Prishtinë. Shkarkimi i guvernatorit të Bankës Qendrore të Kosovës, Hashim Rexhepi, i cili gjendet në paraburgim nën dyshimin për korrupsion e shpëlarje parash, nuk pritet të ndodhë para muajit shtator, ngase Kuvendi i cili duhet të marrë një vendim të tillë është në pushim veror deri në shtator. Sipas ligjit për BQK-në, një nen i të cilit është amandamentuar në mbledhjen e fundit të Kuvendit, bën me dije se shkarkimin e guvernatorit e bën Presidenti pas miratimit në Kuvend. Por, në këtë rast, presidenti “i ka duart e lidhura” ngase nuk i ka ardhur ndonjë njoftim nga Kuvendi.

Presidenti i Kosovës ka qenë vetë ai i cili i është drejtuar bordit të Bankës Qendrore për të iniciuar procedurat e shkarkimit të guvernatorit, i cili është arrestuar nga policia të premten e javës së kaluar dhe ndaj tij është caktuar masa e paraburgimit në kohëzgjatje prej një muaji.

“Presidenti Sejdiu nuk mund të marrë asnjë veprim pa e pasur vendimin e Kuvendit të Kosovës dhe deri sot Kuvendi nuk ka sjellë një vendim të tillë”, ka thënë zëdhënësi i presidentit, Xhavit Beqiri.

Ndërkohë, të hënën bordi i BQK-së ka nisur procedurat dhe rastin e ka dërguar në Kuvend, por ky i fundit para pushimeve nuk e ka pasur në agjendë çështjen e guvernatorit.

Megjithëkëtë, kryetari i Kuvendit Jakup Krasniqi në konferencën përmbyllëse të sesionit pranveror ka shfaqur bindjen e tij se legjislativi i vendit nuk është duke iu shmangur procedurës për shkarkimin e guvernatorit, por ka fajësuar ndërkombëtarët për ndërhyrje në këtë rast. Ai ka drejtuar “gishtin” te ish-drejtori ndërkombëtar i Bankës Qendrore të Kosovës, Michel Svetchine, i cili në një letër dërguar institucioneve në vend ka është përpjekur që ta shfajësojë guvernatorin.

“Për shkak të punëve të shumta që kishim dhe vonesës së ardhjes së këtij materiali është mbetur për shqyrtim. Por, ajo që duhet ta them, është shqetësuese ndërhyrja ndërkombëtare në këtë rast”, ka thënë Krasniqi.

“E dini reagimin që është bërë nga ish-drejtori ndërkombëtar i BQK-së në mbrojtje të të akuzuarit që konsideroj se është e jashtëligjshme. Por, ka edhe ndërhyrje të tjera dhe me kohë do të informoheni”, ka shtuar më tej kryekuvendari. Sipas tij, kërkesat që vijnë për shqyrtim në Kuvend duhen që nga Kryesia të dërgohen në komisionin përkatës, me qëllim të përpilimit të raportit dhe rekomandimeve rreth rastit. Pasi që komisioni të japë vlerësimin dhe çështja të hidhet për votim në Kuvend, në këtë rast çështja për shkarkimin e guvernatorit Hashim Rexhepi dërgohet tek presidenti i vendit.

Mbrojtësi i tij, avokati Ramë Gashi, ka thënë për gazetën se nga gjykatësi i EULEX-it është refuzuar ankesa e mbrojtjes e bërë kundrejt vendimit për caktim të paraburgimit.

“Ankesa është refuzuar me arsyetimin e njëjtë që pati dhënë gjyqtari kur e ka caktuar paraburgimin ndaj klientit tim”, ka thënë avokati Gashi.

Ai ka shtuar se mbrojtja është duke zhvilluar aktivitete intensive në mbledhjen e provave shfajësuese për guvernatorin Hashim Rexhepi. “Sot kam dërguar disa prova në prokurori dhe gjykatë dhe nesër do të dërgoj prova të tjera”, ka pohuar avokati Ramë Gashi.