Kryeministri i Kosovës, Hashim Thaçi bëri homazhe dhe vendosi lule para lapidarit të Heroit të Kosovës, komandantit të Ushtrisë Çlirimtare të Kosovës, Zahir Pajaziti, në pesëmbëdhjetë vjetorin e rënies.

Për të nderuar veprën e heroit Pajaziti, Kryeministri Thaçi tha se sot, institucionet e shtetit të Kosovës dhe qytetarët e Kosovës, nderojnë me respektin më të lartë, veprën, jetën dhe heroizmin e komandantit më të shquar të Ushtrisë Çlirimtare të Kosovës, Zahir Pajaziti dhe bashkëluftëtarëve të tij, Edmondit dhe Hakifit, duke shtuar se “nderojmë me respektin më të lartë, me fuqinë dhe energjinë për të punuar edhe më tepër në konsolidimin dhe forcimin e shtetit tonë, për t’u integruar në NATO dhe Bashkim Evropian”.

Më tutje, sipas një komunikate për medie, Thaçi ka thënë se jeta dhe vepra e komandantit Zahir do të mbetet gjithmonë si udhërrëfyes për punën e institucioneve të Kosovës, për gjithë bashkëluftëtarët e tij, për vullnetin e qytetarëve të vendit tonë.

“Ushtria Çlirimtare e Kosovës bëri të pamundurën me sakrificën e të gjithë qytetarëve të Kosovës, që arriti të mobilizojë popullin në luftën për liri dhe pavarësi, prandaj sot shteti i Kosovës, të gjithë qytetarët, nderojnë me pietetin më të lartë komandantët e UÇK-së, luftëtarët e lirisë. Siç e dini, për lirinë e Kosovës, pavarësinë e Kosovës kanë sakrifikuar të gjithë, dhe të gjithë qytetarët e Kosovës janë çlirimtarë”, theksoi kryeministri Thaçi para lapidarit të komandantit Zahir Pajazitit në qendër të Prishtinës. /Zëri/