“Uzurpohen” meritat për vendimin e GJND-së

Prishtinë. Verdikti i Gjykatës Ndërkombëtare të Drejtësisë (GJND), në favor të pavarësisë së Kosovës, nuk i ka shpëtuar përpjekjes për përvetësim të meritave dhe shfrytëzim politik nga udhëheqësit e institucioneve në Prishtinë. Megjithëse rezultat i kontributit të brezave të tërë të qytetarëve dhe tërë spektrit politik, vulosjen e pavarësisë së Kosovës nga GJND-ja më 22 korrik, bartësit e institucioneve po ia atribuojnë punës së tyre gjatë këtij mandati kontravers, në përpjekje për restaurimin e imazhit të dëmtuar të qeverisjes.

Përfaqësues të opozitës dhe analistë politikë e vlerësojnë të pamoralshme përpjekjen e pushtetit për përvetësimin e kësaj fitoreje të shtetit.

Analisti Imer Mushkolaj, ka thënë se vendimi i GJND-së nuk duhet të shërbejë si “mjet” politik për përmirësimin e imazhit të dëmtuar të institucioneve. “Ai vendim është konfirmim i pavarësisë, ndërkaq pavarësia nuk është meritë e asnjë individi apo partie, por e të gjithë atyre që për dekada punuan për të duke mos harruar ndihmën e vazhdueshme të faktorit ndërkombëtar, e veçanërisht SHBA-ve”, tha ai. Kushdo që përpiqet ta keqpërdorë dhe të përvetësojë fitoren në Hagë, sipas Mushkolajt, është i pamoralshëm. Megjithatë, duke pasur parasysh përvojat e viteve të kaluara, sipas tij, nuk është aspak çudi që në zgjedhjet e ardhshme, GJND-ja të bëhet pjesë e fushatës zgjedhore. “Vendimi i GJND-së duhet të shfrytëzohet për të konsoliduar dhe forcuar pozicionin e vendit në botë dhe assesi të vihet në funksion të lojërave të ulëta politike.

Imazhi i qeverisjes nuk përmirësohet me vendime dhe s’ka vendim që e përmirëson atë”, tha Mushkolaj.

Kurse Mimoza Kusari-Lila, nga AKR-ja, ka thënë se Qeveria aktuale në asnjë mënyrë nuk ka merita të veçanta apo të ndara për këtë rezultat pozitiv në GJND. “Përkundrazi, sjellja e kësaj Qeverie dhe keqqeverisja e saj ka sjellë deri te frika që ka pasur shoqëria kosovare se çfarë do të jetë opinioni i GJND-së”, tha ajo. Kjo Qeveri, sipas numrit dy të AKR-së, duhet të tentojë të ngritë kredibilitetin nëpërmjet sukseseve në realizimin e prioriteteve që vet i ka caktuar, e jo nëpërmjet përvetësimit të projekteve që i takojnë tërë popullit të Kosovës.

Edhe Naim Rrustemi, deputet i pavarur, ka thënë se përpjekja për kapitalizmin politik të meritave të tjerëve reflekton një botë të varfër të udhëheqësve të institucioneve. Sipas tij, në këtë rast, bartësit e pushtetit po përpiqen të përvetësojnë veprimet dhe meritat e sponsoruesve të pavarësisë së Kosovës, të cilët, sipas tij, kanë pasur merita vendimtare në opinionin e GJND-së. Duke iu referuar përpjekjeve të fundit të SHBA-ve dhe BE-së për sigurimin e njohjeve të reja për Kosovën, e veçanërisht njohjen nga Greqia, Rrustemi thotë se kjo tregon se sponsorët e pavarësisë janë më meritorët për sukseset e fundit të Kosovës në arenën ndërkombëtare.

Faktin se vendimi i GJND-së nuk është meritë e imazhit të qeverisjes aktuale në Kosovë e ka vërtetuar edhe një deklaratë e ish-shefi i UNMIK-ut, Soren Jessen-Petersen. Diplomati danez, tre ditë pas vendimit në Hagë, ka deklaruar se pas mendimit të GJND-së Kosova duhet të merret në mënyrë vendimtare me problemin e imazhit të saj.

Pas opinionit të GJND-së, kryeministri i vendit nuk ka hezituar edhe të prejudikojë përfundimin e shpejtë të fazës së pavarësisë mbikëqyrur, duke iu referuar realitetit të ri ndërkombëtar dhe progresit të arritur brenda Kosovës. Mirëpo, përfaqësues të misioneve ndërkombëtare kanë thënë se do të jenë të pranishëm në Kosovë si mbikëqyrës të pavarësisë së paku edhe dy vjet, pasi që kanë mbetur disa fusha ku duhet të punohet më tutje.

Në vend që të angazhohen për përvetësimin e kësaj fitoreje historike përballë diplomacisë serbe, institucionet e Kosovës do të duhej të fokusoheshin në tërësi në procesin e lobimit total për rritjen e numrit të njohjeve, në këtë periudhë të favorshme për rezultate në këtë drejtim.