Prishtinë. Komandanti i ri i KFOR-it, gjeneralmajor Erhard Buhler, ka deklaruar se prioritet i misionit të NATO-së gjatë mandatit të tij, do të jetë thellimi i bashkëpunimit me FSK-në. Buhler është takuar të enjten me presidentin Fatmir Sejdiu dhe kryetarin e Kuvendit, Jakup Krasniqi, duke konfirmuar përkushtimin e KFOR-it për të ofruar siguri në tërë territorin e Kosovës. Ai ka deklaruar se KFOR-i është përgjegjës për të gjithë territorin e Kosovës, dhe do të përkushtohet që të veprojë për ruajtjen e integritetit territorial të saj.

“Prioritet i KFOR-it gjatë mandatit tim do të jetë thellimi i bashkëpunimit me FSK-në dhe lidhur me këtë kemi plane, që do ta avancojë këtë proces. Sa i përket veriut të Kosovës, kam parasysh disa bisedime që do të dëshirojë t’i fillojë së shpejti atje, mirëpo jam i bindur se të gjitha veprimet tona do të jenë në koordinim të plotë ndërmjet KFOR-it, institucioneve të Kosovës dhe bashkësisë ndërkombëtare”, ka thënë Buhler.

Ndërsa, presidenti Sejdiu ka thënë se gjatë këtyre njëmbëdhjetë vjetëve, KFOR-i ka bërë një punë të madhe në Kosovë. “Pjesëtarët e KFOR-it kanë qenë përherë shembull i shërbimit profesional dhe i disiplinës, ndaj ata kanë gëzuar gjithë respektin e qytetarëve dhe të institucioneve të Kosovës”, tha Presidenti, duke ritheksuar vizionin e institucioneve dhe qytetarëve të Kosovës për anëtarësimin sa më të shpejtë në BE, NATO dhe në mekanizmat e tjerë ndërkombëtarë, përfshirë edhe OKB-në.