(E plotësuar) Lidhja Demokratike e Dardanisë është shumë pranë bashkimit me Aleancën për Ardhmërinë e Kosovës. Kështu kanë bërë të ditur burime të “Zërit” të afërta me këto parti. Sipas këtyre burimeve, kryetari i LDD-së Nexhat Daci para disa dite është takuar me deputetin e AAK-së, Daut Haradinaj, ku ka shprehur interesim për kalimin e partisë së tij në radhët e AAK-së.

“Para dy jave Daut Haradinaj ka zhvilluar një takim privat me kryetarin e LDD-së Nexhat Daci, ku ky i fundit ka shprehur interesim që LDD-ja të bashkohet me AAK-në, në mënyrë që të jenë të gatshëm para zgjedhjeve parlamentare. Megjithatë, nuk është marrë asnjë vendim. Pritet që edhe në të ardhmen të ketë bisedime për këtë çështje”, ka thënë ky burim.

Mirëpo, as zyrtarët e AAK-së e as ata të LDD-së nuk e kanë konfirmuar një takim dhe një iniciativë të tillë.

“Unë nuk jam i informuar nëse ka biseda për aderimin e tërë LDD-së në AAK, por mendoj se në Aleancë ka hapësirë të mjaftueshme për këtë parti pasi se ajo ka treguar se ka kuadro dhe njerëz që ia vlen të bashkohen në AAK. Ne kemi shprehur gjithmonë gatishmërinë tonë edhe për të gjithë ata që e pranojnë programin e Aleancës që të na bashkohen”, tha për “Zërin”, Ahmet Isufi, nënkryetar i AAK-së.

Sipas tij, ka mjaft raste individuale, por edhe grupore të degëve të LDD-së që kanë kaluar në AAK. Megjithatë, Isufi thotë se Aleanca nuk e ka parë të domosdoshme që të gjitha rastet e tilla t’i bëjë publike.

Ndërsa Donika Kada-Bujupi, nga AAK-ja, thotë se është një numër i madh i ish-zyrtarëve të LDD-së që tashmë kanë kaluar në AAK.

“E tëra që mund të them është se një numër i madh i ish-zyrtarëve të LDD-së tashmë janë në AAK. Aleanca gjithmonë ka shprehur gatishmërinë dhe vullnetin që t’i hapë dyert për të gjithë ata që e shohin veten në këtë parti”, tha Bujupi.

Kryetari i LDD-së, Nexhat Daci, ndërkaq nuk ka pranuar që të flasë për “Zërin” në lidhje me këtë çështje.

Ndërkohë nënkryetarja e LDD-së, Besa Gaxherri, tha se kryesia e partisë asnjëherë nuk e ka diskutuar çështjen e bashkimit apo shkrirjen në ndonjë subjekt politik, në këtë rast me AAK-në.

“Po nëse ka diçka mes kryetarit të partisë dhe strukturës drejtuese të Aleancës, atëherë u mbetet atyre që ta sqarojnë këtë çështje. Por në strukturat drejtues të partisë asnjëherë nuk është diskutur kjo çështje”, tha Gaxherri.

Lidhja Demokratike e Dardanisë është themeluar pas Kuvendit Zgjedhor të 2006-ës të LDK-së, ku pati edhe rrahje ndërmjet anëtarëve të LDK-së. Në zgjedhjet e 2007-ës, LDD-ja kishte arritur të hyjë në Kuvend, madje duke fituar mbi 10 ulëse në Kuvend, por në zgjedhjet e 2010-ës, partia e Dacit nuk kishte arritur ta kalonte pragun.

Ky dështim i LDD-së në zgjedhje, kishte shumë anëtarë të saj që ta lënë këtë parti, madje disa duke u kthyer në “Shtëpinë e vjetër”- LDK e disa nëpër parti tjera.