Prishtinë. Paralajmërimi për mbajtjen e grevës së mësimdhënësve të Prishtinës nga sindikata e arsimit për këtë komunë nuk ka gjetur mbështetjen e shumicës së shkollave të kryeqendrës. Numri i shkollave që në orët e paradites kanë nisur të hyjnë në grevë ka qenë jo më shumë se tri-pesë, për t’u rrudhur më pas në një shkollë, e cila ka vendosur t’i përmbahet grevës. Shkolla “Hasan Prishtina” është konfirmuar nga përfaqësues të Ministrisë së Arsimit, Shkencës dhe Teknologjisë së Kosovës si e vetmja që nuk ka filluar procesin mësimor. Ndërkohë në shkollat e tjera të vendit procesi mësimor është bërë e ditur se ka filluar normalisht dhe është bërë shpërndarja e teksteve shkollore falas për 340 mijë nxënës nga klasa e parë deri tek e nënta.

Në ditën e fillimit të shkollës - 1 shtator, shkolla fillore “Dardania” dhe ajo “Ismajl Qemali” kanë qenë nikoqire të kryeministrit të Kosovës Hashim Thaçi dhe ministrit të arsimit Enver Hoxhaj, të cilët kanë vizituar këto shkolla dhe kanë hapur solemnisht vitin e ri shkollor, duke dorëzuar librat e parë për nxënësit më të rinj të shkollave të Kosovës, ata të klasës së parë.

Kryeministri Thaçi e ka quajtur 1 shtatorin-ditën e shkollës, si një ditë të veçantë për shtetin e Kosovës, qytetarët, prindërit dhe nxënësit. “Qeveria e Republikës së Kosovës ka marrë përgjegjësinë për shpërndarjen gratis të të gjithë librave nga klasa e parë deri në klasën e nëntë për 340 mijë nxënës”, ka thënë Thaçi duke theksuar se qeveria do të vazhdojë me suksese dhe reforma të reja në arsim, me një përkujdesje më të madhe për të gjithë mësimdhënësit e vendit të të gjitha kategorive, në të njëjtën kohë duke krijuar kushte dhe mundësi për të gjithë nxënësit që të kenë suksese të reja.

Ai ka uruar për fillimin e vitit të ri akademik duke vlerësuar se sistemi i arsimit në Kosovë ka tejkaluar sukseset në nivel regjional. Thaçi ka thënë se pretendimi i qeverisë është që të ketë standarde të botës moderne dhe se është në rrugë të mbarë për këtë, bashkë me MASHT-in.

“Qeveria e ka pasur dhe e ka ndër prioritetet kryesore investimin në edukim sepse jemi të vetëdijshëm se duke investuar në edukim, ne po investojmë në të ardhmen e shtetit tonë”. Ndërkohë ka vlerësuar se pagat e mësimdhënësve janë mbi standardin në nivel të rajonit, duke bërë të ditur se është i përgjegjshëm për rritjen e pagave të punëtorëve të arsimit nga viti i ardhshëm. Thaçi ka theksuar se siç ka ndodhur rritje e pagave për punëtorët universitarë, do të ketë dhe të niveleve tjera dhe në këtë drejtim, ai tha se do të ketë vetëm lëvizje përpara dhe përpjekje për krijimin e kushteve më të mira.

Ndërkaq, ministri Hoxhaj ka thënë se shpërndarja e librave falas është një dëshmi e Qeverisë së Kosovës se arsimi është prioritet.

“Për ne si qeveri e Kosovës arsimi është fuqia më e madhe që ka vendi ynë, prandaj do të bëjmë përpjekje maksimale që ta reformojmë sistemin tonë arsimor dhe reforma kryesore që do të ndodhë në këtë vit është reforma e kurrikulimit ku do të rishikohen programet shkollore, tekstet dhe në të njëjtën kohë, do të ndërtojmë një sistem arsimor”, tha ai.

Thirrjet për bojkot të mësimit në Prishtinë nga sindikata e kësaj komune, Hoxhaj i ka quajtur përpjekje individuale për të prishur imazhin e ditës së fillimit të procesit mësimor. Ndërsa ka qenë i vendosur se ngritje të pagave do të ketë nga viti 2011.