(E plotësuar) Propozimi i presidentit të Serbisë, Boris Tadiq, për bosnjëzimin e Kosovës, nuk ka ngjallur as më të voglin shqetësim të Qeverisë së Kosovës. Kjo e fundit nuk e ka parë të arsyeshme që të reagojë ndaj këtij propozimi, i cili ka disa ditë që është prezantuar detajisht edhe në mediet kosovare.

I vetmi reagim është ai i zëvendëskryeministrit, Hajredin Kuçi, i cili i pyetur nga gazeta “Zëri” për mundësinë e dhënies së një statusi special për veriun, ka thënë shkurt nëpërmjet një sms-je “çdo zgjidhje për veriun do të jetë brenda Kushtetutës dhe pakos së Ahtisaari-t”.

Presidenti i Serbisë, Boris Tadiq, përmes një plani katër pikësh, tenton krijimin e një entiteti të veçantë në veri të Kosovës, të ngjashëm me Republikën Serbe të Bosnjes.

Presidentja Atifete Jahjaga dhe liderët opozitarë, ndërkaq, kanë kundërshtuar ashpër të gjitha propozimet që vijnë nga Beogradi, apo edhe nga përfaqësuesit ndërkombëtarë për mundësinë e statusit special për veriu e Kosovës. Sipas tyre, zgjidhja e çështjes së veriut duhet të bëhet në përputhje me Kushtetutën dhe Pakon e Ahtisarit.

Presidentja, Atifete Jahjaga, ka deklaruar se zgjidhja e vetme për tri komunat në veri të Kosovës është zbatimi i plotë i pakos së Ahtisaarit. “Kjo nuk ka alternativë.

Sundimi i rendit dhe ligjit do të jetë i pakompromis në tërë territorin e Republikës së Kosovës, sepse duhen luftuar strukturat e krimit të organizuar dhe të kontrabandës e të korrupsionit dhe duhet të shuhen strukturat ilegale, të cilat janë të mbështetura nga shteti fqinj i Serbisë”, ka thënë ajo në një intervistë për “Deutsche Welle”.

Mirëpo, kreu opozitar, Isa Mustafa, ka shprehur shqetësimin për gjendjen në veri të vendit, duke thënë se pakoja e Martti Ahtisaari-t mbetet e vetmja zgjidhje për veriun. “Nuk pranojmë asnjë lloj statusi për veriun, i cili dallon nga territori tjetër i vendit, përfshirë edhe statusin special. Bile preferojmë që ai të mos jetë pjesë e fjalorit tonë. Vendi duhet të qeveriset në mënyrë unike, ashtu siç e ka paraparë Kushtetuta dhe nuk pranojmë asnjë lloj asimetrie me qeverisjen e vendit”, ka thënë ai.

Sipas tij, bisedimet me Beogradin po zhvillohen pa asnjë kriter dhe po prekin Kushtetutën dhe sovranitetin e pranuar ndërkombëtar të Kosovës. “Qeveria ka vijuar, pa asnjë platformë dhe pa agjendë, madje pa listë temash dhe pa rend dite, takimet dhe bisedimet me Serbinë për çështje shumë të ndjeshme, që prekin Kushtetutën dhe sovranitetin e pranuar ndërkombëtar të Kosovës”, ka thënë Mustafa, të hënën, në një konferencë me gazetarë.

Sipas tij, gjendja në veri të vendit vijon të jetë shumë e rëndë, me mungesë të plotë të sundimit të ligjit dhe me cenim të përditshëm të sovranitetit të Republikës së Kosovës, mosrespektimit të Kushtetutës dhe të ligjeve të Kosovës.

“Qeveria dhe institucionet përkatëse të vendit nuk po bëjnë asgjë dhe thuajse kanë harruar se ekziston ky problem, i cili ka mbetur vetëm në duar të KFOR-it”, ka thënë ai.

Nga ana tjetër përfaqësuesit e Luginës së Preshevës janë shprehur në favor të bashkimit me Kosovën, që do t’i hapte rrugë shkëmbimit të territoreve. Riza Halimi, i cili është deputeti i vetëm shqiptar në Parlamentin e Serbisë, është pajtuar me propozimin e diplomatit austriak, Erhard Busek, për shkëmbim territoresh.

Ndërkaq, zëdhënësi i ICO-së, Christian Palme, i pyetur nga gazeta nëse Pieter Feith do ndërhynte për të ndaluar një plan për veriun që bie ndesh me Pakon e Ahtisaarit, ka thënë: “Në fund, i takon Qeverisë së Kosovës që të punojë me qytetarët e saj në veri për të krijuar një model funksional të qeverisjes lokale që u jep atyre siguri dhe pranim të plotë të identitetit të tyre, brenda një Republike të qëndrueshme e sovrane të Kosovës”.

Thaçi të vendosë për takim me Tadiqin

Kryetari i LDK-së, Isa Mustafa, ka deklaruar se i mbetet kryeministrit Hashim Thaçi nëse do të takohet apo jo me presidentin serb Boris Tadiq. “Është çështje e vendimit të tij a do të takohet apo jo, por ne asnjëherë nuk do të pajtohemi që jo vetëm Thaçi por asnjë personalitet dhe përgjegjës i institucioneve të Kosovës të takohet në pozita jo të barabarta me dikë nga Serbia dhe të takohet për çështje që e prekin integritetin territorial, e prekin sovranitetin dhe e prekin rregullimin shtetëror të Republikës së Kosovës”, tha Mustafa, duke shtuar se për këto çështje LDK nuk pajtohet të bisedojë askush jo vetëm me Serbinë por as me vendet tjera.