(E plotësuar) Zëvendëssekretari amerikan i Shtetit, William Burns, ka kërkuar nga institucionet e Kosovës që të fokusohen në sendërtimin e rendit dhe ligjit, me qëllim të luftimit të korrupsionit si dhe që të vazhdojnë rrugën drejt integrimeve euroatlantike, përfshirë këtu edhe shfrytëzimin e mundësisë për prezantim në forumet rajonale.

“Në veçanti ne besojmë në rëndësinë për çdo demokraci dhe shoqëri që të fokusohen në rëndësinë e sundimit të rendit dhe ligjit. Nëse shikoni përreth gjithë botës është rëndë të gjendet një shoqëri e suksesshme që ka probleme me korrupsionin”, theksoi zëvendëssekretari amerikan i Shtetit.

Burns, i cili gjatë ditës duke folur në shkuarje nga Aeroporti i Prishtinës para katër medieve kosovare, ku “Zëri” ishte i vetmi nga mediet e shtypura, konfrimoi edhe njëherë miqësinë e SHBA-ve me vendin tonë si dhe përkrahjen amerikane ndaj soverantietit dhe integritetit territorial të Kosovës.

“Miqësia e Kosovës me SHBA-të është e fuqishme. Ne jemi thellësisht krenarë me këtë. Ne mbetemi të përkushtuar në pavarësinë e Kosovës, integritetin territorial dhe sovranitetin. Kemi vizion të njëjtë për vendin tuaj që ta shohim Kosovën në drejtimin e duhur për integrim në institucionet euroatlantike, duke përfshirë NATO dhe BE-në”, theksoi Burns.

Ndihmëssektretari amerikan i Shtetit tha se SHBA po ashtu është e zotuar që ta mbështesë fuqimisht Kosovën në punën e saj sa i përket dialogut me Serbinë, të ndërmjetësuar nga BE-ja.

“Populli i Kosovës mund të gjykojë se çka është interes personal kombëtar, por përfitimet për progres nga këto mbështetje janë të qarta. SHBA-të dhe partnerët evropianë kanë thënë disa herë që ne kërkojmë që dyja palët të jenë efikase dhe kreative, të sigurohemi se Kosova dhe Serbia janë në gjendje të marrin pjesë në forume rajonale, të dyja palët duhet të gjejnë një formulë që ndihen më komode”, theksoi Burns.

Duke folur për prezantimin e Kosovës në forumet rajonale, Burns ka shtuar se e di se sa e ndjeshme dhe e komplikuar është kjo çështje, por duke vënë theksin te rëndësia për të realizuar mundësinë e tanishme.

“Nga perspektiva jonë është se gjithë kjo çështje është se si Kosova do ta fitojë të drejtën që ta përfaqësojë vetveten në organizatat rajonale. Përfitimi i kësaj të drejte është përfitimi i shansit për ta përfaqësuar vetveten si të barabartë dhe përfaqësimi i vetvetes është një mundësi e madhe për Kosovën. Gjithë çështjet tjera teknike dhe simbolike që tërheqin shumë komente sot janë pak të rëndësishme, në krahasim me mundësinë që ta keni zërin tuaj, karrigen tuaj në tavolinë, gjithë kjo ka të bëjë me sovranitetin”, theksoi Burns.

Gjatë ditës zyrtari i lartë amerikan është takuar me kryeministrin Thaçi, presidenten Jahjaga, përfaqësues të KFOR-it, të EULEX-it dhe përfaqësuesin e ri të BE-së në Kosovë. Ai gjithashtu është takuar edhe liderët lokalë serbë në Graçanicë, si dhe ka vizituar manastirin e atjeshëm.

Burns tha se gjatë vizitës është impresionuar nga progresi që është bërë në ndërtimin e Kosovës, duke përfshirë edhe respektimin e të drejtave të gjithë qytetarëve, duke theksuar se ashtu sikur edhe në SHBA edhe këtu të gjithë përfitojnë nga trashëgimia e pasur dhe se atë duhet ruajtur përditë.

“Ne do të vazhdojmë të punojmë me liderët kosovarë dhe institucionet, në mënyrë që të përfundojnë obligimet e tyre për pavarësinë e mbikëqyrur dhe ta avancojnë Kosovën në perspektivën evropiane. SHBA-të aktivisht mbështesin forcimin e institucioneve demokratike, ne besojme se kjo është në interesin e tuaj që jetoni këtu, pavarësisht se a jeni serbë, apo shqiptarë për ta ndërtuar një të ardhme më të mirë dhe premtuese”, pohoi ai.

I ndodhur në Kosovë një ditë pas datës që shënon katërvjetorin e shpalljes së pavarësisë së vendit, Burns përcolli urimet me rastin e festës së shtetësisë së Kosovës.

“Më lejoni që t’i shprehë urimet më të sinqerta për qytetarët e Kosovës dhe ta përcjell mesazhin e zonjës Hillary Clinton, se SHBA-të janë të nderuara që janë miqtë dhe partneri i Kosovës. Ne qëndrojmë fortë përballë jush sot, sepse qëndruan me ju edhe në të kaluarën dhe për të punuar në ndërtimin e një Kosove më të sigurt, paqësore dhe prosperuese”, theksoi zëvendëssekretari amerikan i Shtetit, William Burns.