Presidentja Atifete Jahjaga, ka pritur në takim përfaqësuesin e posaçëm të Bashkimit Evropian në Kosovë, Samuel Zbogar, me të cilin diskutoi për zhvillimet aktuale në vend, çështjen e dialogut me Republikën e Serbisë dhe zhvillimet në tri komunat në veri të Kosovës.

Në një komunikatë nga Presidenca e Republikës thuhet se Jahjaga në takimin e saj me zyrtarin evropian theksoi domosdoshmërinë e përmbushjes së detyrave që dalin nga Plani Ahtisaari dhe që bashkërisht të punohet në përmbylljen e fazës së mbikëqyrjes ndërkombëtare për Kosovën.

Ajo është zotuar se institucionet e Kosovës do t’i përmbushin obligimet e tyre kushtetuese dhe të marrin përgjegjësitë që do të ndihmonin mbylljen e suksesshme të Zyrës Civile Ndërkombëtare deri në fund të këtij viti.

Jahjaga po ashtu tha se Kosova është shtet sovran dhe i pavarur dhe ajo duhet të trajtohet dhe të përfaqësohet në mënyrë të barabartë me të gjitha shtetet e tjera të rajonit.

Njëherësh, Jahjaga ka thënë se Kosova është e përkushtuar që së bashku me partnerët ndërkombëtarë të zbatojë Kushtetutën e saj në gjithë territorin e Republikës, përfshirë edhe tri komunat në veri të vendit.

Ndërkaq, Zbogar theksoi gatishmërinë për bashkëpunim me institucionet e Kosovës duke vlerësuar se suksesi i vendit do të jetë sukses i përbashkët edhe i BE-së. Ai tha se ka një përkushtim për ta ndihmuar Kosovën në rrugën e saj të integrimeve evropiane. /Zëri/