetëm gjashtë mijë i ka marrë si pagë bazë për tërë vitin, ndërsa rreth njëzet e nëntë mijë si shtesa të ndryshme.

Derisa paga bazë ka qenë pesëqind e një euro, për secilin muaj ai ka marrë mjete të tjera sa pesë herë paga e tij, përkatësisht mbi dymijë e katërqind euro për muaj.

Pa përfitime të majme Enver Hasani nuk kishte kaluar as gjatë vitit të fundit si rektor, pavarësisht se në këtë pozitë kishte qëndruar vetëm gjatë muajve janar-korrik, konkretisht deri në ofrimin e dorëheqjes për t’u bërë kryetar i Gjykatës Kushtetuese.

Madje, sipas listës së pagave, ish-rektori e ka marrë pagën e rektorit dhe shtesat tjera edhe për dy muajt e fundit, qershor dhe korrik, edhe pse gjatë kësaj periudhe ai nuk ishte në UP, por në Gjykatën Kushtetuese, ku ishte zgjedhur fillimisht gjykatës e më pas kryetar i saj.

Për shtatë muaj të vitit 2009, ai kishte përfituar mbi njëzet e tre mijë euro, prej të cilave, sikurse në vitet tjera, shumica ishin nga shtesat e ndryshme. Përveç pagës që tashmë ishte rritur për pesëdhjetë euro, nga të hyrat tjera Hasani ka përfituar mbi nëntëmbëdhjetë mijë euro, që i bie për secilin muaj të ketë marrë tre herë më shumë se paga.

Keq nuk kishte mbetur as për katër muajt e parë si rektor. Për periudhën shtator-dhjetor 2006, ai është shpërblyer me mbi tetë mijë e gjashtëqind euro, nga të cilat dymijë ishin si pagë fikse, ndërsa tre herë më shumë nga shtesat e ndryshme, përkatësisht mbi gjashtë mijë e gjashtëqind euro.

Interesat personale shkatërruan UP-në

Publicisti Shkëlzen Gashi thotë se shumica e parave që ka përfituar ish-rektori Enver Hasani, janë nga puna e tij nëpër komisione dhe ligjërata, nga e cila nuk ka përfituar asgjë as qytetari dhe as studenti i UP-së.

“Ai nuk shkon thuajse asnjëherë në ligjërata në UP, edhe pse paguhet për këtë. Ky është korrupsioni më i madh dhe më i hapur që bën ai. Puna e tij në komisione, prej të cilave merr honorare të majme, është joprofesionale dhe për atë, jo që nuk do të duhej të paguhej, por të dënohej. Në të dy rastet që ka qenë mentor përkatësisht anëtar komisioni për doktoraturë (për dy zyrtarë të lartë të institucioneve të Kosovës) ai nuk e ka kryer punën si duhet, sepse po ta kryente atë si duhet, këta dy kandidatë nuk do të ishin doktorë shkence sot”, thotë Gashi.

Ai thekson se fakti që rektori ka marrë honorare deri në pesë herë më shumë sesa paga e tij, është dëshmi e mjaftueshme për keqpërdorime që kanë bërë rektorët e pasluftës njëri pas tjetrit, ndërsa pohon se një gjë e tillë shumë lehtë mund të jetë e rregulluar me ndonjë rregullore, të cilën rektorët e kanë bërë për interesa të veta.

Ndërsa, eksperti i arsimit Jonuz Salihaj, thotë se duhet të ketë një ligj të veçantë, i cili i rregullon se sa mund të jenë honoraret brenda muajit dhe brenda vitit.

“Unë besoj që honoraret që i marrin njerëzit dhe rektorët sidomos, janë punë të cilat ata nuk mund t’i bëjnë, qofshin në komisione apo diku tjetër, këtu është problemi. Këta marrin pjesë nëpër komisione në mënyrë fiktive, pa i merituar”, shprehet ai.

Sipas tij, faktin se menaxherët e UP-së marrin para të majme pa bërë punë e ka dëshmuar edhe aktiviteti i fundit i Parlamentit Studentor, sipas të cilit, ka shumë profesorë që marrin “paga haram”, meqenëse nuk i mbajnë ligjëratat e konsultimet, por paguhen sikur t’i kishin mbajtur.

Bashkëfajtor edhe Këshilli Drejtues

Përfitimet nga mëditjet, shtesat, ligjëratat, organizimi i provimeve, udhëtimet jashtë vendit, janë të rregulluara me një rregullore të brendshme të Universitetit të Prishtinës, të cilën e ka nxjerrë Këshilli Drejtues i UP-së.

Mirëpo, kryetari i këtij këshilli, Basri Çapriqi, i cili në këtë pozitë ka qenë edhe në kohën e Hasanit, nuk preferon të flasë shumë për çështjen në fjalë dhe rreth asaj se pse ky organ ka lejuar që ish-rektori dhe në përgjithësi menaxhmenti i UP-së të përfitojë shuma marramendëse nga një institucion publik.

“Ju mundeni më së miri të bisedoni me këta të financave. Me këtë nuk ka të bëjë bordi. Bordi faktikisht funksionon si organ kolektiv, i cili i bën planifikimet buxhetore për gjithë vitin dhe e autorizon menaxhmentin për shpenzimin e mjeteve. Faktikisht prej atij momenti ata janë përgjegjës, menaxhmenti është përgjegjës për shpenzimin e mjeteve”, thotë ai, duke mohuar se bordi ka rol mbikëqyrës mbi menaxherët e UP-së.

Por sipas statusit të UP-së, përgjegjës për keqpërdorimet e mundshme nuk është vetëm rektori, por edhe Këshilli Drejtues, i cili edhe në kohën e Hasanit, por edhe tani drejtohet nga Basri Çapriqi.

“Këshilli Drejtues, kolektivisht i raporton ministrisë dhe është përgjegjës për shfrytëzimin e duhur e në mënyrë efektive të fondeve që ministrja ose ndonjë burim tjetër publik ia ka ndarë universitetit”, thuhet në pikën 4 të nenin 17 të statutit të UP-së.

Për më tepër, në pikën 3 të nenit 23 të këtij statuti thuhet decidivisht se njëra nga detyrat e Këshillit Drejtues është “nxjerrja e rregullores për qeverisjen, drejtimin dhe menaxhimin e universitetit”, ndërsa në pikën 5 të këtij neni Këshilli Drejtues obligohet që të “organizojë kontroll financiar siç parashihet me ligj”. Pra, as në rastin e Hasanit, mirëpo as tani, ky këshill nuk bën kurrfarë kontrolli financiar ndaj Rektoratit.

Ndërsa, prorektori për burime dhe infrastrukturë, Enver Kutllovci, nuk dëshiron të komentojë nëse kjo që ka bërë ish-rektori është në rregull apo jo, por ai thekson se gjithçka është bërë “me letra”.

“Edhe në periudhën 2006-2009 Këshilli Drejtues ka pasur një rregullore të cilën e ka nxjerrë, mbi të cilën e ka definuar rrogën bazë, ajo e specifikon edhe pjesët tjera prej nga mund të marrin (rektorët). Kjo nënkupton orë të mbajtura mbi normë, angazhimet që i ka në pjesën e studimeve pasuniversitare, është e specifikuar se sa i takon angazhimi shtesë për udhëheqjen e kandidatëve (që kanë magjistruar apo doktoruar), si kryetar apo anëtar i komisionit, pastaj për provime të mbajtura dhe për punët e diplomave (si mentor i një studenti)”, thotë Kutllovci, duke shtuar se nëse ish-rektori ka marrë para në shpërputhje me këtë rregullore, atëherë është shkelur ligji.

Hasani hesht!

Redaksia e “Zërit” ka pritur për dhjetë ditë rresht që të marrë përgjigje nga ish-rektori, Enver Hasani, për shumën e parave që ka marrë ai, për bazën ligjore dhe për akuzat në adresë të tij, pyetje këto që i janë drejtuar edhe Gjykatës Kushtetuese, por as ai dhe as gjykata nuk është përgjigjur.

Zëdhënësi i Gjykatës Kushtetuese, Veton Dula, ka thënë nëpërmjet telefonit se ai nuk mund të përgjigjet për çështjet që kanë të bëjnë me veprimtarinë e ish-rektorit, pavarësisht se ai tashmë është kryetar i Kushtetueses.

“Pyetjet e juaja ia kam dërguar kryetarit dhe tash ka mbetur që ai të përgjigjet në to kur të ka kohë”, ka thënë Dula.