(E plotësuar në ora 11:12) Prishtinë. Policët e EULEX-it, në bashkëpunim me Policinë e Kosovës, të premten rreth orës 10, kanë arrestuar Hashim Rexhepin, Guvernatorin e Bankës Qendrore të Kosovës. Arrestimi i tij është bërë në zyrën e tij në objektin e Bankës Qendrore të Kosovës.

Sipas dëshmitarëve, policia ka hyrë në ndërtesën e BQK-së pa paralajmërim duke arrestuar Guvernatorin Rexhepi.

Lajmin e ka konfirmuar edhe EULEX-i, ku, sipas një kumtese për media, thuhet se, "Pas bastisjeve të kryera, kryeprokurori i PSRK-së ka autorizuar arrestimin dhe paraburgimin e Guvernatorit të Bankës Qendrore të Kosovës, Hashim Rexhepi".

. . .

Prishtinë. Që nga ora 06:00 e mëngjesit, oficerët e Policisë së Kosovës që janë pjesë e Task Forcës Kundër Korrupsionit, kanë bastisur shtatë lokacione, përfshirë banesat private të katër të dyshuarve, ndër të cilat edhe ajo e Guvernatorit të Bankës Qendrore të Kosovës, zyrat e Bankës Qendrore të Kosovës si dhe një kompani private.

”Këto bastisje janë të ndërlidhura me një hetim financiar dhe për korrupsion ku dyshohet për keqpërdorim të detyrës apo pozitës zyrtare, marrje të ryshfetit, shmangie të tatimit, ushtrim të ndikimit dhe larje të parave”, thuhet në një komunikatë të lëshuar nga EULEX-i.

Bastisjet janë autorizuar nga gjykatësi i procedurës paraprake i EULEX-it nga Gjykata e Qarkut në Prishtinë.

Një prokuror kosovar nga Prokuroria Speciale e Kosovës (SPRK) si dhe monitoruesit policor to EULEX-it dhe një oficer ndërlidhës, ndodhen në Bankën Qendrore për mbikëqyrje dhe për të siguruar mbledhjen efektive të provave materiale si dhe për t’u dhënë shpjegimet e plota dhe të duhura personave që janë aty.