(E plotësuar) Zëvendësshefi i EULEX-it, Andy Sparks nuk do ta ketë problem qarkullimin në veri të Kosovës pasi autokolona e tij duket se nuk do të pengohet më nga serbët e veriut, njëjtë siç ndodhi në tetor të vitit të kaluar. Lëvizjen e lirë të Sparksit dhe EULEX-it në përgjithësi e ka siguruar UNMIK-u, edhe pse për këtë nuk ka pasur asnjë informim zyrtar. Të njohur me këtë risi nuk janë as zyrtarët e misionit evropian, të cilët sipas burimeve të “Zërit” janë të shqetësuar pasi nuk e dinë si e arriti UNMIK-i këtë gjë kur ata ka kohë që e kërkojnë.

“Ka disa ditë që nga 10 përpjekje të ekipeve të EULEX-it për të shkuar nga Mitrovica në pikat kufitare të veriut, 9 raste kanë pasur sukses. Ata nuk e dinë pse ka ndryshuar qëndrimi i serbëve për këtë gjë, por dyshojnë që fjala është për një marrëveshje, të cilën UNMIK-u e përmend sipërfaqësisht në raportin e fundit të Ban Ki Munit. Mirëpo, ajo që i shqetëson më shumë ata në EULEX është mënyra apo kushtet se si e arriti këtë gjë UNMIK-u”, thotë një zyrtar i një prej misioneve diplomatike të Quintit.

Në përgjigjen e shkurtër që EULEX-i i ka kthyer “Zërit” e pranon se situata në terren ka ndryshuar për të mirë, por e hedh poshtë që ata kanë qenë të përfshirë në çfarëdo negociate.

“Gjatë ditëve të fundit, EULEX-i në përgjithësi ka qenë në gjendje që të përdorë rrugët për të shkuar në Portat 1 dhe 31. Kjo natyrisht që është e mirëseardhur. EULEX-i megjithatë nuk ka qenë i përfshirë në asnjë marrëveshje për të lehtësuar ndryshimet e fundit, edhe pse ne kemi bërë presion që një kohë të gjatë për përmirësimin e situatës”, thuhet në përgjigjen që ia ka kthyer “Zërit”.

Bani e përmend “aranzhimin e kompromisit”

Zyra për informim e UNMIK-ut në Prishtinë, zyrtarisht nuk pranon ta komentojë marrëveshjen dhe as pranon ta konfirmojë se ka një të tillë. Shkurtimisht në përgjigjen e kthyer “Zërit” përmes postës elektronike, UNMIK-u e hedh poshtë idenë nëse ka pranuar kushte për të lehtësuar qarkullimin e lirë në veri.

“Derisa UNMIK-u ka qenë i angazhuar aktivisht duke biseduar me palët, në veçanti me liderët serbë të veriut, si dhe me zyrtarët në Beograd, KFOR-i dhe EULEX- si dhe përfaqësuesit e tjerë ndërkombëtarë kanë qenë gjithashtu duke bërë përpjekjet e tyre që të sigurojnë lirinë e lëvizjes për njerëzit dhe mallrat në veri, pa asnjë kusht”, thuhet në përgjigjen e UNMIK-ut.

Sidoqoftë, gjatë së dielës, redaksia e Zërit është kontaktuar nga zyrtarë të këtij misioni për ta sqaruar se prapa përpjekjeve të tyre për të mundësuar lirinë e lëvizjes nuk fshihet asgjë e keqe.

“Nuk ka ndonjë marrëveshje, pasi fjala është më shumë për një marrëveshje xhentëlmenësh. KFOR-i ka qenë aty, EULEX-i gjithashtu. Nuk ka asgjë sekrete këtu, asnjë dredhi. Ideja ka qenë që të mblidhen të gjithë rreth një tavoline dhe të flasin sinqerisht me njëri-tjetrin. S’është asgjë e madhe, edhe pse ato takime kanë ndihmuar shumë”, është sqarimi që ka dhënë një zyrtar ndërkombëtar pasi “Zëri” ka kontaktuar zyrën për informim të UNMIK-ut.

Në fakt, para pak ditësh në raportin e fundit për Kosovën që është prezantuar nga Sekretari i Përgjithshëm i OKB-së, Ban Ki Mun, sipërfaqësisht kjo “marrëveshje xhentëlmenësh” është përmendur në kapitullin “Zhvillimet politike dhe veriu i Kosovës”, pika 8. Fjala e fundit e raportit të Banit thotë:

“Duke iu afruar fundit të fazës së raportimit (faza tremujore e raporteve në Këshill të Sigurmit), një aranzhim kompromisi që lejon EULEX-in të lëvizë, e avokuar nga Përfaqësuesi im Special (Zarif), është aplikuar me sukses në disa raste”.

Kjo pikë përfundon pa sqaruar se çfarë nënkuptohet me “aranzhim kompromisi” , pra nëse është dashur të bëhet një kompromis për t’ia siguruar mundësinë EULEX-it që të lëvizë lirshëm nëpër veri.

Prej intervenimit të njësive speciale të Policisë së Kosovës, ROSU dhe njësisë për intervenim të shpejtë, FIT, strukturat serbe të veriut kanë nxitur banorët për të barrikaduar rrugët, duke pamundësuar lëvizjen e lirë në këtë pjesë të Kosovës. Pas përpjekjeve të dështuara të KFOR-it për t’i larguar ato dhe takimeve të shumta me strukturat ilegale të veriut, disa barrikada janë hequr duke krijuar mundësinë që automjetet e KFOR-it të lëvizin në këtë zonë.

Megjithatë, misioni evropian vazhdonte të përballej me bllokada, duke mos ia lejuar qarkullimin në veri. Për serbët EULEX-i punon për të forcuar shtetin e Kosovës, të cilin ata nuk e pranojnë.