Prishtinë. Kryetari i Lidhjes Demokratike të Dardanisë, Nexhat Daci, ka thënë se pozita po tregon tepër arrogancë ndaj opozitës, gjë që sipas tij është shprehje e mungesës së dijës. Këto komente kreu i LDD-së i ka bërë të enjten pas një takimi që ka pasur me një ekip ekspertësh nga Programi për Zhvillim i Kombeve të Bashkuara në Kosovë (UNDP), me të cilët bisedoi lidhur me aktivitetet e LDD-së në Kuvendin e Kosovës.

“Pozita mendon se vetëm ajo është pjesë e shtetit. Komuniteti ndërkombëtar po i shtyn dhe po i mbështet pozitën dhe këta njerëz në të gjitha proceset që po ndodhin në këtë vend. Në Kosovë asgjë nuk po bëhet për ne dhe fëmijët tanë, sidomos jo për minoritetet dhe gratë. Unë mendoj që duhet të kemi përgjegjësi ndaj qytetareve, sepse prej tyre ne e marrim votën”, tha me këtë rast kryetari Daci.

Duke theksuar se LDD nuk është e fortë në aspektin financiar, kryetari Daci tha se do të angazhohen që të kanë rezultate sa më të mira në zgjedhjet e ardhshme.

Nora Sahatçia, menaxhere e projektit të UNDP-së, e informoi kryetarin Daci për punën që ka bërë UNPD për këta dy vjet.