Në ditën e 4 vjetorit të Pavarësisë së Kosovës kryeministri i Shqipërisë, Sali Berisha dhe ai i Kosovës Hashim Thaçi të premten kanë prerë shiritin e inaugurimit duke çelur kështu zyrtarisht edhe ambasadën e Kosovës në Tiranë.

Në fjalën e mbajtur me këtë rast Thaçi u shpreh se Shqipëria dhe Kosova janë një komb por dy shtete dhe kështu do vijohet të ecet drejt Bashkimit Evropian dhe se tani po ndodh ajo që i ka munguar Kosovës.

Më tej ai ka falënderuar kryeministrin Berisha dhe gjithë kombin shqiptar për mbështetjen e dhënë. Sakaq, kryeminsitri Berisha e cilësoi këtë si një moment shumë të rëndësishëm në marrëdhëniet vëllazërore midis dy vendeve.

“Ambasada e Republikës së Kosovës në Tiranë, sikundër ambasada e Shqipërisë në Prishtinë, kanë mision të dyfishtë, kanë mision forcimin e pozitës ndërkombëtare të dy vendeve, bashkëpunimin rajonal dhe ndërkombëtar, por kanë misionin tjetër kombëtar, të kapërcimit me vendosmëri të të gjitha pasojave të krijuara gjatë një periudhe të gjatë ndarjesh, kufizimesh e bllokimesh të pamerituara”.

“Unë jam i bindur se në udhëzimet e Qeverisë së Kosovës kjo ambasadë së bashku me ambasadën e Shqipërisë në Prishtinë do të luajnë një rol shumë të rëndësishëm në të ardhmen e përbashkët që meriton kombi shqiptar dhe dy vendet”, u shpreh Berisha.

Në vijim kryeministri shqiptar shfrytëzoi rastin t’u përcjellë përshëndetjet më vëllazërore qytetarëve të Kosovës dhe qeverisë së Kosovës si dhe shprehu vendosmërinë se me punë të përbashkët do arrihen rezultate të mëdha.

Edhe kryeministri Thaçi, shprehu gatishmërinë e Kosovës për bashkëpunim dhe i tha kryeministrit Berisha se aktualisht po përcaktohet trualli në qendër të Prishtinës për ndërtimin e Ambasadës së Shqipërisë.

Ambasada e Kosovës në Tiranë ndodhet përballë Piramidës ngjitur me Ambasadën Ruse. /NOA/