Prishtinë. Ka gati një vit që në repartin e Mjekësisë nukleare të QKUK-së nuk pranohen pacientët, që kanë nevojë për kryerjen e një varg analizash laboratorike dhe kjo ndodh jo për shkak se nuk ka personel të mjaftueshëm apo aparaturë të nevojshme, por pikërisht për mungesën e reagensëve, të cilët janë të domosdoshëm për përpunimin e rezultateve për këto analiza të gjakut dhe njëkohësisht shumë të shtrenjta.

Si pasojë e buxhetit të kufizuar të QKUK-së, i cili nuk mjafton për sigurimin e reagensëve, tumor markerët, analizat hormonale si dhe analizat për gjëndrën tiroide ka kohë që kanë kaluar në Institutin e Fiziologjisë. Por, edhe në laboratorin e këtij instituti ka disa javë që nuk janë furnizuar me reagensë, ndërkohë që pacientët detyrohen që të shkojnë në laboratorët privat përreth QKUK-së, ku këto shërbime kryhen me çmime shumë të larta.

Dr. Ramë Miftari në Mjekësinë nukleare thotë se ka gati një vit që të gjitha analizat që kryhen “in vitro” nuk janë duke u kryer në këtë njësi, e cila ka qenë e vetmja në gjithë vendin, ku kryhen këto lloj analizash të gjakut.

Ai thotë se kërkesat për material janë proceduar në vazhdimësi nga ana e shefit tek drejtoria ekzekutive e QKUK-së, ndërkohë që si përgjigje kanë marrë arsyetimin se është anuluar tenderi, për shkak të kostos së reagensëve. Ai sqaron se me një organizim të ri që është bërë analizat që dikur kryheshin në këtë njësi kanë kaluar të kryhen në Institutin e Fiziologjisë.

Por, kërkesat e pacientëve për të kryer këto analiza në këtë repart janë të vazhdueshme dhe të përditshme. Miftari sqaron se që nga themelimi ky repart ka diagnostikuar dhe trajtuar sëmundjet e gjëndrës tiroide dhe si rrjedhojë ka disponuar me regjistrin dhe kartotekën me të gjitha të dhënat për rreth 30 mijë pacientë. Ndërkaq, tani ata rrinë kot.

“Ne natyrisht që iu përmbahemi obligimeve tona të punës. Është ndjenjë shumë e keqe, që ne të gjithë vijmë këtu, e respektojmë orarin e punës dhe përbrenda orarit të punës nuk kemi çka të punojmë”, thotë ai.

Nga ana tjetër drejtoresha e barnatores në QKUK, që nuk dëshiron t’i përmendet emri në gazetë thotë se analizat që dikur kryheshin në mjekësinë nukleare realisht kryhen po të njëjtat në Institutin e Fiziologjisë.

“E vërtetë është fakti se në mjekësinë nukleare janë blerë reagensët dikur me një çmim jashtëzakonisht shumë të lartë 4-5 herë më të lartë në krahasim me aparatin dhe metodën që përdoret në Institutin e Fiziologjisë. Kështu që ne e kemi furnizuar Institutin e Fiziologjisë për të bërë të njëjtat analiza me një kosto shumë më të ulët në krahasim me analizat në njësinë nukleare, pasi që buxheti i QKUK-së nuk mund ta përballojë”, ka sqaruar ajo.

Ajo e pranon se as në Institutin e Fiziologjisë nuk janë duke u punuar këto analiza për 2-3 javë në mungesë të reagensëve. Por, sipas saj, janë duke u kryer procedurat e tenderimit për sigurimin e tyre.

Megjithatë personeli shëndetësor i Instituti të Fiziologjisë, që nuk dëshirojnë të prononcohen me emër, janë skeptik se materiali që drejtoresha e barnatores u kishte premtuar se do t’ua sillte në fillim të muajit gusht do të arrijë së shpejti, duke iu referuar muajve të kaluar ata thonë se ka pasur raste, kur kërkesat për reagensë janë vonuar deri në 8 muaj. Ndërkohë, në pritje të materialit ata kishin vazhduar të marrin gjak për analiza dhe ta ruanin atë në temperatura minus 30 gradë Celsius, por duke vërejtur se vonesat mund të jenë shumë më të mëdha se ato që paralajmërohen edhe ata kanë ndërprerë marrjen e gjakut dhe presin furnizimin me material të nevojshëm.

Nga ana tjetër, në laboratorët privatë përreth QKUK-së, ku kryhen këto analiza , varësisht cila prej tyre kërkohet nga mjeku kompetent, çmimi i tyre sillet rreth 15 euro. Derisa ndonjë analizë si ato të gjëndrës tiroide mund të kryhen me 5 euro, janë disa lloje të tumor markerëve që kushtojnë deri në 20 euro.