Prishtinë. Qeveria e Kosovës me vendimin që ka marrë për akreditimin e programit master të Gazetarisë në Universitetin e Prishtinës, ka bërë shkelje ligjore, duke mos përfillur sugjerimet e Agjencisë për Akreditim të Kosovës (AAK). Më saktësisht, me këtë vendim, ekzekutivi i vendit ka shkelur Udhëzimin Administrativ për Akreditim, mbi bazën e të cilit funksion dhe vepron AAK-ja.

Ndonëse AAK-ja në fillim të muajit korrik kishte sugjeruar që të mos akreditohet programi master i Gazetarisë në UP, për shkak se nuk i plotësonte kriteret, Qeveria e Kosovës disa ditë pas këtij sugjerimi, në një mbledhje të saj, ka akredituar këtë program studimi.

Zyrtarë të Agjencisë së Akreditimit thonë se Ministria e Arsimit nuk ka të drejtë që një vendim negativ ta kthejë në pozitiv. Në rastin e drejtimit të Gazetarisë në master, Ministria e Arsimit, gjegjësisht Qeveria e Kosovës vendimin negativ të AAK-së për këtë drejtim, e ka kthyer në vendim pozitiv, e që sipas zyrtarëve të AAK-së përbën shkelje ligjore.

Drejtori ekzekutiv i Agjencisë për Akreditim të Kosovës, Basri Muja, para se të përmbyllej procesi i akreditimit të UP-së ka bërë të ditur se sipas legjislativit në fuqi ministri i Arsimit ka të drejtë të refuzojë secilin vendim pozitiv të bordit (për arsye të tij), por nuk ka asnjë mundësi që një vendim negativ të bordit ta kthejë në pozitiv. Në të kundërtën, sipas tij, kjo përbën shkelje ligjore.

Mirëpo, të premten drejtori Muja nuk ka qenë në gjendje të komentojë veprimin e ekzekutivit të vendit. Madje, ai ka thënë nëpërmjet telefonit se për çështjen në fjalë për herë të parë po informohet nga “Zëri”.

Faktin se Qeveria e Kosovës ka bërë një hap të tillë, e ka konfirmuar drejtuesi i Katedrës së Gazetarisë në Universitetin e Prishtinës, Milazim Krasniqi.

“Po, është akredituar me kusht për një vit. Në mbledhjen e Qeverisë ku është miratuar raporti i Agjencisë, sepse raporti i ekspertëve nuk ka qenë për ta ndaluar, por ka pasur disa sugjerime apo rekomandime në paketë me programet tjera të fakultetit”, ka thënë Krasniqi.

Profesori në krye të Katedrës së Gazetarisë, ka mohuar se ky departament ka “gisht” në vendimin e Qeverisë.

I painformuar të premten ka qenë edhe dekani i Fakultetit Filologjik, në kuadër të së cilit vepron Katedra e Gazetarisë, Osman Gashi.

Ai ka thënë se nuk ka asnjë letër zyrtare as nga AAK-ja dhe as nga Qeveria e Kosovës me të cilën pohohet se është akredituar apo nuk është akredituar gazetaria, ndërsa ka kujtuar se ditë më parë është njoftuar nga profesor Milazim Krasniqi, se programi master i gazetarisë tashmë është problem i zgjidhur.

Deputetja e Aleancës për Ardhmërinë e Kosovës, Donika Kadaj-Bujupi, thotë se ky veprimi i fundit i Qeverisë është tërësisht shkelje e ligjit. Ajo kujton mbledhjen e fundit të Komisionit Parlamentar për Arsim ku ka marrë pjesë edhe ministri i Arsimit, Enver Hoxhaj ku është trajtuar edhe çështja e AKK-së, dhe sipas saj, ministri kishte thënë se ai do të ndërhyjë në punën e kësaj agjencie.

Mirëpo, krejtësisht ndryshe mendon ministri i Arsimit, Enver Hoxhaj, i cili beson se nuk është bërë asnjë lloj shkelje ligjore. Ai thotë se ekspertët e kanë vlerësuar pozitivisht programin e gazetarisë për akreditim, ndërsa bordi i agjencisë ka vendosur të kundërtën.

“Raporti i ekspertëve fletë për atë që realisht rekomandohet në mënyrë decidive të jepet vendim pozitiv për programet e gazetarisë. Në një situatë të tillë unë kam informuar kryeministrin për atë se si është gjendja në programin e gazetarisë dhe qeveria ka vendosur që në bazë të rekomandimeve të ekspertëve ta akreditojë me kusht”, ka thënë Hoxhaj. Sipas tij, në rastet kur edhe Bordi i AAK-së edhe ekspertët mendojnë që një program mos të akreditohet, atëherë veprohet në atë formë.

BOX:

Sugjerimi i AAK-së

“Agjencia për Akreditim e Kosovës rekomandon që programet e studimeve në Fakultetin Filologjik: Letërsi e Përgjithshme dhe Krahasimtare (bachelor dhe master), GJuhë dhe Letërsi Turke (master), Gjuhë dhe Letërsi Gjermane (master) dhe Gazetari (master) të mos akreditohen dhe të mos pranojnë studentë për vitin akademik 2010/2011”, thuhet në njoftimin zyrtar të AAK-së, të lëshuar për media.