Kryenegociatorja kosovare, Edita Tahiri, e ka vazhduar avazin e fshehjes nga mediet edhe në Bruksel. Pasi e vonoi për 24 orë vazhdimin e dialogut Prishtinë – Beograd në Bruksel, Tahiri të mërkurën u iku gazetarëve duke u futur në ndërtesën e Këshillit të BE-së nga një derë tjetër ku nuk ka pasur medie.

Më pas, takimi i parë mes Edita Tahirit dhe Borko Stefanoviqit pas disa muajsh pauzë është karakterizuar nga një debat ironik i skajshëm mes tyre që në sekondën e parë. “Paskan ndërruar vendet”, thotë duke qeshur Stefanoviq kur e sheh që zëvendëskryeministrja kosovare ia ka zënë vendin ku është ulur gjithmonë në tavolinën e dialogut.

“Po, e bëmë këtë në këto 40 minuta që të pritëm” e qorton duke buzëqeshur Tahiri homologun serb për vonesën, derisa Stefanoviq zë vend në zyrën e “lehtësuesit” evropian të dialogut, Robert Cooper.

Sidoqoftë, para se të niste dialogu, Borko Stefanoviq foli para gazetarëve i relaksuar, pasi siç tha ai, “ne kemi ardhur tërësisht të përgatitur për marrëveshje, të gjejmë zgjidhje për përfaqësimin e Prishtinës në rajon, zgjidhje që do të kënaqë të dyja palët”.

Megjithëse takimi i së mërkurës përfundoi pa marrëveshje, për Stefanoviqin është e qartë që zgjidhja përfundimtare do jetë rreth Rezolutës 1244 dhe “interesave të shtetit të Serbisë”.

Informata e fundit që një zyrtar i Këshillit të BE-së ka dhënë rreth dialogut, ka qenë: “Takimi përfundoi. Është arritur progres mirëpo ka ende detaje për të cilat duhet arritur pajtim.

Takimi vazhdon të enjten në orën 9:45”. Sidoqoftë, pas takimit, Borko Stefanoviq e ka hedhur poshtë tërësisht këtë qëndrim përmes një prononcimi të vetëm për agjencinë serbe të lajmeve “Beta”: “Bisedimet vazhdojnë nesër. Situata dhe bisedimet janë shumë të rënda”, ka thënë shkurt ai.

Ky vlerësim pas takimit të së mërkurës e ka konfirmuar atë që e ka thënë presidenti i Serbisë gjatë ditës se “qëndrimet e palëve tani janë edhe më larg sesa kanë qenë më parë”.

Bashkimi Evropian ditëve të fundit është munduar të qetësojë sidomos opinionin në Kosovë pas pakënaqësive që po shprehen pas pajtimit që e ka dhënë kryeministri i Kosovës për përfaqësimin e Kosovës në nisma rajonale edhe në kuadër të Rezolutës 1244. Sidoqoftë ajo që dihet sigurt është se nga arritja e kësaj marrëveshjeje varet pothuajse në tërësi edhe dhënia e statusit të kandidatit për BE Serbisë në takimin e Këshillit që do të mbahet në mars.

Përfaqësuesi i sapoemëruar i kryediplomates së BE-së, Cather inë Ashton për Kosovë, Samuel Zhbogar, ka dhënë një premtim që ditëve të fundit po dëgjohet vetëm nga zyrtarët e Qeverisë së Kosovës.

Në një prononcim të fundit, ai ka folur se si arritja e marrëveshjes për “Bashkëpunim Rajonal” i mundëson Kosovës arritjen edhe të ujdisë me BE-në për të ashtuquajturat “marrëdhënie kontraktuale” apo mundësia që Kosova të nënshkruajë marrëveshje me BE-në neutrale ndaj statusit të Kosovës.

Ish-ministri i jashtëm slloven ka folur se si shefja e tij, Ashton, dhe komisioneri për zgjerim, Stefan Fyle, po mundohen të bindin vendet anëtare që formula e cila do ta marrë pajtimin e Serbisë për përfaqësimin e Kosovës në nisma rajonale të jetë e vlefshme edhe për marrëdhëniet Kosovë – BE.

Sidoqoftë burime të “Zërit” në Bruksel thonë se me gjithë përpjekjet e Brukselit ka vende anëtare që s’duan t’ia dinë fare për marrëdhënie me Kosovën. Jozyrtarisht mësohet që sidomos Qiproja këmbëngul që edhe po të arrihet ujdi mes Prishtinës dhe Beogradit rreth nismave rajonale, ata as që e kanë në plan të votojnë pro idesë që Kosova të nënshkruajë kont rata me BE-në.

Megjithëse koha do ta tregojë nëse Kosova vër tetë do marrë diçka më shumë në takimin e marsit të Këshillit të BE- së, një gjë është e sigurt që Kosova edhe po u pajtua me fusnotën e sugjeruar nga Serbia për nismat rajonale, asgjë nuk e ka të garantuar për takimin e marsit.

Stefanoviq flet edhe për IBM

Një nga pikat e diskutimit të këtij raundi të dialogut në Bruksel është dhe implementimi i marrëveshjës IBM (menaxhimi i integruar i pikave të kalimit). Sipas kryenegociatorit serb, Stefanoviq, implement imi i kësaj marrëveshjeje është shumë i lehtë nëse gjërat mbesin ashtu siç janë thënë në takimin e fundit në dhjetor. “Qëndrimi ynë është që ato kalime administrative (Porta 1 dhe 31) të jenë funksionale, por të mos kenë elemente të kufijve shtetërorë”, ka thënë ai.