Aktivistë të Lëvizjes Vetëvendosje, të udhëhequr nga lideri i kësaj lëvizjeje, Albin Kurti, në kuadër të vizitës në Gjermani janë takuar me bashkatdhetarë, me të cilët kanë biseduar për zhvillimet në vend. Në këto takime po ashtu janë ngritur disa prej problemeve më thelbësore me të cilat ballafaqohet mërgata.

Në njoftimin e Vetëvendosjes thuhet se të pranishmit në takim kanë ngritur problemin e mospërfaqësimit të mërgatës shqiptare në institucionet e shtetit të Kosovës, duke sjellë shembuj pozitivë nga rajoni, siç është rasti i mërgatës kroate, që është e përfshirë dhe e përfaqësuar në institucionet e atij shteti.

Një tjetër problem që është diskutuar është mosnjohja e dokumenteve të shtetit të Kosovës prej disa republikave (landeve) gjermane. Përfaqësuesit e mërgatës shqiptare në Gjermani janë shprehur të shqetësuar për detyrimin e pagesës së polisave të sigurimit për automjetet, gjë që e shtrenjton shumë udhëtimin e tyre për në Kosovë.

“Mërgata shqiptare në Gjermani është shprehur fuqishëm kundër heqjes së “Republikë”-s prej emërtimit shtetëror të Kosovës, duke theksuar se i gjithë angazhimi i tyre prej dhjetëra vjetësh ka qenë që Kosova një ditë të jetë Republikë, si të gjitha shtetet e tjera. Po ashtu ata shprehën mbështetjen e saj për të vendosur reciprocitetin me Serbinë, si një marrëdhënie e domosdoshme dhe normale në praktikat ndërkombëtare mes dy shteteve”, thuhet në kumtesë.

Një shqetësim në rritje i mërgatës është edhe siç janë shprehur ata modeli i keq i ekonomisë në Kosovë.

Ndërkaq, në kuadër të kësaj vizite, lideri i Vetëvendosjes, Albin Kurti, ka zhvilluar edhe një sërë aktivitetesh tjera. Ai është takuar në Ministrinë e Punëve të Jashtme (MPJ) të Republikës Federale Gjermane në Berlin, me të ngarkuarin e MPJ-së për Evropën Juglindore, Turqinë dhe shtetet e EFTA-s, zotëri Nikolaus Graf Lambsdorff. Më pas ai mbajtur një ligjëratë në Institutin Evropian të Politikës, IEP në Berlin: 4 vitet e pavarësisë së Kosovës: "Çka ndryshoi, e çka jo?".

Kurti ka zhvilluar edhe një takim pune me Transparency International në Berlin, me Koordinatoren për programet e Evropës Juglindore, Cornelia Abel. Gjithashtu, lideri i VV-së është takuar me deputeten e Bundestagut, Marieluise Beck, njëkohësisht anëtare e Komisionit Parlamentar për Punë të Jashtme, nënkryetare e Partisë së Gjelbër “Bündis 90/Die Grünen” si dhe anëtare e Parlamentit Evropian.

Njëkohësisht, Albin Kurti ka zhvilluar edhe një vizitë në ambasadën e Republikës së Kosovës në Gjermani, dhe takim me ambasadorin Vilson Mirdita, sikurse që ka zhvilluar edhe një vizitë në ambasadën e Republikës së Shqipërisë në Gjermani, dhe takim me ambasadorin, Valter Ibrahimi. /Zëri/