(E plotësuar) Ministria e Punëve të Jashtme (MPJ) nën drejtimin e ish-ministrit Skender Hyseni, i ka shpërblyer me pozita të larta dhjetëra kandidatë që gjatë intervistimit janë radhitur të fundit në listë për nga pikët e fituara, ndërkaq, të kundërtën e ka bërë me kandidatët që janë treguar më të suksesshëm.

Sipas një dokumenti që ka siguruar “Zëri”, ku janë të radhitur kandidatët në bazë të pikëve që kanë marrë gjatë intervistimeve në vitin 2009 për pozita të ndryshme në shërbimin diplomatik e konsullor, shumë prej tyre që kanë marrë pikë minimale janë përzgjedhur si pjesë e stafit diplomatik e konsullor nëpër ambasada të ndryshme, derisa kandidatë me pikë më të larta kanë rënë nga “kombinimi”.

Madje, Komisionit Intervistues të MPJ-së i kanë mjaftuar vetëm 4.3 pikë që ka marrë Agron Smakiqi, që atë ta bëjë sekretar të parë në Ambasadën e Kosovës në Shkup. Me vetëm pak pikë më shumë sesa Smakiqi, me 7.3 pikë, Burim Qorri është emëruar si sekretar i parë në Ambasadën e Kosovës në Tiranë.

Përzgjidhen të dobëtit, injorohen të suksesshmit

Në saje të punës “profesionale” dhe “korrekte” që ka bërë komisioni i atëhershëm që përbëhej prej Qerim Qerimit- këshilltar i parë i ish-ministrit Hyseni, Fitim Gllarevës- ish- sekretar permanent në MPJ, Lulzim Mjekut- drejtor i Drejtorisë së përgjithshme në MPJ, Besfort Rrecajt- këshilltar i ish-zëvendësministres së Jashtme, Vlora Çitaku, Suzana Krasniqit- nga Departamenti Ligjor i MPJ-së dhe Melhin Mahmutit- poashtu nga MPJ, sot Republika e Kosovës ka dhjetëra zëvendëskonsuj që gjatë intervistimit nuk janë treguar edhe aq të suksesshëm.

Arben Muhameti është bërë zëvendëskonsull në Romë vetëm me 10.3 pikë, Imer Lladrovci në Shtutgard me 12.5 pikë, Mustafë Avdiu në Paris me 14 pikë dhe Isa Kosumi në Vjenë me 15. 8 pikë.

Për më tepër, falë vetëm 12.3 pikëve të fituara, sot Naser Idrizi është sekretar i parë në Ambasadën e Kosovës në Slloveni, ndërsa të njëjtën pozitë në Vjenë e mbanë Zana Rugova, e cila ka marrë vetëm 15 pikë. Me vetëm 0.5 pikë më shumë sesa Rugova, Fatmire Musliu është bërë sekretare e parë në Berlin.

Por kjo nuk është e tëra. Që nga viti 2009 Valon Krasniqi punon si ministër-këshilltar në Bruksel, pavarësisht se kishte arritur vetëm 14 pikë, ndërsa një pjesë e madhe e stafit diplomatik e konsullor janë punësuar pavarësisht se kishin arritur të grumbullojnë prej 16 deri në 19 pikë.

Sipas dokumentit që ka siguruar gazeta, derisa kandidatët me numër shumë të vogël të pikëve kanë zënë pozita të larta në shërbimin diplomatik e konsullor, konkurrentët e tyre me numër maksimal të pikëve (20-28) nuk kanë arritur të punësohen.

Laura Selmani (20.6 pikë), Petrit Sopjani (24.5 pikë) Mehdi Bislimi (24.5 pikë), Srdjan Sentic (24 pikë), Albert Kuçi (21.3) janë vetëm disa nga personat që nuk kanë arritur të punësohen pavarësisht nga numri maksimal i pikëve. Madje, ndër ta është edhe magjistri i Marrëdhënieve Ndërkombëtare, Faton Bislimi, i cili në vitin 2009 ka qenë duke ligjëruar në disa universitete, ndër to edhe në Universitetin Amerikan të Kosovës, ndërkaq aktualisht është duke doktoruar në Kanada.

Gllareva e Mjeku i ruajnë “sekretet”

Gazeta ka bërë përpjeke që të marrë sqarime nga personat që punojnë në shërbimin diplomatik e konsullor falë pikëve të pakta që kanë marrë, por një gjë e tillë ka qenë e pamundur.

“Pyetni komisionin (si jam pranuar)”, ka thënë nëpërmjet telefonit sekretari i parë i Ambasadës së Kosovës në Shkup, Agron Smakiqi, i cili ka marrë vetëm 4.3 pikë.

Por, përgjegjësisë i kanë ikur edhe ish-anëtarët e komisionit.

Derisa Lulzim Mjeku, që aktualisht është drejtor në Drejtorinë e Përgjithshme të MPJ-së e ka mbyllur telefonin me të kuptuar se flet me gazetarë, ish-sekretari i kësaj ministrie, tani zëvendësambasador në Bullgari, Fitim Gllareva, ka thënë se nuk është kompetent të flasë për çështjen në fjalë.

Ndërsa, ish-ministri i Jashtëm, Skender Hyseni, ka thënë nëpërmjet telefonit se nuk është i informuar në detaje se çfarë ka ndodhur gjatë intervistimit, por, sipas tij, pikët gjatë këtij procesi kanë qenë vetëm disa nga kriteret për punësim.

“Poenët kanë qenë njëra nga kriteret. Nëse është futur në listë dikush dhe e ka kaluar minimumin e poenëve, ai automatikisht është kualifikuar që të shkojë diku. Ka plot persona që kanë pasur numër të madh të poenëve, por s’u ka pëlqyer ku i kemi rekomanduar dhe nuk ka shkuar, pra ka shkuar tjetri”, ka thënë ai, duke mos preferuar që të japë përgjigje nëse është bërë ose jo shkelje kur Komisioni ka përzgjedhur personat që kanë jashtëzakonisht pak pikë dhe ka injoruar ata me më shumë të tilla.

Në MPJ mbizotëroi familjarizimi dhe politizimi

Por analisti politik, Avni Zogiani, thotë se gjatë përzgjedhjes së kandidatëve për të ndërtuar sistemin diplomatik e konsullor të Kosovës, MPJ-ja ka respektuar maksimalisht lidhjet familjare dhe politike me disa persona në mënyrë që atyre t’ua sigurojë nga një vend pune.

“Në rastet kur nuk ka pasur nepotizëm politik, ky proces ka shërbyer edhe si rekrutim i njerëzve të devotshëm prej shoqërisë civile dhe prej sektorëve tjerë, për shembull, gazetarisë. Është një proces krejtësisht i deformuar që nuk ka respektuar asnjë parim”, thotë ai, duke shtuar se i tërë procesi i ndërtimit të rrjetit diplomatik e konsullor është ndërtuar mbrapsht.

Ndërsa, zëvendësministri i Punëve të Jashtme, Petrit Selimi, thotë se MPJ-ja ka trashëguar një sërë sfidash në operim nga puna e ish-udhëheqësve të këtij dikasteri, të cilat nisin me stafin joadekuat e deri tek mungesa elementare e kushteve për punë.

“Fatkeqësisht, një pjesë e madhe e punës shkon në përmirësimin logjistik dhe kadrovik sepse mbi gjysma e stafit të MPJ-së punojnë në bodrume të ndërtesës "Gërmia" pa dritë dielli, ndërsa ka diplomatë që nuk flasin gjuhët përkatëse”, thotë ai.

Nuk do të ketë ndryshime të mëdha

Zëvendësministri Selimi thotë se ministri i Jashtëm, Enver Hoxhaj, është zotuar se nuk do të ketë ndryshime radikale në stafin diplomatik e konsullor, por vetëm përmirësime dhe trajnime të tij.

“Për herë të parë në historikun e MPJ-së kemi iniciuar një program të gjerë trajnimesh brenda dhe jashtë vendit, edhe me ndihmën e Fondacionit Soros dhe disa ministrive mike evropiane. Ne presim që të ngremë kualitetin e punës te shumë kuadro. Po ashtu, sivjet do të kemi edhe praktikantë në punë nga ministri evropiane duke krijuar ambient të ndërkombëtarizuar të punës dhe bartje të diturisë me ministri mike homologe”, thotë Selimi.