Prishtinë. Mbi 11 milionë euro do t’i kushtojë buxhetit të Kosovës trajnimi i mësimdhënësve në teknologjinë informative. Afro 27 mijë punëtorë arsimorë, sa llogaritet të ketë të punësuar në sistemin parauniversitar (edhe pse një shifër të saktë Ministria e Arsimit, Shkencës dhe e Teknologjisë nuk ka qenë në gjendje ta japë kurrë), pritet që gjatë këtyre tre vjetëve t’i nënshtrohen këtij trajnimi që implementohet nga Universiteti Amerikan i Kosovës (AUK) i kontraktuar për këtë punë nga kjo ministri. Për secilin mësimdhënës, MASHT do të paguajë për trajnimin nga 414 euro.

I financuar nga MASHT-i projekti për profesionalizimin e mësimdhënësve parauniversitarë që të përdorin teknologjinë informative ka filluar në dhjetor të 2009-së, ku janë përfshirë 5000 mësimdhënës, prej të cilëve 750 tashmë janë aftësuar për mësimdhënie me kompjuterë dhe kanë marrë certifikatat (ECDL) për këtë trajnim një javë më parë. Vetëm për 750 mësimdhënës ministrisë trajnimi i ka kushtuar 310.500 euro.

Ky trajnim i vlerësuar nga krerët e këtij dikasteri si një rrugë drejt ngritjes së cilësisë në arsimin parauniversitar, ka hasur në reagime të shumta nga ana e mësimdhënësve, pakënaqësia e të cilëve pritet të ndikojë në paralizimin e procesit. Komisioni Parlamentar për Arsim...është i gatshëm dhe në pritje të ankesave të mësimdhënësve për t’i bërë zgjidhje këtij problemi, ndërkohë edhe anëtarë tjerë të këtij komisioni dhe ekspertë të arsimit theksojnë të metat e këtij trajnimi deri te dëmtimi i buxhetit pa nevojë.

Alush Istogu, drejtor i Departamentit për Arsim Parauniversitar në Ministrinë e Arsimit, ka thënë se për trajnimin dhe nënshtrimin e provimit për herë të parë kjo ministri paguan për secilin mësimdhënës nga 414 euro gjithsej. Ndërsa nëse mësimdhënësi ngel në provim, herën tjetër duhet të paguajë ai vetë nga 15 euro. “Ne paguajmë vetëm për herën e parë, sepse nuk llogarisim se ai ngel, por që kalon”. Investimin e MASHT-it në këtë trajnim ai e ka quajtur të nevojshëm dhe si veprim pozitiv që për herë të parë paguhet në interes të arsimtarëve. Por, shuma e ndarë për këtë projekt, sipas ekspertëve të arsimit, është e lartë në raport me buxhetin që ka Kosova.

Heset Cakolli, anëtar i Komisionit Parlamentar për Arsim...ka thënë për “Zërin” se ky buxhet që parashihet të mbulojë trajnimin e mësimdhënësve, është shumë i madh dhe i papranueshëm kur merret për bazë edhe buxheti i Kosovës. Cakolli tha se me ardhjen në pushtet të ministrit Hoxhaj, premtimi i tij ishte së pari kompjuterizimi i shkollave, i cili jo vetëm që nuk u realizua, por tash sipas tij, fillohet me trajnimin e mësimdhënësve edhe pse dihet se kompjuterët në shkollat e Kosovës janë simbolik. Ky vendim, Cakolli tha se bie ndesh jo vetëm me buxhetin, por edhe me hapësirën e shkollës. “Kjo është shumë e lartë, ka pasur mënyra dhe forma të tjera për t’u profesionalizuar mësimdhënësit dhe jo në këtë formë”, tha Cakolli.

Komisioni parlamentar për arsim është përgatitur që të reagojë në rast të ankesave të mësimdhënësve.

Arsim Rexhepi kryetar i këtij komisioni tha se vërejtja e tij qëndron më shumë tek notimi i mësimdhënësve. “Askund në botë nuk ndodh që 75 për qind të jetë kalueshmëria siç po ndodh me këtë trajnim, por me 51 për qind fillon notimi pozitiv”, tha ai. Mënyra e notimit, sipas tij, nxjerrë këtë proces të dështuar. Rexhepi tha se duhet marrë masa që grupet tjera të mësimdhënësve kur ta ndjekin trajnimin të përmirësohet notimi. Ai mendon se ky proces për profesionalizimin e mësimdhënësve në informatikë është mirë që ka filluar, por jo me këtë mënyrë të vlerësimit. Si kryetar i këtij komisioni, Rexhepi tha se është i gatshëm të pranojë ankesat e mësimdhënësve, pasi që personalisht është interesuar dhe ka marrë informata rreth këtij problemi.

“Është antikushtetuese që një mësimdhënës të paguajë 15 euro në provim kur hyn për herë të dytë, pasi ka ngel herën e parë. Ministria po i detyron të ndjekin trajnimin dhe ai që detyron duhet edhe të paguajë, posaçërisht kur merret për bazë se MASHT paguan për trajnimin, duhet të paguajë deri në fund”.

Komisioni parlamentar për arsim ka pohuar se është i gatshëm të nis debatin për këtë proces.

Përfaqësues të AUK-ut, ndërkaq kanë deklaruar se përmes tenderit ku kanë konkurruar dhe kompani tjera, ky universitet e ka fituar të drejtën për të organizuar trajnimin e mësimdhënësve. Madje ata kanë thënë se testet para se të hyjnë mësimdhënësit në provime rishikohen dhe konsultohen nga 30 ekspertë të kontraktuar nga AUK-ut.