Prishtinë. Mënyra e zhvillimit të punimeve në seancën e fundit të sesionit pranveror parlamentar, ka dëshmuar problemet kronike që po vazhdojnë të karakterizojnë funksionimin e Kuvendit të Kosovës. Miratimi “në parim” i projekt-strategjisë së Qeverisë për Privatizimin e PTK-së, në kundërshtim të plotë me praktikën parlamentare të miratimit të strategjive, ka dëshmuar se ky institucion vazhdon të jetë në shërbim të udhëheqësve të ekzekutivit, për realizmin e interesave të tyre personale apo grupore.

Me gjithë problemet e skajshme me të cilat është përballur Kuvendi gjatë sesionit pranveror, kryeparlamentari, Jakup Krasniqi, është shprehur i kënaqur me punën e këtij institucioni gjatë shtatë muajve të parë të vitit. Krasniqi veçon aspektin legjislativ të Kuvendit si suksesin më të madh, duke përmendur shifrën prej 42 ligjesh të miratuar. Sipas tij, duke i pasur parasysh kapacitetet administrative dhe politike, Kuvendi në vitin 2010 ka shënuar një rritje cilësore. Ndërsa vështirësitë në realizimin e plotë të planit të punës, Krasniqi ia ka atribuuar vonesës së ligjeve nga Qeveria.

“Megjithatë, Kuvendi gjatë këtij sesioni ka miratuar më shumë ligje sesa gjatë gjithë viteve të kaluara dhe ne shpresojmë në sesionin e ardhshëm të kalojmë numrin 50 të ligjeve të miratuara”, tha ai. Krasniqi ka paralajmëruar sanksionim të deputetëve për mosdisiplinë në përputhje me rregulloren e re të punës. Ai ka komentuar edhe ankesat e deputetëve të opozitës për mënyrën e udhëheqjes së seancave, duke thënë se opozita gjatë kësaj kohe ka pasur hapësirë ndonjëherë edhe më shumë sesa vetë pozita. Ndërsa problemet në punën e komisioneve, të cilat ai i ka kritikuar disa herë, Krasniqi i ka arsyetuar me faktin se Kuvendi vazhdon të jetë në fazën e ndërtimit të kapaciteteve dhe traditës demokratike.

Mirëpo, opozita parlamentare dhe analistët vazhdojnë të kenë kritika të shumta për mënyrën e funksionimit dhe rezultatet e punës së Kuvendit.

Naser Rugova, deputet i LDD-së ka thënë se sesioni pranveror i Kuvendit është përmbyllur me bilanc negativ, nëse merren parasysh nevojat e planet e punës dhe rezultatet e arritura. Ai ka përmendur mosefikasitetin e duhur në aspektin legjislativ, mospërmbushjen e duhur të funksionit mbikëqyrës të zbatimit të ligjeve, e veçanërisht atë të mbikëqyrjes së punës së organeve ekzekutive. Rugova thotë se Qeveria vazhdon të imponoj agjendën e Kuvendit, duke kritikuar edhe mënyrën e udhëheqjes së këtij institucioni. “Gjatë këtij sesioni, Kuvendi ka dështuar të përmbushë objektivat e veta dhe pritjet e qytetarëve të Kosovës”, tha ai.

Ndërsa, analisti Imer Mushkolaj ka thënë se politika ende po e mban peng Kuvendin.

“Agjenda e Kuvendit vazhdon të diktohet nga Qeveria. Ligje të rëndësishme, të cilat tashmë do të duhej të kishin përfunduar, ende nuk janë miratuar, për shkak të interesave politike e biznesore”, tha ai. Sipas Mushkolajt, puna në komisione nuk është serioze ndërsa anëtarët e tyre në të shumtën e rasteve nuk kanë lidhje me fushën që mbulon komisioni përkatës.

“Deputetët më tepër kanë qenë të preokupuar se si t’i sigurojnë rroga e pensione të majme vetes, sesa t’i diskutojnë problemet me të cilat përballen çdo ditë ata që i kanë zgjedhur”, tha Mushkolaj. Po ashtu, jo rrallë, sipas tij, Kuvendi nuk ka shërbyer si vend i debatit, por i mbylljes së debatit. “Kontribut në këtë aspekt ka dhënë edhe kryeparlamentari Krasniqi, i cili në disa raste është treguar një autokrat i vogël, e ndonjëherë ka krijuar përshtypjen se në karrigen e të parit të Kuvendit ka luajtur rolin e sekretarit të përgjithshëm të PDK-së”, tha Mushkolaj.