Vetëvendosja ka të drejtë të protestojë, por bllokimi i kufirit nuk i sjell asgjë të mirë Kosovës. Përkundrazi vetëm e dëmton atë. Kështu ka thënë sekretari i shtetit në Ministrinë e Jashtme gjermane, Nikolaus Graf Lambsdorff, pas një takimi që ka zhvilluar me liderin e Lëvizjes Vetëvendosje, Albin Kurti, në Berlin.

“Zoti Kurti është një prej politikanëve udhëheqës opozitarë në Kosovë. Partia e tij është e përfaqësuar në parlament dhe unë dëshiroja të informohem për qëndrimet e tij politike ndaj Republikës së Kosovës, për qëndrimet e tij lidhur me raportet me Serbinë dhe me Bashkimin Evropian. Kjo është një gjë normale, mua më intereson të dëgjoj edhe prej politikanëve të tjerë. Kurti është natyrisht një rast i posaçëm sepse partia e tij dhe ai vetë bëjnë opozitë jo vetëm në parlament por edhe jashtë tij”, ka thënë sekretari Lambsdorff në një intervistë për DW.

Sa u përket protestave të Vetëvendosjes për bllokimin e kufirit mes Kosovës dhe Serbisë, Lambsdorff ka thënë se Berlini zyrtar nuk i vlerëson këto aksione.

“Ne mendojmë se këto aksione, për shkaqe të ndryshme, nuk janë të mira. Këtë e ka bërë të qartë ambasadori ynë në Prishtinë disa herë, e këtë e kam thënë edhe unë. Një parti, e cila ka përfaqësuesit e vet në parlament, ka dhe përgjegjësi të caktuara. Unë kam biseduar me zotin Kurti për këtë çështje dhe i kam thënë se nga aksionet të tilla ndoshta mund të ketë përfitime afatshkurtra në skenën e brendshme politike, por kjo nuk e ndihmon Republikën e Kosovës. Përkundrazi e dëmton atë”, ka theksuar më tej Lambsdorff.

Ai ka thënë se Berlini zyrtar nuk ka ndonjë recetë për zgjidhjen e problemeve në raportet mes Kosovës dhe Serbisë, mirëpo ka thënë se ekziston dialogu mes Prishtinës dhe Beogradit, i udhëhequr nga Bashkimi Evropian.

Kjo është tani për tani, sipas tij, është mundësia më e mirë që ekziston, duke shtuar se për këtë arsye, “duam që ky dialog të vazhdojë”.

Ndërkaq, sipas sekretarit të shtetit në MPJ-në gjermane, Nikolaus Graf Lambsdorff, Kurti me njerëzit e tij e refuzojnë këtë. “Ata më shumë po bëjnë një politikë opozitare fondamentale dhe kritikojnë të gjitha marrëveshjet që qeveria në Prishtinë po përpiqet të arrijë me qeverinë në Beograd. Një parti opozitare ka të drejtën ta bëjë këtë, por bllokimi i kufirit nuk i ndihmon askujt”, ka theksuar sekretari i MPJ-së gjermane, Lambsdorff.

Në fund, ai thotë se përparimi i Serbisë drejt BE-së varet nga përparimet në dialogun mes Prishtinës dhe Beogradit. Megjithatë, sipas tij, nëse rezultatet nga bisedimet do të mjaftojnë që Serbia të fitojë statusin e kandidatit për anëtarësim në BE, “nuk mund ta them”. /DW/Zëri/