(E plotësuar) Propozimi për dekretimin e nëntë ambasadorëve të rinj të Republikës së Kosovës, ka ndarë në dysh stafin e presidentes Atifete Jahjaga, ndërsa vetë këtë të fundit e ka vënë në “mes të dy zjarreve”.

Derisa pjesa dërmuese e stafit, përfshirë edhe Zyrën Ligjore të Presidencës, është duke i rekomanduar të parës së vendit që të mos e miratojë listën me emrat e kandidatëve për ambasadorë, pjesa tjetër preferon që të dekretojë listën e kandidatëve.

Burime të besueshme të “Zërit” të afërta me Presidencën kanë treguar se Jahjaga është duke u përballur me “dy pole” të presionit, gjë që ka ndikuar që ajo të mos e marrë një qëndrim të prerë “ta nënshkruaj ose të mos e nënshkruaj listën”.

“Zyra Ligjore dhe shumica e këshilltarëve po i bëjnë presion presidentes që të mos e nënshkruajë ngase gjatë përzgjedhjes së kandidatëve është shkelur Ligjit për Ndryshimin dhe Plotësimin e Ligjit për Ministrinë e Punëve të Jashtme dhe Shërbimin Diplomatik (paragrafi 7, pika 7), ndërsa kundër këtij qëndrimi është këshilltari i presidentes, Ramush Tahiri, i cili po insiston që presidentja ta nënshkruajë atë”, ka thënë burimi.

Ndryshe ishte vetë Ramush Tahiri, i cili ia kishte shkruar fjalimin Jahjagës gjatë përvjetorit të PDK-së, fjalim ky që ngjalli reagime gjithandej opinion kosovar.

Muaj më parë “Zëri”, ndërkaq, ka raportuar se propozimi për emërimin e nëntë ambasadorëve nga Ministria e Punëve të Jashtme (MPJ), është në kundërshtim me ligjin, i cili kërkon që gjysma e ambasadorëve të emëruar të jenë të rinj, ndërsa gjysma tjetër ambasador ekzistues, por vetëm t’iu ndërrohet vendi i shërbimit.

Sipas këtij propozimi, Bukurije Gjonbalaj do të shkojë në Romë, Vjosa Dobruna në Amerikën Latine, Mimoza Rexhepi në Lubjanë, Ahmet Shala në Bruksel, Akan Ismaili në Uashington, Sylejman Selimi në Tiranë, Ylber Hysa në Shkup, Skender Xhakaliu në Berlin dhe Shpend Kallaba në Sofje. Por, asnjëri nga këta kandidatë nuk është ambasador ekzistues.

“Së paku pesëdhjetë për qind (50 %) të emërimeve të ambasadorëve dhe shefave të misioneve (diplomatike) duhet të bëhet nga anëtarët në detyrë të Shërbimit të Jashtëm të Republikës së Kosovës”, thuhet në nenin 7, pika 7 të Ligjit për Ndryshimin dhe Plotësimin e Ligjit për Ministrinë e Punëve të Jashtme dhe Shërbimin Diplomatik.

Udhëheqësja e Grupit të Ekspertëve për Politikë të Jashtme në Lidhjen Demokratike të Kosovës, Vjosa Osmani, i bën thirrje presidentes Atifete Jahjaga që të mos e nënshkruajë listën në fjalë, ngase, siç thotë ajo, në të kundërtën e para e vendit do të bëhet bashkëshkelëse e ligjit.

“LDK-ja sikur edhe më parë i bën apel presidentes që të mos bëhet pjesë e kësaj shkeljeje flagrante të ligjit dhe shkelje të praktikave diplomatike sepse besojmë fuqishëm që secili që di të lexojë e sheh se ky proces ka qenë i përshkuar me shkelje ligjore qysh nga momenti i propozimit nga ana e Ministrisë së Punëve të Jashtme”, thotë ajo, duke theksuar se neni 7.7 kërkon që gjysma e atyre që propozohen të jenë anëtarë të numrit ekzistues të shërbimit të jashtëm.

Deputetja Osmani thotë se në kuadër të stafit diplomatik ka mjaft kandidatë që mund të emërohen ambasador, dhe në këtë mënyrë të përmbushen obligimet ligjore, prandaj, sipas saj, presidentja duhet ta kthejë listën në MPJ.

Ajo thekson se Komisioni për Punë të Jashtme kohë më parë ka kërkuar një opinion ligjor nga eksperti i të Drejtës Ndërkombëtare, Zejnullah Gruda, i cili në përgjigjen e tij, ndër të tjera, ka thënë se emërimet duhet të përfshijnë 50 % nga stafi ekzistues dhe 50 % nga jashtë.

Edhe shoqëria civile kërkon nga presidentja Jahjaga që lista të mos nënshkruhet. Drejtuesit e Klubit për Politikë të Jashtme (KPJ) thonë se nëse presidentja e nënshkruan këtë listë, atëherë ajo “përlyhet” në shkeljen e ligjit.

“Nëse me këtë listë të ambasadorëve nuk është përmbushur kriteri që kërkohet me ligj, që 50 % të jenë nga stafi ekzistues, atëherë presidentja nuk duhet ta nënshkruajë. E nëse e nënshkruan, ajo do të bëhet shkelëse e ligjit”, thotë drejtori i KPJ-së, Alban Bokshi.

Ai thotë se e para e vendit deri tash është treguar e kujdesshme me ligjin, të cilin nuk e ka shkelur, por lista me emrat e kandidatëve për ambasador, siç thotë ai, mund ta fusë presidenten në vallen e atyre që shkelin ligjin në Kosovë.

“Presidentja duhet të jetë gardian i ligjit pasi që është institucioni më i lartë në vend”, thotë ai, duke theksuar se Jahjaga aktualisht gjendet në pozitë shumë të vështirë meqenëse është bërë presidente falë marrëveshjeve politike në vend.

Pas disa muajve debati dhe fërkimesh në mes të anëtarëve të Komisionit Parlamentar për Punë të Jashtme është arritur që komisioni t’i intervistojë kandidatët dhe më pas secili anëtar t’i dërgojë përshtypjet e tij për secilin kandidat te presidentja, nga nënshkrimi i së cilës varet nëse kandidatët do të bëhen ambasadorë, ose nëse procesi do të kthehet në pikën zero.

Papërgjegjshmëria e Vllahiut!

Redaksia e “Zërit” ka pritur të martën Arbër Vllahiun nga Presidenca e Kosovës që të përgjigjet në dy pyetje të vetme rreth arsyes së mosnënshkrimit të listës së kandidatëve për ambasador, por ai nuk është përgjigjur. Fillimisht Vllahiu e ka pranuar nëpërmjet telefonit se i ka marrë pyetjet, por më pas nuk është përgjigjur, ndërsa komunikimi me të ka qenë i pamundur, sepse telefonin e ka shkyçur nga rrjeti.