Pas një debati që ka hapur gazeta “Zëri” rreth dy neneve të draftit të Kodit Penal të Kosovës, të cilat nga komuniteti i medieve janë cilësuar si nene që pamundësojnë gazetarinë profesionale dhe mediet i fusin nën kontrollin qeveritar, është marrë vendim që nenet në fjalë të hiqen tërësisht nga ky dokument.

Vendimi për eliminimin e neneve 37 dhe 38 është marrë nga sponzorizuesi i Kodit Penal, përkatësisht nga ministri i Drejtësisë, Hajredin Kuçi, pas një takimi që ka pasur me anëtarët e Asociacionit të Gazetarëve Profesionistë të Kosovës (AGPK).

Kuçi ka thënë se ka përcjellë me vëmendje debatin e iniciuar për çështjen në fjalë dhe frikën që kanë ngjallur këto dy nene tek komuniteti i medieve, prandaj ka vendosur që në Kodin e ardhshëm Penal të mos figurojnë ato.

Ai madje ka thënë se do të propozojë që të ketë shkallë më të lartë për personat që pengojnë gazetarët teksa ata bëjnë punën e tyre.

Heqja e dy neneve nga drafti i Kodit Penal, është përshëndetur edhe nga drejtuesit e AGPK-së, të cilët këtë hap e kanë vlerësuar si veprim pozitiv të ministrit Kuçi.