Kryeprokurorja e EULEX-it, Jaroslava Novotna, në ditën e dytë të punës së saj në Kosovë ka refuzuar kërkesën e mbrojtjes për të përjashtuar nga lënda prokurorin në rastin e Fatmir Limajt dhe nëntë bashkëluftëtarëve të tij, Maurizio Salustron, dhe po ashtu ka refuzuar kërkesën që i njëjti të ftohet në këtë rast në cilësinë e dëshmitarit.

Vendimi ka ardhur të enjten dhe atë pas urdhrit të gjyqtarit të rastit, që e kishte dhënë të martën në Gjykatën e Qarkut në Prishtinë, ditë në të cilën avokati i Fatmir Limajt, Karim Khan, ka lajmëruar gjykatën për kërkesën të cilën e ka paraqitur që të përjashtohet nga ky rast prokurori Salustro, dhe pa përgjigjen e tillë nuk kishte bazë ligjore për vazhdimin e gjykimit.

Sipas vendimit, një kopje të së cilës e ka siguruar gazeta, “kërkesa për përjashtimin e një prokurori nga një procedurë penale në mënyrë që ai/ajo të ftohet si dëshmitar/e nuk mbështetet në ndonjë bazë të ligjit”, thuhet në versionin shqip të vendimit të lëshuar nga kryeprokurorja, vendim të cilin ajo e ka adresuar tek Gjykata e Qarkut në Prishtinë.

Avokati Khan në kërkesën e dorëzuar ka kërkuar fillimisht që të ketë përgjigje me shkrim nga ana e prokurorit të rastit Limaj, Maurizio Salustro, për një kërkesë të dorëzuar më datën 10 janar, e për të cilën asnjëherë nuk kishte marrë përgjigje nga prokurori i rastit.

Në pikën e dytë ai kishte kërkuar nga kryeprokurorja, që prokurori i rastit të detyrohet që për pyetjet e parashtruara nga ai, ai të përgjigjet me shkrim. Në rast se kjo nuk bëhet, në pikën e tretë mbrojtësi Karim Khan ka kërkuar që Maurizo Salustro të autorizohet që të paraqitet në procedurë në cilësinë e dëshmitarit, me qëllim të dhënies së përgjigjeve të parashtruara nga mbrojtja.

Në qoftë se asnjëra nga këto nuk arrihet në pikën e katërt, avokati i deputetit Limaj ka kërkuar që prokurori special i EULEX-it, Maurizo Salustro, të tërhiqet si prokuror i rastit dhe t’i bëhet me dije Trupit gjykues të Udhëhequr nga Jonathan, që ai të ftohet si dëshmitar.

Asnjëra nga opsionet e kërkuara nga mbrojtja nuk janë pranuar nga kryeprokurorja e cila zyrtarisht punën e saj në Kosovë e ka nisur një ditë më parë.

Salustro ka imunitet

Sido që të jetë, kryeprokurorja ka dhënë arsyetimet e saj në vendim. Sipas këtij vendimi, Salustro nuk mund të thirret edhe në cilësinë e dëshmitarit në këtë rast. Për të arsyetuar këtë refuzim ajo është thirrur në Ligjin mbi Statusin, Imunitetin dhe Privilegjet e Misioneve Diplomatike, Konsullore dhe Personelin e Republikës së Kosovës dhe Praninë Ndërkombëtare Ushtarake si dhe Personelin e saj.

Ky ligj, sipas vendimit të lëshuar, “nuk do të lejojë prokurorin special të EULEX-it që të ftohet në procedurë si dëshmitar”.

Zyra për informim e EULEX-it ndërkaq, gjatë ditës së enjte në përgjigjen e dhënë rreth imunitetit të personelit ndërkombëtar të EULEX-it ka thënë se ky imunitet është dhënë nga vetë autoritetet e Kosovës.

“Nëse autoritetet vendore dëshirojnë të ndjekin penalisht ndonjë anëtar të personelit për shkak të shkeljes së ligjit, mund të bëhet kërkesë për heqje të imunitetit dhe për këtë vendosin autoritetet ndërkombëtare. Imuniteti i misionit dhe personelit është i rregulluar me ligjin vendor për imunitetin e misioneve diplomatike, ndërsa imuniteti i prokurorëve është i rregulluar me ligjin vendor për prokurorin e shtetit, neni 23 për imunitet ku thuhet: Prokurorët gëzojnë imunitet nga ndjekja penale, paditë civile dhe shkarkimi nga funksioni për veprimet e ndërmarra, vendimet e marra, apo mendimet e shprehura që janë brenda fushëveprimit të përgjegjësive të tyre”, thuhet në një përgjigje të dhënë nga misioni EULEX.

Mbrojtja e pakënaqur

Pavarësisht interpretimeve të dhëna nga ky mision, vendimi është parë si i pafavorshëm nga ana e avokatëve, të cilët njëzëri i janë bashkuar thirrjes së kolegut Karim Khan për të përjashtuar Maurizo Salustron nga cilësia e prokurorit, prokuror i cili në një aktakuzë të ngritur vitin e kaluar e të konfirmuar në shtator, i ngarkon dhjetë ish-luftëtarë të brigadës “Kumanova” për kryerjen e veprës penale të krimeve të luftës gjatë luftës në Kleçkë të Lipjanit.

Mbrojtësi vendor i Fatmir Limajt, avokati Tahir Rrecaj, ka thënë se kryeprokurorja në vendimin e marrë nuk ka dhënë përgjigje në të gjitha kërkesat e mbrojtjes, por vetëm në atë se pse prokurori Salustro nuk mund të ftohet si dëshmitar.

“Ajo nuk e ka shqyrtuar pjesën që ka të bëjë me paanshmërinë e prokurorit dhe unë mendoj se një prokuror nuk mund të përfaqësojë një aktakuzë, nëse ndaj tij ngrihen akuza nga vetë dëshmitari i rastit”, ka thënë mbrojtësi Rrecaj.

Një gjë e tillë edhe po të mos ekzistonte kërkesa e mbrojtjes, sipas tij, do të duhej ta detyronte prokurorin që vetë të tërhiqej nga rasti dhe atë në rrethana etike dhe profesionale.

Vendimi tashmë është marrë dhe sipas avokatit Rrecaj, ndaj tij, nuk ka të drejtë ankese. E tëra çfarë i ka mbetur mbrojtjes, sipas tij, është që të vazhdojnë kërkesën për largimin e prokurorit nga rasti.

“Ne do të kërkojmë nga trupi gjykues dhe do të propozojmë heqjen e imunitetit të prokurorit dhe një imunitet i tillë konsideroj se mund të hiqet për shkak të provave të cilat posedon mbrojtja”, ka përfunduar Rrecaj.