Përplasjet ndërmjet dy grupeve parlamentare, Partisë Demokratike të Kosovës dhe Lëvizjes “Vetëvendosjes” kanë vazhduar edhe në seancën e djeshme të Kuvendit të Kosovës. Në arenë debatesh të zjarrta janë vënë ish-guerilët e dikurshëm të UÇK-së të kthyer tashmë në politikë, Rexhep Selimi dhe Adem Grabovci.

Të dy këta deputetë u kanë dalë në ndihmë bashkëpunëtorëve partiakë, i pari Albin Kurtit dhe i dyti Bekim Haxhiut-Kamishit. Ndërsa tema e akuzave ka qenë Shërbimi Informativ i Kosovës, i cili, sipas “Vetëvendosjes”, nuk është shuar, ndërsa vazhdon t’i nxjerrë spiunët për t’i frikësuar kundërshtarët dhe për të bërë shantazhe.

Deputeti Rexhep Selimi ishte ai që u paraqit i pari në foltore duke iu përgjigjur kështu “ultimatumit” të deputetit të PDK-së, Bekim Haxhiu-Kamishi, i cili i kishte dhënë një javë më parë liderit të “Vetëvendosjes”, Albin Kurti.

“Kohëve të fundit janë ngritur disa dilema, janë bërë disa pyetje, janë dhënë madje edhe afate për përgjigje, por ka pasur edhe konferenca shtypi për këtë! Dua të them se Qeveria dhe SHIK-u kanë nxjerrë sërish edhe agjentët në skenë për të bërë presione e shantazhe ndaj qytetarëve dhe personaliteteve. Ne nuk flasim me gjuhë spiunësh e agjentësh, madje nuk flasim fare me ta. Ne, kemi një mesazh për Qeverinë dhe SHIK-un! Mjaft me këto shantazhe dhe presione ndaj opinionit, sepse nëse mendoni se mund t’i bëni dikujt presion e ta shantazhoni me afatizime, e keni gabim. Nëse doni gjithashtu që t’i frikësoni të tjerët me presione, prapë e keni gabim, sepse s’ua ka frikën kush”, ishte deklarimi i zëshëm i deputetit opozitar Rexhep Selimi në Kuvendin e Kosovës.

Ai akuzoi partinë e kryeministrit Thaçi se nuk e ka shuar SHIK-un. “Kush ua jep juve të drejtën që të angazhoni spiunë për të shantazhuar njerëz? Gjithashtu, kush jeni ju që i jepni vetes të drejtë të ngreni teori konspiracioni për të hutuar opinionin? Pse e keni mashtruar opinionin se e keni shuar SHIK-un?”, ka pyetur Selimi. Sipas tij, me mbarimin e luftës është menduar se do të përfundojë përfshirja e agjentëve në politikë, por ai tha se me këto veprime po tregohet se kjo nuk paska përfunduar.

Deputeti i “Vetëvendosjes”, i cili jo rrallë herë ka “thyer shtizat” me kryeministrin Thaçi, tha se nuk i përgjigjet SHIK-ut, sepse, sipas tij, këta (SHIK) duhet t’u përgjigjen drejtësisë dhe qytetarëve.

Por, në mbrojtje të “Kamishit” është venë edhe bashkëpartiaku i tij, i cili është edhe shef i Grupit Parlamentar të PDK-së, Adem Grabovci, i cili ka thënë se pyetjet e Haxhiut kanë qenë të qarta me një adresë. Ndërkaq, çështjet e ngritura nga deputeti Rexhep Selimi, Grabovci i konsideron si insinuata, të cilat tha ai mund të merren edhe si shantazhe.

“Ne nuk e pranojmë gjuhën e shantazhit, por nëse deputeti Selimi ka informacione të tjera, do të ishte me interes të qytetarëve që të kërkohen sqarime prej tij”, ka thënë Grabovci. Ai, ndërkaq ka hedhur poshtë deklarimet e opozitës se SHIK-u ende është funksional. “Të gjithë e dimë datën e fillimit dhe mbarimit të misionit të SHIK-ut”, ka thënë Grabovci.

Ditë më parë, deputeti Bekim Haxhiu publikisht ka deklaruar se nëse Albin Kurti nuk jep sqarime deri më 9 shkurt për disa takime me serbë dhe për korrespodencat me një serbe edhe pas përfundimit të luftës, atëherë do të dalë me fakte për veprimtarinë e dyshimtë të Kurtit. Nga ana tjetër, debati në seancën plenare të Kuvendit të Kosovës ka vazhduar me zotimin e kryeministrit Hashim Thaçi për përmbushjen e obligimeve që dalin nga rezoluta e fundit e miratuar për fundin e mbikëqyrjes ndërkombëtare të pavarësisë. Sipas tij, veprimet e institucioneve të shtetit të Kosovës janë në përputhshmëri me Kushtetutën dhe pakon e Martti Ahtisaarit.

Mirëpo, deputeti i partisë më të madhe opozitare, LDK-së, Sabri Hamiti tha se plani i Ahtisaari-t, i cili gjendet që sa vite në diskursin politik në Kosovë, shpeshherë po përdoret në nivelin politik për diskutime politike, që, sipas tij, nuk do të duhej të ndodhte. Megjithatë, ai kërkoi kujdes gjatë procesit të ndryshimeve kushtetuese, të cilat i paraprijnë fundit të mbikëqyrjes së pavarësisë.

Edhe deputetja e “Vetëvendosjes”, Alma Lama, ngriti çështjen e përfaqësimit të Kosovë në nivel rajonal me fusnotë dhe jo me fjalën Republikë. Kuvendi ka vazhduar debatin me miratimin e Ligjit për Ndihmë Juridike, por edhe të Projektligjit për shërbimet e shoqërisë informatike dhe një sërë projektligjesh tjera.

Kamishi: Kurti të përgjigjet

Deputeti i PDK-së, Bekim Haxhiu, që ndryshe njihet në opinion si “Kamishi” i ka deklaruar gazetës “Zëri” se është në pritje të përgjigjeve nga Albin Kurti për, siç thuhet, të kaluarën e tij të dyshimtë dhe lidhjet që vazhdon t’i ketë me një grua serbe. Haxhiu tha se Rexhep Selimi nuk është avokat i Albin Kurtit dhe ky i fundit duhet të përgjigjet në pyetjet e shtruara deri më datën 9 shkurt, në të kundërtën do të dalë me fakte.