(E plotësuar në ora 18:28) Presidenti i Gjykatës Ndërkombëtare të Drejtësisë, Hisashi Owada nga Japonia, ka bërë publik mendimin këshillëdhënës të Gjykatës në rastin e shpalljes së pavarësisë së Kosovës, mendim i cili shkon në favor të Kosovës me rezultat të votave 10:4 për Kosovën.

Ai tha se shpallja e pavarësisë së Kosovës është në përputhje me të drejtën ndërkombëtare dhe nuk e shkel asnjë ligj, pasi, siç tha ai, "nuk ka asnjë nen në ligjet ndërkombëtare që pengon shpalljen e njëanshme të pavarësisë".

Presidenti i GJND-së, z. Owada, tutje ka thënë se ka përcjellë “me vëmendje ecurinë e tërësishme të zhvillimeve politike në Kosovë”, që ka të bëjë me vendosjen e misionit të OKB-së në Kosovë, vendosjen e KFOR-it, e të tjera.

Sipas gazetës Express, në favor të Kosovës kanë votuar këta gjyqtarë:

Hisashi Owada – Japoni, president i GJND-së

Thomas Buergenthal nga SHBA,

Christopher Greenwood nga Britania e Madhe,

Ronny Abraham nga Franca,

Bruno Simma nga Gjermania,

Kenneth Keith nga Zelanda e Re,

Awn Shawkat Al-Khasawneh nga Jordania,

Antônio A. Cançado Trindade nga Brazili,

Abdulqawi Ahmed Yusuf nga Somalia,

Bernardo Sepúlveda - Amor nga Meksika,

Kundër kanë qenë:

Peter Tomka – nënpresident, përfaqësues nga Sllovakia,

Leonid Skotnikov nga Federata Ruse,

Abdul G. Koroma nga Sierra Leone,

Mohamed Bennouna nga Moroku.

. . .

Në orën 15:00 ka filluar punimet seanca e Gjykatës Ndërkombëtare të Drejtësisë në lidhje me rastin e shpalljes së pavarësisë së Kosovës, mendim të cilin e ka kërkuar pala serbe për të vendosur nëse shpallja e pavarësisë ka qenë e ligjshme apo jo.