Të paktën 8 zyrtarë të UNMIK-ut, që operojnë në veri të Mitrovicës, punojnë edhe në komunën paralele të Serbisë. Dragan Spasojeviq, drejtor i Urbanizmit në Administratën e UNMIK-ut në veri të Mitrovicës (UAM), ka të njëjtën pozitë edhe në komunën ilegale të Serbisë.

Edhe Borivoje Gjuriq, merr dy rroga dhe ka dy pozita të ngjashme të në dy mekanizmat. Në të dyja ai është drejtor për financa dhe ekonomi. Njëjtë vepron edhe drejtori tjetër, Momçilo Baroviq.

Të dhënat për zyrtarët që paguhen edhe nga buxheti i Kosovës nëpërmjet UAM-it, edhe nga buxheti i Serbisë nëpërmjet komunës paralele, i di Qeveria e Kosovës dhe ICO-ja. Në një dokument të hartuar nga ICO-ja dhe Qeveria, ku planifikohet mbyllja e administratës së UNMIK-ut në veri të Mitrovicës që financohet nga Qeveria e Kosovës, puna e dyfishtë e këtyre zyrtarëve përmendet si një nga arsyet se pse duhet mbyllur UAM-in.

Administrata e UNMIK-ut në veri të Mitrovicës ka një staf prej 163 persona në dhjetë departamente. Udhëheqësit e tetë prej këtyre departamenteve punojnë edhe në komunën paralele serbe, e cila, sipas Rezolutës 1244, është ilegale.

Përveç tre drejtorëve, që kanë pozita të njëjta, pesë drejtorë tjerë të UAM-it kanë punë të dyta në komunën paralele.

Millosh Milidragoviq, Katas Shqekiq, Zoran Bratiq, Bilana Petroviq, Zoran Smikiq, janë drejtorët që marrin paga edhe nga buxheti i Kosovës edhe nga ai i Serbisë. Në dokumentin e publikuar ditë më parë nga “Koha Ditore”, konstatohet se “80 për qind e UAM-it është e njëjtë me komunën paralele të Serbisë”. /koha/