Kryetari i Kuvendit të Kosovës Jakup Krasniqi i është kundërpërgjigjur menaxhmentit të Kompanisë së Feronikelit i cili ka reaguar ndaj konstatimeve se kjo kompani është ndotësi më i madh i ambientit.

Krasniqi i ka bërë thirrje strukturës udhëheqëse të kësaj kompanie që të mos zhvendos debatin në reagime politike por të angazhohet në tryezat e profesionistëve për t’i dhënë përgjigje pyetjeve lidhur me parametrat ndotës, nivelin e rehabilitimit të tokave të shfrytëzuara, menaxhimin e mbetjeve industriale, dhe shumë çështje tjera.

“Derisa besonim që menaxhmenti i Ferronikelit, do t’i përgjigjej shqetësimeve të organizatave mjedisore dhe të qytetareve, lidhur me nivelin e ndotjes dhe masat që do të merrte për përmirësimin e kualitetit të jetës së tyre, ata si duket qëllimisht e kanë zhvendosur debatin e tyre në reagime politike, për të krijuar mjegull, duke arsyetuar shkeljet e tyre ligjore dhe operimin me teknologji mjedisore, të cilave ka më shumë se një shekull që u ka skaduar afati”, thuhet në reagimin e Krasniqit.

“Unë vazhdimisht do të insistoj që debatin mbi shqetësimet e profesionistëve, të shoqërisë civile dhe të qytetarëve lidhur më këto çështje ta orientoj në rrugën institucionale dhe në tryezat e profesionistëve. Andaj i bëj thirrje menaxhmentit të kësaj kompanie që ta braktisë komunikimin në formën e ‘letrave rrufe’ dhe të angazhohet në tryezat e profesionistëve për t’i dhënë përgjigje pyetjeve lidhur me parametrat ndotës, nivelin e rehabilitimit të tokave të shfrytëzuara, menaxhimin e mbetjeve industriale, kapacitetet mbi monitorimin e emetimeve e imitimeve, dhe shumë çështje tjera që kërkojnë trajtim mbi bazën e fakteve shkencore”, theksohet në kundër reagimin e kryekuvendarit Krasniqi.

Fillimisht kryeparlamentari Krasniqi kishte kërkuar që të ndërmerren masa për të parandaluar ndotjet, që sipas tij, është duke i bërë Ferronikeli në Drenas.

Pas kësaj ka reaguar menaxhmenti i Ferronikelit, duke vënë në pah “investimet prej 12 milionë eurove” që ka bërë në përmirësimin e filtrave për çështje mjedisore.

Kjo kompani përmes një komunikate, po ashtu se “kjo qasje negative ndaj Ferronikelit është fabrikuar nga disa individë, të cilët për interesat e tyre personale, vazhdojnë të manipulojnë disa njerëz në rajonin e Drenasit dhe gjithashtu të keq-informojnë popullin e Kosovës”.