(E plotësuar në ora 12:27) Prishtinë. Në një konferencë të mbajtur, ku të pranishëm ishin anëtarët e kryesisë së AAK-së, nënkryetari i partisë, Blerim Shala, duke iu referuar vendimit të Dhomës së Apelit, ka thënë se vendimi për rigjykimin e pjesshëm të Ramush Haradinajt është një lajm shumë i keq për AAK-në, për qytetarët e Kosovës dhe për shtetin e Kosovës.

“AAK është tej mase e befasuar me vendimin e Tribunalit të Hagës, veçmas kur dihet që me një vendim unanim të shkallës së parë të këtij Tribunali, më 3 prill të vitit 2008, kryetari i AAK-së, Ramush Haradinaj, është shpallur i pafajshëm prej të gjitha akuzave”, u shpreh nënkryetari i kësaj partie, Blerim Shala.

Shala ka thënë tutje se sikur në atë kohë, e edhe tani, Kosova është duke u përballur me sfida të shumta politike dhe të sigurisë, andaj ngjarjet e fundit, siç është pritja e shpalljes së qëndrimit të GJND-së, do të dëmtohet thellësisht.

Ai ka u ka bërë thirrje të gjithë qytetarëve të Kosovës që të jenë të matur dhe të pjekur sikurse herëve të tjera në këso situatash.

“Këtë ia kemi borxh kryetarit tonë, Ramush Haradinaj”, ka thënë ai duke shprehur bindjen e palëkundur se AAK do t’i fitojë zgjedhjet e ardhshme parlamentare dhe Ramush Haradinaj do të jetë kryeministër i vendit.

. . .

Prishtinë. Dhoma e Apelit në Tribunalin e Hagës ka kthyer në rigjykim të pjesshëm lëndën kundër liderit të Aleancës për Ardhmërinë e Kosovës, Ramush Haradinaj si dhe Idiriz Balaj e Lahi Brahimajt. Pas shqiptimit të këtij dënimi, Haradinaj dhe të tjerët janë paraburgosur deri në vendimin pas rigjykimit.

Anëtarët e AAK-së janë shprehur se janë befasuar me vendimin e Gjykatës.

“Ne besojmë në pafajësinë e tij”, ka thënë Besnik Tahiri nga AAK.

Ndërkaq, në një kumtesë të lëshuar për media, koordinatori i mbrojtjes së Haradinaj, Michael O’Reilly, ka deklaruar tha se “Haradinaj ka konfirmuar sot se çështja më me rëndësi sot është opinioni i Gjykatës Ndërkombëtare në favor të Kosovës, në mënyrë që Kosova të ec tutje në procesin e integrimit në bashkësinë e kombeve”.

Para se të nisej për në Hagë, Haradinaj tha se zhvillimet e fundit rreth rastit të tij duhet të shihen në një kontekst më të gjerë. “Kosova ka bërë progres të madh, dhe ne duhet të vazhdojmë të besojmë në institucionet ndërkombëtare, përkundër prapakthimeve të përkohshme”.

O’Reilly tha se Ekipi Mbrojtës i Haradinajt është jashtëzakonisht i befasuar me vendimin e sotëm, kjo është diçka që ne s’kemi mundur ta parashohim, posaçërisht duke pasur parasysh lirimin e tij të pamëdyshje të para dy viteve.

Për ne tanimë çështjet më me rëndësi janë së pari që të sigurojmë kthimin e shpejtë të z. Haradinaj në Kosovë dhe, së dyti, të caktohet sa më shpejt data e rigjykimit të pjesshëm.

O’Reilly tha se nesër do të dalë edhe me një komunikatë tjetër, pasi që ekipi mbrojtës ta ketë studiuar të gjithë materialin.