Prishtinë. Aleanca për Ardhmërinë e Kosovës ka përgjegjësi para qytetarëve të Kosovës që të prezantojë faktet nëse ka, sa u përket bisedimeve sekrete, e jo të bjerë pre e presioneve të ndryshme për të mos publikuar faktet e përmendura lidhur me bisedimet e mundshme Kosovë-Serbi. Në një intervistë dhënë “Zërit”, nënkryetarja e Aleancës Kosova e Re, Mimoza Kusari-Lila vlerëson se AAK-ja ka bërë gabim politik sa i përket kësaj çështjeje. Sipas saj, kjo parti e ka qenë konfuze që në konferencën e parë e aq më tepër në të dytën kur në një farë mënyre kanë pohuar se kanë presione politike.

“AAK-ja ka pasur përgjegjësi politike dhe pranë qytetarëve të Kosovës, nëse kanë një fakt apo disa fakte për bisedime, të prezantojnë faktet për këto bisedime por edhe materialin që është diskutuar, se çfarë rastësisht ka mundur të ndodhë në takime është tjetër, e tjetër është sikurse të kenë pasur materiale dhe vendime që kanë nxjerrë nga këto bisedime”, thotë ajo, duke shtuar se, partia që ajo përfaqëson nuk ka pasur informacione për bisedime.

Ajo thotë se kreu i AKR-së, Behgjet Pacolli është duke vazhduar lobimin në vende të ndryshme të botës, në mënyrë që t’i sjellë Kosovës sa më shumë njohje. “Ju e dini se presidenti Behgjet Pacolli në vazhdimësi ka qenë aktiv në faza të caktuara për lobim. Ai do të vazhdojë ta bëjë një gjë të tillë. Ka pasur tani një rast familjar, do të thotë ka ndërruar jetë nëna e presidentit, prandaj ka qenë më pranë familjes. Tre javë ajo ka qenë në gjendje shumë të rëndë shëndetësore, prandaj ai ka qëndruar pranë nënës. Megjithatë, presidenti Pacolli e pati shumë afër një njohje nga shteti afrikan, në Tanzani konkretisht dhe ka pasur premtime për njohje shumë të shpejtë”, thotë ajo.

Zëri: A është AKR-ja duke heshtur në këtë fazë si parti opozitare nëse kemi parasysh zhvillimet e fundit në Kosovë?

Kusari-Lila: Jo nuk e konsideroj se AKR-ja është duke heshtur në asnjë mënyrë. AKR-ja ka qenë mjaft aktive. Ne me të vërtetë e vlerësojmë se është krijuar në një farë forme një tym i madh për vetë faktin se a ka pasur apo jo bisedime sekrete me Serbinë. Qëndrimi i AKR-së prej fillimit ka qenë se çfarëdo bisedimi sekret me Serbinë është i dëmshëm dhe nuk besojmë se me mendje të shëndoshë një qeveri mund të shkojë në bisedime sekrete dhe mund të nxjerrë ndonjë përfundim nga këto bisedime sekrete, si e para duke e ditur se kanë përgjegjësi institucionale, përgjegjësi politike dhe historike.

Ne gjithmonë e kemi cekur që bisedimet nuk mund të bëhen vetëm prej strukturës qeverisëse, gjegjësisht dy partive në koalicion, por nëse hyhet në bisedime së pari duhet të hyhet si partnerë të barabartë, pra si dy shtete Kosovë dhe Serbi. Dhe së dyti, që duhet të jetë një platformë gjithëkombëtare. Të mendohet se ekziston një mendësi i një strukture që dy parti të marrin përgjegjësinë, të vendosin për të ardhmen e një pjese të Kosovës është tërësisht e papranueshme, është në kundërshtim me të gjitha normat qoftë ligjore, qoftë morale të cilat ekzistojnë. Ne së pari nuk kemi pasur informatë për bisedime të kësaj natyre dhe së dyti, në momentin kur është prononcuar kryetari i partisë sonë, z. Behgjet Pacolli se nuk mendon se ka bisedime sekrete, jemi akuzuar pastaj nga partia tjetër opozitare, AAK.

Që të marrësh pozicion të them në këtë zhurmë të madhe, kemi vlerësuar se është më tepër e dëmshme për ne dhe për qytetarin e Kosovës për arsye se është ngarkuar në një farë forme është marrë hapësira politike për diçka që me të vërtetë nuk është prezantuar qartë. Dhe tani të hyjmë në një pozitë defansive të kundërpërgjigjemi tek AAK-ja, e cila akuzoi ose deklaroi diçka për kryetarin tonë, m’u ka dukur e panevojshme. E kemi lënë që dy partitë, në këtë rast kryeministri ose Qeveria dhe AAK-ja, këtë bilanc të forcave që e kanë prezantuar në skenën politike, ose këtë përplasje ta zgjidhin mes vete dhe pozicioni ynë ka qenë që çfarëdo bisedimi duhet të bëhet në platformë të përgjithshme kombëtare dhe gjithsesi vetëm si partner e jo aspak dhe në asnjë mënyrë skutave qoftë të Evropës ose në vendet e rajonit...

Bisedime ose kontakte me Serbinë ne e dimë që ka pasur në vazhdimësi, qoftë përmes bashkësisë ndërkombëtare, do të thotë kanë shkuar në Beograd dhe kanë ardhur në Prishtinë dhe kanë përcjellë mesazhe qoftë përmes konferencave të ndryshme publike ose jopublike, të cilat janë organizuar prej shteteve tjera.

Zëri: A mendoni se AAK-ja ka pasur fakte për ato që ka thënë dhe a ka qenë për ju e bindshme AAK-ja në ato që ka prezantuar?

Kusari-Lila: Nuk e di a ka pasur fakte. AAK-ja në fakt nuk ka prezantuar fakte. Atë që ka prezantuar është se dinë për vendet ku kanë mundur të zhvillohen bisedimet. Tash në ato takime, çka ka qenë përmbajtja e takimeve, ne nuk e dimë. Nëse dy zëvendësministra janë takuar në nivel të zëvendësministrave, apo dy këshilltarë janë takuar në nivel të këshilltarëve, atëherë nuk e di pse mund të jetë aq dramatike një situatë. Po them edhe njëherë, procesi i vendimmarrjes është proces që dihet në Kosovë, po them për territore, për marrëveshje, për organe dihet kush janë ata që vendosin.

Ka qenë një prezantim shumë konfuz prej momentit të parë, ndërsa në konferencën e dytë kur kanë dalë dhe kanë thënë se janë dorëzuar karshi presionit, unë vlerësoj që ka qenë më mirë të mos kishin dalë fare sesa të dalin e të thonë se janë dorëzuar karshi presionit, për arsye se ne shpesh si opozitë, edhe neve na ka ndodhur si AKR që kemi kritikuar qeverinë se pse nuk i jep raport popullit të Kosovës, pse nuk e funksionalizon, pse e ka marrë legjitimitetin e parlamentit duke mos u vendosur temat në Parlamentin e Kosovës, por shpeshherë mbeten ato në nivel të qeverisë dhe dikujt tjetër jashtë qeverisë. AAK-ja ka pasur përgjegjësi politike dhe pranë qytetarëve të Kosovës, nëse kanë një fakt apo disa fakte për bisedime, të prezantojnë faktet për këto bisedime por edhe materialin që është diskutuar, se çfarë ka mundur të ndodhë në takime është tjetër, e tjetër është sikurse të kenë pasur materiale dhe vendime që kanë nxjerrë nga këto bisedime.

Prandaj, po them edhe njëherë që ka qenë politikisht shumë konfuze por politikisht edhe shumë e gabueshme nëse nuk kanë qenë të gatshëm ta çojnë procesin deri në fund, siç i pamë nuk ishin të gatshëm ta çojnë deri në fund këtë dilemë.

Zëri: E a kanë pasur presione?

Kusari-Lila: Nuk e di. Me siguri që kanë qenë të kontaktuar, atë e kanë thënë. Unë e di të gjithë atë që e di edhe opinioni publik në Kosovë dhe asgjë më tepër prej së afërmi.

Zëri: E përmendët pak a shumë që është gabim politik një dorëzim i tillë i AAK-së. A është ngritur AKR-ja apo partitë tjera opozitare me këtë “gabim” të AAK-së?

Kusari-Lila: Unë mendoj se rënia apo gabimi politik i një partie jo domosdoshmërish me automatizëm e ngrit partinë tjetër opozitare. Konsideroj se ngritjet e AKR-së do të vijnë si rezultat i aktivitetit të AKR-së, e jo si rezultat i gabimeve të një partie tjetër opozitare.

AAK-ja mendoj se ka bërë gabim politik kur e ka prezantuar dhe nuk ka shkuar deri në fund. Konsultat që i kanë bërë ata mandej ose presionet në të cilat ata kanë rënë, është dashur t’i verifikojnë para se ta bëjnë publike faktin se dinë për bisedimet sekrete. Ky është mendimi im në këtë rast. E sa i përket ngritjes sonë, edhe një herë po e them se AKR-ja si parti politike ka një mori vlerash të cilat i mban, me një vizion dhe një program të qartë, për një qeverisje më të mirë, për një zhvillim të qëndrueshëm ekonomik dhe konsideroj se vetëm zbatimi i mëtutjeshëm i atij plani në vazhdimësi do ta ngritë AKR-në. Nuk u gëzohemi gabimeve të partive të tjera opozitare me atë që ne të ngrihemi.

Zëri: Zonja Kusari, partitë tjera kanë reaguar edhe në rastin e kryetarit të Komunës së Rahovecit, z.Qazim Çeska. Pse nuk ka reaguar AKR-ja?

Kusari-Lila: Ne nuk kemi reaguar për shkak se AKR-ja është në qeverisje me PDK-në në Rahovec. Si ndërhyrje të kryeministrit e kemi vlerësuar si të gabueshme për shkak se ka qenë një presion politik, i cili e ka jetën e vet. Kryetari ka dhënë dorëheqje të parevokueshme dhe ka shkuar deri në atë pikë sa në momentin e fundit, kryeministri e kthen prapa, do të thotë e bind. Ne jemi në rishikim të situatës sonë në Rahovec. Nuk kemi dashur të bëjmë prononcime vetëm për sy politik por kemi dashur që në momentin kur bëjmë prononcim të vendosim saktë se cili është pozicioni i AKR-së.

E së pari që të jemi të përgjegjshëm ndaj qytetarëve të Rahovecit që të mundohemi deri në maksimum ta mbajmë funksional aktivitetin që ne kemi dy drejtori në Rahovec, aktivitetin e dy drejtorive. Tani jemi në një farë forme në diskutime të vazhdueshme me kryesinë dhe me partnerin tonë në koalicion në Rahovec, në mënyrë që ta gjejmë zgjidhjen sa më të saktë sa më shpejt në Rahovec. Po në qoftë se AKR-ja e vlerëson se jo vetëm akti si akt, ka qenë i gabuar por edhe funksionaliteti i qeverisjes nuk do të jetë, në një periudhë shumë të shkurtër AKR-ja do ta sjellë vendimin e saj lidhur me qeverisjen në Rahovec.

Zëri: Të kalojmë paska te procesi i njohjeve. Dihet që kreu i AKR-së disa herë ka pasur përplasje me MPJ-në sa u përket njohjeve. A vazhdon edhe më tutje AKR-ja të lobojë?

Kusari-Lila: Po, vazhdon të jetë. Ju e dini se presidenti Behgjet Pacolli në vazhdimësi ka qenë aktiv në faza të caktuara për lobim. Ai do të vazhdojë ta bëjë një gjë të tillë. Ka pasur tani një rast familjar, do të thotë ka ndërruar jetë nëna e presidentit, prandaj ka qenë më pranë familjes. Tri javë ajo ka qenë në gjendje shumë të rëndë shëndetësore, prandaj i ka qëndruar pranë nënës. Megjithatë, presidenti Pacolli e pati shumë afër një njohje nga shteti afrikan, në Tanzani konkretisht, dhe ka pasur premtime për njohje shumë të shpejtë.

Ndodhi një gjë, që konsiderojmë në aspektin diplomatik nuk ishte shumë hap i mençur.

Presidenti i Republikës së Kosovës viziton Malavin për tre ditë, qëndron atje. Tanzania dhe Malavi janë në raporte të ngrira ose të acaruara mes vete për shkak të liqenit kufitar, Viktoria, liqen mes dy shteteve dhe tërhiqet ose ftohet Tanzania në raport me Kosovën. Sa i përket aktivitetit lobues, presidenti Pacolli edhe në momentin kur ka qenë i angazhuar rreth shëndetit të nënës së tij, ka pasur një angazhim të këshilltarëve të tij dhe njerëzve që punojnë për të dhe ka paralajmëruar se shumë shpejt do të vijnë njohjet si rezultat i këtij aktiviteti. Ne na ka ardhur keq me të vërtetë që diplomacia kosovare nuk ka arritur ta kapitalizojë në mënyrën më të mirë të mundshme mendimin e GJND-së.