Instituti KIPRED të hënën përmes një konference për medie ka vlerësuar se sistemi i drejtësisë në Kosovë ka dështuar në dënimin e atyre që vodhën votat në zgjedhjet e 2010 dhe ka kërkuar luftimin dhe dënimin e krimit elektoral. KIPRED vlerëson se dështimi që të dënohen këto praktika, siç i ka quajtur, të papranueshme, do të jep shembull të keq dhe do të inkurajojë ata që vodhën vota që ta shkelin ligjin përsëri.

Ardian Arifaj nga KIPRED, ka rekomanduar që Kosova t’i ketë shtatë zona zgjedhore, me qëllim që të forcohet lidhja votues-përfaqësues.

“PDK, LDK dhe AKR, me marrëveshjen politike mes tyre për zgjedhjen e presidentit në prill të vitit 2011 ishin marrë vesh edhe që Kosova të ndahet në disa zona elektorale. Forma e tanishme, sipas së cilës e tërë Kosova është një zonë elektorale, ka mundësuar një përfaqësim të të gjitha rajoneve dhe është zgjidhja më e mirë për përfaqësimin e komuniteteve joshumicë. Por, për të përmirësuar edhe më përfaqësimin dhe për të forcuar lidhjet mes votuesve dhe të votuarve, rekomandohet që Kosova të ndahet në disa zona”, ka thënë Arifaj.

Kjo, sipas tij, do të ndikonte pozitivisht edhe në emancipimin e partive politike pasi do të

inkurajonte demokracinë brendapërbrenda partive duke lejuar që më shumë kandidatë të dalin në skenë si të preferuarit e votuesve.

“KIPRED rekomandon që votimi për një kandidat është opsioni më i mirë për një proces më të lehtë elektoral si dhe për t’u dhënë votuesve që të zgjedhin ligjbërësin e tyre rajonal, ngase votimi për më shumë kandidatë ka qenë një nga burimet kryesore të manipulimeve. Një votë një kandidat e zvogëlon abuzimin me vota”, ka thënë Arifaj.

Ambasadori i Britanisë së Madhe në Kosovë, Ian Cameron Cliff, ndërkaq, tha se Kosova duhet të gjejë një zgjidhje stabile për një sistem zgjedhor në mënyrë që të mos ketë nevojë të shpeshtë të ndryshimeve zgjedhore.

Një fakt që e ka shqetësuar ambasadorin Cliff është se në secilën palë të zgjedhjeve që janë mbajtur në Kosovë ato janë mbajtur me ligj të ndryshëm. Prandaj, sipas tij, abuzimet me zgjedhjet nuk luftohen vetëm me ligje. “Këtu duhet të ndikojnë partitë politike”, ka thënë Cliff.